Thaburi 29 - ÎVUKU RÎA ÛVORO MWARO

Mûgambo wa Mwathani ûrî rûkûngirî

¹ Vani Ngai-Mûnene gîtîîo, mue ciûmbe cia îgûrû, vani rîîtwa rîake vinya na riiri.

² Vani Ngai-Mûnene gîtîîo nîûndû wa riiri wa rîîtwa rîake. Goocani Ngai-Mûnene arî hekarûrî yake ntheru.

³ Mûgambo wa Ngai-Mûnene nî wîguîkaga manjîrî meengî; Ngai ûrîa ûrî riiri agambaga ta wa ngûa, mûgambo wa Ngai-Mûnene ûragamba ûrî îriarî.

⁴ Mûgambo wa Ngai-Mûnene ûrî vinya, mûgambo wa Ngai-Mûnene wîcûrîtwe nî riiri.

⁵ Mûgambo wa Ngai-Mûnene nî unangaga mîtarakwe, nî unangaga mîtarakwe ya Lebanoni.

⁶ Nîatûmaga irîma cia Lebanoni irûgarûge ta tûcaû, na nîatûmaga kîrîma Kîam Herimoni kîrûgarûge ta ndegwa.

⁷ Mûgambo wa Ngai-Mûnene nîûrutaga nînîmbî cia mwaki.

⁸ Mûgambo wa Ngai-Mûnene nîûtûmaga werû winaine, Ngai-Mûnene nî ainainagia werû wa Kadeshi.

⁹ Mûgambo wa Ngai-Mûnene nî winainagia mîtî ya mîvuru, nîûtûmaga mathangû ma mîtî mûtitûrî metîke, nao andû onthe hekarûrî yake nîmaugagîrîria atîrî, “Ngai arokumua!”

¹⁰ Ngai-Mûnene nîke wathaga îria, ke atûûraga arî mûthamaki tene na tene.

¹¹ Ngai-Mûnene arovecaga andû ake vinya! na arorathima andû ake na amave thayû.