Thaburi 20 - ÎVUKU RÎA ÛVORO MWAROÎvoya nîûndû wa ûvootani 1 Ngai-Mûnene arogûtethagia rîrîa wî na thîna! Ngai wa Jakovu arokûgitagîra! 2 Arogûtethagia arî hekarûrî yake ntheru; agûtethagie arî Kîrîmarî gîa Zayuni. 3 Aroririkana matega maku monthe, na etîkîre magongoona maku ma kûvîvua. 4 Arokûva kîrîa wîriragîria na atûme mîvango yaku yonthe îrîa wendaga îvinge. 5 Nîtûkaaugîrîria tûkenete nîûndû wa ûvootani waku, na tûkîrîrie vendera nîguo tûkumie rîîtwa rîa Ngai wetû. Ngai-Mûnene arokûvingîria maûndû monthe marîa ûmûvoete. 6 Rîu nîmbicî atî Ngai-Mûnene nîavecaga mûthamaki ûrîa athuurîte ûvootani, arî îgûrû kûrîa atûûraga nîacokagia mavoya make, nîamûvotithagia kûvoota nthû ciake cionthe na vinya wake. 7 Andû amwe metîîaga na ikaari ciao cia mbaara, nao engî magetîîa na mbarathi ciao, nwatî tue twîtîîaga na Ngai-Mûnene, Ngai wetû. 8 Andû ta acio nîmakaavîngwa na magwe, nwatî tue nî tûgaûkîra na tûrûngame twîkindîrîtie. 9 We Ngai-Mûnene, votithia mûthamaki kûvootana, na ûtûthikagîrîrie rîrîa tûgûkûvoya. |
©Bible Society of Kenya, 2019
Bible Society of Kenya