Thaburi 22 - ÎVUKU RÎA ÛVORO MWARO

Kîrîro nîûndû wa mathîna na rwîmbo rwa gûkumia Ngai

¹ Ngai wakwa, Ngai wakwa, ûndiganîrîtie nîkî? Nîkwa wî kûraca nanie ûguo nîkî, na ûkarega kwîgua ngîgûkaîra?

² Ûûi, Ngai wakwa, ngûkayagîra mûthenya nwatî ndûmbîtîkaga, ngûkayagîra ûtukû nwatî ndivurûkaga.

³ Kûnarî ûguo, we wî Mûtheru, nîwe ûthamakagîra Isiraeli na magakûgooca.

⁴ Methe metû nîmaagwîtîkîtie, nîmaagwîtîkîtie na nîwamavonokirie.

⁵ Nîmaagûkaîre na nîwamavonokirie, nîmaakwîvokire na matiaconorithua.

⁶ Nwatî andû monaga mbîkariî ta kîgunyû na tî ta mûndû, nthekagîrîrwa na nganyararwa nî andû onthe!

⁷ Andû onthe arîa mamonaga nîmanjivaga, manyûrûragia na makinainagia ciongo ciao.

⁸ Maugaga atîrî, “Wevokire Ngai-Mûnene, nîkwa ararega gûkûvonokia nîkî? Ethîrwa Ngai-Mûnene nî akwendete, nîkwa ararega gûgûtethia nîkî?”

⁹ We Ngai nîwe wandutire îvurî rîa nyanya, na rîrîa naarî gakenge nîwamenyerere.

¹⁰ Ndûûrîte ngwîvokete kuuma rîrîa naaciarirwe, nawe ûtûûrîte wî Ngai wakwa kuuma naciarwa.

¹¹ Ndûgekare varaca nanie! nîûndû thîna ûrî vakuvî nanie, na gûtirî na mûndû wa kûndethia.

¹² Nthû nyîngî inthiûrûrûkîrîtie ta ndegwa, inthiûrûrûkîrîtie ta ndegwa mbaganu cia vûrûri wa Bashani.

¹³ Ciathamîtie tûnyua twao ta mînyambû, ciîvarîrîtie kûntharîkîra na kûndambururanga.

¹⁴ Nie nîrî mûthiru vinya, nthirîte vinya ta manjî metîkîte nthî. Mavîndî makwa monthe nîmatigithanu, ngoro yakwa îkariî ta mûvûra ûrî mûrarûku.

¹⁵ Mûmero wakwa ûnyarîte ta rûkûngû, na rûrîmî rwakwa rûnyitanîte na nthîa. Nî ûndiganîrîtie nthiî kwa arîa akuû.

¹⁶ Gîkundi Kîam andû arîa acûku nîkînthiûrûrûkîrîtie, gîkundi gîkariî ta ngui ino mvûtu nîkînthiûrûrûkîrîtie, nîmanducangîte njara na magûrû makwa.

¹⁷ Ndigarîte mavîndî matheri, nthû ciakwa indoragia ingûrîrîte metho.

¹⁸ Maagaanire nguo ciakwa, na nguo yakwa ndaca makîmikîria mîtî.

¹⁹ Nwatî we Ngai-Mûnene, ndûgekare varaca nanie! ûka narua ûmvonokie!

²⁰ Ndethûra ndikaûragwe nî nthû ciakwa na mviû, mvonokia kuuma kûrî nthû ino ciîkariî mbaganu ta ngui.

²¹ Mvonokia kuuma tûnyuarî twa mînyambû, ndingîvota gwîtethia mbere ya mbogo ino.

²² Nî ngeera andû etû maûndû marîa wîkîte, nîngaagûkumia nîrî hekarûrî kîgomanorî Kîamo.

²³ Mue nîmûgoocaga Ngai-Mûnene, mûkumieni! Mue njiarwa cionthe cia Jakovu, mûkumieni! Mue andû onthe a Isiraeli, mûgooceni!

²⁴ Nîûndû ndatiganagîria athîni kana ariganîrwe nî mînyamaaro yao, ndangîriganîrwa nî o, nwatî nîamatethagia rîrîa mamûvoya amatethie.

²⁵ Nîngaagûkumia nîrî kîûnganorî kînene nîûndû wa ûrîa wîkîte, nîngaakûrutîra magongoona wata ûrîa neranîîre, andû arîa makûgoocaga makîonaga

²⁶ Athîni makaarîa nginya mavae, arîa magoocaga Ngai-Mûnene nî makaamûkumia. Marotûûra mûrî athatûke tene na tene!

²⁷ Mavûrûri monthe nî makaaririkana Ngai-Mûnene na mamûcokerere, andû a mîvîrîga yonthe nî makaamûgooca.

²⁸ Nîûndû Ngai-Mûnene nîke mûthamaki, na nîke wathaga mavûrûri.

²⁹ Andû onthe arîa etîi nîmakenamîrîra mamûgooce andû onthe arîa makucaga nîmakenamîrîra mbere yake.

³⁰ Njiarwa irîa igaaûka nîikaamûtungatîra, njiarwa irîa igaaûka nîikeeraga maûndû marîa Ngai-Mûnene ekîte.

³¹ Andû arîa matarî aciare nî makeerwa atîrî, “Ngai-Mûnene nîwavonokirie andû ake.”