Thaburi 21 - ÎVUKU RÎA ÛVORO MWARO

Gûkumia Ngai nîûndû wa ûvootani

¹ Mûthamaki arî na gîkeno, we Ngai-Mûnene, nîûndû Nîwamûvere vinya, nîakenete mûno nîûndû nîwamûvotithirie kûvootana.

² Nî ûmûvete kîrîa ngoro yake îriragîria, nîûmûvingîrîtie mavoya make.

³ Nîwaûkire kûrî ke na irathimo nyîngî, na ûkîmwîkîra nthûmbî ya thaavu kîongorî gîake.

⁴ Aakûûririe ûmûve ûtûûro, na Nîwamûvere guo, na nîwamûvere ûtûûro wa tene na tene.

⁵ Nîagîte na riiri mwîngî nîûndû wa ûtethio waku, nîûtûmîte agîe na ngumo na gîtîîo.

⁶ Nîûmûrathimaga vîndî cionthe, nîecûrîtwe nî gîkeno nîûndû wîthagîrwa vamwe nake.

⁷ Mûthamaki nîetîkîtie Ngai-Mûnene, na nîûndû wa wendo ûtathiraga wa Ngai-Mûnene, ke ageekaraga arî na thayû.

⁸ Mûthamaki nîakaanyita nthû ciake cionthe, nîakaanyita andû onthe arîa mamûmenete.

⁹ Nîûkaamathiria ta ûrîa mwaki ûvîvagia indo ikathira rîrîa akaaumîra. Ngai-Mûnene nîakaamathiria na marakara make, na nîmakaavîvua nî mwaki mathire viû.

¹⁰ Nîûkaathiria njiarwa ciao gûkû nthî, nîûkaamaûraga onthe mathire.

¹¹ Wana mangîvanga gûgwîka maûndû macûku, mîvango yao ya ungumania ndîgaakinyanîra.

¹² Rîrîa ûkaamaikia mîguî ûmarathe, nîmakaagarûrûka na maûre.

¹³ Ûrokumua, we Ngai-Mûnene, nîûndû wa vinya waku mûnene! Tûkaaina na tûkumie ûvoti waku.