Thaburi 35 - ÎVUKU RÎA ÛVORO MWARO

Îvoya rîa gwîtia ûtethio

¹ We Ngai-Mûnene, regana na arîa mareganaga nanie, na ûrûe na arîa marûaga nanie!

² Oca ngo yaku na indo cia mbaara, na ûke ûndethie.

³ Oca îtumû rîaku na rûviû, ûrûe na arîa manûmîrîrîtie. Mbîrîra, atî nîûkûmvonokia.

⁴ Conorithia na wagithie gîtîîo arîa mageragia kûmbûraga! Cokithia andû arîa marenda kûmbûraga na mavîngîcwe.

⁵ Marotuîka ta macaki magûrûkîtue nî rûkûngi, mavinyûrîtue nî mûraika wa Ngai-Mûnene!

⁶ Njîra yao îroruma nduma na îgatendera, mûraika wa Ngai-Mûnene amarûmîrîrîtie!

⁷ Nîûndû mambigagîra mîtego gûtarî gîtûmi, maamînjîre îrima îraca nîguo manyitithie.

⁸ Maronyitwa nî mûthiro matevarîrîtie; maronyitwa nî mîtego yao îrîa maigîte, na mamîgwîre macûkangue!

⁹ Nanie nîngaakena nîûndû wa Ngai-Mûnene; nîngaakena nîûndû nîamvonoketie.

¹⁰ Nîngera Ngai-Mûnene na ngoro yakwa yonthe atîrî, “Gûtirî wîngî tawe we Ngai-Mûnene. Nîûvonokagia arîa matarî vinya kuuma kûrî arîa marî vinya, athîni na avatari kuuma kûrî arîa mavinyanagîrîria.”

¹¹ Andû arîa acûku nîmarutaga ûira wa maveeni, mambûragia maûndû marîa nie ndaicî.

¹² Nîmekaga maûndû maro nao makambîka maûndû macûku, nanie ndigîtwe nîrî na vinya.

¹³ Nwatî rîrîa maarî arwaru, nînekîrire nguo ya macakaya; nînenyerekirie, na naavoyaga nyînamîtie kîongo gîakwa,

¹⁴ ta ûrîa nîngîvoya nîûndû wa mûrata wakwa kana mûrwaiya. Nathiîcaga nyînamîrîrîtie ngîcakaya, ta mûndû agîcakaya nîûndû wa ng'ina.

¹⁵ Nwatî rîrîa naarî thînarî, onthe nîmaakenete na nîmaanthiûrûrûkîrie nîguo manyûrûrie, andû ageni nîmaandivire na.

¹⁶ Andû arîa manyûrûragia cionje, nîmaandembire nîûndû wa kûmena.

¹⁷ We Ngai-Mûnene, nîwîkara ûroretie nginya rî? Mvonokia ndige kûtharîkîrwa nîo, vonokia mwoyo wakwa kuuma kûrî mînyambû îno!

¹⁸ Nîngaaûcokeria ngatho nîrî kîûnganorî kînene Kîam andû aku; nîngaagûkumia andû eengî makîonaga.

¹⁹ Ndûgatûme nthû ciakwa, andû a maveeni manthekerera, Ndûgatûme andû acio mamenerete makenerera mathîna makwa.

²⁰ Nîûndû mîario yao tî ya thayû, maragia maûndû ma maveeni megiî andû arîa matûûraga na thayû.

²¹ Maragia maugîrîrîtie atîrî, “Haha, Haha, Haha, Haha! Nîtwonire ûrîa wekire!”

²² Nwatî we Ngai-Mûnene, nîûrona maûndû mau, kwoguo ndûgakire, we Mwathani; ndûgekare varaca nanie!

²³ Ûkîra, we Ngai-Mûnene, na ûngitîre, ûkîra, we Ngai wakwa, na ûnjirîrîre.

²⁴ Nduîra atî ndirî na mavîtia, we Ngai-Mûnene, Ngai wakwa, nîûndû wa ûthingu waku; ndûgetîkîre nthû ciakwa inthekerere.

²⁵ Ndûgatûme meîra na ngoro atîrî, “Ûrîa tûrendete nîtwamûvoota! Nîtwavingia ûrîa tûrendete!”

²⁶ Tiga acio makenagîrîra kûthînîka gwakwa, mavootwe na maconorithue; acio meyonaga marî aro kûrî nie, megue nthoni na maconoke.

²⁷ Tiga arîa mendaga kwona ngîtuîrwa, atî ndirî na mavîtia maugîrîrie na gîkeno na mauge rîngî na rîngî atîrî, “Kaî Ngai-Mûnene nî mûnene-î! Nîakenetue nî ûvootani wa ndungata yake.”

²⁸ Nîngaacoka mbarie ûvoro wa ûthingu waku kûrî andû, na nîngaagûkumia mûthenya wonthe.