Thaburi 24 - ÎVUKU RÎA ÛVORO MWARO

Ngai nî mûthamaki mûnene

¹ Nthî na indo cionthe irîa irî kuo nî cia Ngai-Mûnene, nthî nî yake wana andû onthe arîa matûûraga kuo nî ake.

² Aaûmbire mûcingi wa nthî îgûrû rîa îria, na akîmiga îîkindîrîtie îriarî kûrîa kûriku.

³ Nû mwagîrîru wa kunûkia kîrîmarî Kîam Ngai-Mûnene? Nû ûngîtûûra hekarûrî yake ntheru?

⁴ Nî andû arîa marî ciîko mbaro na marî meciria matheru, arîa matagoocaga mîvuanano, na matevîtaga na ûndû wa maveeni.

⁵ Ngai-Mûnene nîakaamarathima na amavonokie, na Ngai mûvonokia wao nîagaatua atî matirî na mavîtia.

⁶ Andû ta acio nîo magoocaga Ngai, nîo magoocaga Ngai wa Jakovu.

⁷ Vingûkani mue ivingo, vingûkani mue ivingo cia tene, nîguo Mûthamaki ûrîa ûrî riiri atonye.

⁸ Mûthamaki ûcio ûrî riiri nû? Nî Ngai-Mûnene ûrîa ûrî vinya na ûvoti, Ngai-Mûnene, ûrîa ûvootanaga mbaararî.

⁹ Vingûkani mue ivingo, vingûkani mue ivingo cia tene, nîguo Mûthamaki ûrîa ûrî riiri atonye.

¹⁰ Mûthamaki ûcio ûrî riiri nû? Nî Ngai-Mûnene, mwene vinya wonthe, ke nîke Mûthamaki ûrî riiri!