Thaburi 31 - ÎVUKU RÎA ÛVORO MWARO

Îvoya rîa kwîvoka Ngai

¹ Mbûkîte kûrî we Ngai-Mûnene nîguo ûngitîre; ndûkanjonorithie. We wî Ngai mûthingu, nîrakûvoya ûmvonokie.

² Nthikîrîria, na ûmvonokie narua! Tuîka ta îthiga rîakwa rîa kûngitîra, vandû varî na vinya va kûmvonokia.

³ We nîwe ûngitagîra, ndethia na ûndongorie wata ûrîa wîranîrîte.

⁴ Ndethûra kuuma kûrî mûtego ûrîa ndegetwe naguo, ngitîra kuuma ûgwatirî.

⁵ Nînakûnengera mwoyo wakwa, nîûmvonoketie, we Ngai-Mûnene; we wî Ngai mwîvokeku.

⁶ We nîûmenete andû arîa magoocaga ngai cia mîvuanano, nwatî nie nî ngwîvokete, we Ngai-Mûnene.

⁷ Nî ngaakena na ngûngûîre nîûndû wa wendo waku ûtathiraga, we nîwonete mînyamaaro yakwa na nî wicî mathîna makwa.

⁸ Ndwandekereria kûrî nthû ciakwa, nîûnûngamîtie vandû varî na thayû.

⁹ Mbîguîra ntha, Ngai-Mûnene, nîûndû nîrî thînarî, metho makwa nîmanogu nîkûrîra. Nîrî mûthiru vinya ngoro na mwîrî.

¹⁰ Nie nîrî mûthiru vinya nî kîeva, nakîo kîrîro gîgakuvîvia ûtûûro wakwa. Mathîna marîa nîrî namo nîmatûmîte nthire vinya, wana nginya mavîndî makwa nî mathiru vinya.

¹¹ Nthû ciakwa cionthe, na makîria arîa tûtûûranîrîte nao, manduîte kîndû gîa kûthekagîrîra. Arata akwa nîmetigagîra mamona, rîrîa mamonera njîrarî, nîkwa maûraga nînie.

¹² Andû onthe mariganîrîtwe nînie takwa nîrî mûkuû, mbîkariî ta nyûngû nguû.

¹³ Nînîregua nthû nyîngî ikîvevanîrîra, thîna ûrî na mîena yonthe, maravanga ûrîa makûntharîkîra, maravanga ûrîa makûmbûraga.

¹⁴ Nwatî we Ngai-Mûnene, nîwe nîîvokete, we wî Ngai wakwa.

¹⁵ Ûtûûro wakwa ûrî njararî ciaku, mvonokia kuuma kûrî nthû ciakwa, kuuma kûrî arîa manyariraga.

¹⁶ Mbîguîra ntha, nie ndungata yaku, mvonokia nîûndû wa wendo waku ûtathiraga.

¹⁷ We Ngai-Mûnene nînîragûkaîra, ndûkanjonorithie. Tiga andû arîa aganu maconoke, tiga mathiî marî amaku kwa arîa akuû.

¹⁸ Kiria andû arîa maveenanagia, andû arîa etîi na aganu, arîa manyararaga andû arîa athingu.

¹⁹ Kaî wega waku ûrîa wigîrîte arîa magûtîîte nî mwîngî-î! Andû onthe nîmaicî ûrîa wîkaga maûndû maro na ûkagitîra arîa makwîvokete.

²⁰ Nîûmathithaga varîa we ûrî, kûraca kuuma kûrî mîvango mîcûku ya andû, nîûmaigaga vandû ûmagitîrîte, kuuma kûrî irumi cia nthû ciao.

²¹ Ngai-Mûnene arokumua, nîûndû nîamonetie wendo ûtathiraga na njîra ya magegania, rîrîa naarigicîrîtue ta îtûûra rîkîtharîkîrwa!

²² Naarî mûmaku na ngeciria atî ûrî mûriganîre nînie, nwatî nîweguire kîrîro gîakwa rîrîa nagûkaîre ûndethie.

²³ Endani Ngai-Mûnene, mue andû onthe ake. Ngai-Mûnene nîagitagîra andû arîa evokeku, nwatî nîaverithagia arîa etîi wata ûrîa kwagîrîrîte.

²⁴ Gîani na vinya na mûmîrîrie, mue muonthe arîa mwîvokete Ngai-Mûnene.