Thaburi 27 - ÎVUKU RÎA ÛVORO MWARO

Îvoya rîa gûkumia Ngai-Mûnene

¹ Ngai-Mûnene nîke ûtheri wakwa na ûvonokio wakwa, gûtirî mûndû nîngîtigîra. Ngai-Mûnene nîke ûngitagîra kuuma kûrî mogwati monthe, gûtirî mûndû ngeetigîra.

² Rîrîa andû arîa acûku mantharîkîra makîenda kûmbûraga, mavîngagwa na makagwa.

³ Wana athigari a mbaara mangîndigicîria, gûtirî kîndû ngeetigîra, wana nthû ciantharîkîra, vîndî cionthe ngeevokaga Ngai.

⁴ Mvoete Ngai-Mûnene ûndû ûmwe, na nîguo nîracaria: gûtûûra nyombarî yake ûtûûro wakwa wonthe, ngîonaga wega wa Ngai-Mûnene, na ngîcaragia wendi wake hekarûrî yake.

⁵ Vîndî ya thîna nîakaangitîra, nîakaanthitha hekarûrî yake, na ambigage îgûrû vandû vagitîre.

⁶ Kwoguo nîngaavoota nthû ciakwa irîa inthiûrûrûkîrîtie. Nîngaamûrutîra magongoona hekarûrî yake nginaga ngenete, nîngaaina na ngumie Ngai-Mûnene.

⁷ Nthikîrîria we Ngai-Mûnene, rîrîa ngûgûkaîra! Mbîguîra ntha na ûmbîtîke!

⁸ Rîrîa waugire atîrî, “Ûka ûngooce,” nînaacokirie atîrî, “Nîngûka, Ngai-Mûnene;

⁹ ndûkandiganîrie!” Ndûkarakare nînie, ndûkandiganîrie nie ndungata yaku. We nîwe ûtûûraga wî ûtethio wakwa, ndûkandiganîrie, ndûkariganîrwe nînie, we Ngai, mûvonokia wakwa!

¹⁰ Wana ethîrwa aciari akwa nwa mandiganîrie, Ngai-Mûnene nîakaamenyerera.

¹¹ Nthomithia, we Ngai-Mûnene, ûrîa ûkwenda mbîke, na ûndongorie njîrarî îrîa îrî na thayû, nîûndû nthû ciakwa nî nyîngî.

¹² Ndûkandiganîrie kûrî nthû ciakwa mambîke wa ûrîa makwenda, mambigagîrîra maûndû ma maveeni na makauga ûrîa makûmbîka maûndû macûku.

¹³ Nîmbîtîkîtie, atî nîngoona wega wa Ngai-Mûnene nîrî mwoyo.

¹⁴ Îîvoke Ngai-Mûnene. Gîa na vinya, na ndûgakue ngoro. Îîvoke Ngai-Mûnene.