Thaburi 25 - ÎVUKU RÎA ÛVORO MWARO

Îvoya nîûndû wa ûtethio na ûgitîri

¹ We Ngai-Mûnene we nîwe mvoyaga,

² We Ngai wakwa, nîwe nîîvokete. Ndûgatûme njonoka, ndûgatûme nthû ciakwa inthekerere!

³ Ndûkareke andû arîa magwîtîkîtie maconorithue, nwatî ûconorithie arîa mareganaga nawe.

⁴ Nthomithia njîra ciaku, we Ngai-Mûnene; ûmonie kûrûmîrîra maûndû marîa wendaga.

⁵ Nthomithia gûtûûra nûmîrîrîte ûma waku, nîûndû we wî Ngai wakwa, mûvonokia wakwa, ngwîvokaga vîndî cionthe.

⁶ We Ngai-Mûnene taririkana ntha ciaku na wendo waku ûtathiraga, ûrîa wonanirie kuuma tene.

⁷ Ndûkaririkane mevia na mavîtia marîa nekire nîrî mûnini, ndirikana nîûndû wa wendo waku ûtathiraga, we Ngai-Mûnene ûndirikane nîûndû wa ntha ciaku.

⁸ Ngai-Mûnene nî mûthingu na nî mwaro, kwoguo nîathomithagia evia njîra îrîa magîrîrwe nî kûrûmîrîra.

⁹ Nîatongoragia andû arîa enyivia na njîra cia ûthingu, na nîamathomithagia wendi wake.

¹⁰ Ngai-Mûnene nîatongoragia andû na wîvokeku na wendo, arîa onthe marûmagîrîra na makaathîkîra maathani make.

¹¹ We Ngai-Mûnene, nîûndû wa rîîtwa rîaku, njovera mevia makwa nîûndû nî meengî mûno.

¹² Andû arîa matîîaga Ngai-Mûnene, nîmakaathomithua nîke njîra îrîa magîrîrwe nî kûrûmîrîra.

¹³ Ngai-Mûnene nîagaatûma magîe na ûtûûro mwaro vîndî cionthe, na njiarwa ciao nîikegwatîra vûrûri.

¹⁴ Ngai-Mûnene nî mûrata wa arîa mamwathîkagîra, na nîamaririkanagia kîrîkanîro.

¹⁵ Metho makwa mekaraga maroretie Ngai-Mûnene vîndî cionthe, nîûndû nîamvonokagia kuuma mûtegorî.

¹⁶ Nthikîrîria, we Ngai-Mûnene na ûmbîguîre ntha, nîûndû nîrî na îvooru na ndirî na vinya.

¹⁷ Nthirîria mîtangîko ya ngoro yakwa, na ûndute mathînarî makwa monthe.

¹⁸ Ririkana mathîna na mînyamaaro yakwa, na ûnjovere mevia makwa monthe.

¹⁹ Taroria wone ûrîa nthû ciakwa ciîngîvîte, taroria wone ûrîa mamenete.

²⁰ Ngitîra na ûmvonokie; ndûkanjonorithie, nîûndû nîîthithaga kûrî we.

²¹ Ngitîra nîûndû wa wega na wîvokeku wakwa, nîûndû we nîwe nîîvokete.

²² We Ngai, vonokia andû aku a Isiraeli, mavonokie kuuma mathînarî mao monthe!