Thaburi 28 - ÎVUKU RÎA ÛVORO MWARO

Îvoya rîa gwîtia ûtethio

¹ We Ngai-Mûnene, mûgitîri wakwa, nînîragûkaîra. Thikîrîria ngîgûkaîra! Wona warega kûnthikîrîria nî ngûkua.

² Thikîrîria Ngai-Mûnene ngîgûkaîra ûndethie, mbûkîrîrîtie njara ciakwa nîcierekeretie hekarûrî yaku ntheru.

³ Ndûkanduîre ûndû ûmwe na andû arîa aganu, na andû arîa mekaga maûndû macûku, maragia waro nwatî mecûrîtwe nî waganu ngororî ciao.

⁴ Maverithie kûringana na maûndû marîa mekîte, kûringana na maûndû macûku marîa meekire. Maverithie kûringana na maûndû mao o ene, meke ûrîa magîrîrwe nî gwîkwa!

⁵ Matitîîaga maûndû marîa Ngai-Mûnene ekîte, kana indo irîa aaûmbire, kwoguo nîakaamaverithia, na amacûkangie tene na tene.

⁶ Ngai-Mûnene arokumua; nîûndû nîeguîte ngîmûkaîra andethie.

⁷ Ngai-Mûnene nîke vinya wakwa na nîke ûngitagîra, ke nîke nîîvokaga. Nîandethagia na akangenia, nînîmwinagîra nyîmbo cia kûmûkumia.

⁸ Ngai-Mûnene nîagitagîra andû ake, nîagitagîra na akavonokia mûthamaki ûrîa athuurîte.

⁹ Vonokia andû aku, Ngai-Mûnene, na ûrathime andû aku. Tuîka mûrîthi wao, na ûtûûre ûmamenyagîrîra tene na tene.