Thaburi 19 - ÎVUKU RÎA ÛVORO MWARO

Riiri wa Ngai kûrî ciûmbe ciake

¹ Îgûrû maturî nîriumbûraga riiri wa Ngai, îgûrû rîerarî nîkwonanagia riiri wake!

² Mûthenya nîwîraga mûthenya ûrîa wîngî ûvoro wa riiri wa Ngai, ûtukû nîûkinyagîria ûtukû ûrîa wîngî ûvoro wa riiri wake.

³ Gûtirî mîario kana ciugo kuuma kûrî cio, gûtirî mûgambo wa cio wîguîkaga,

⁴ kûnarî ûguo mûgambo wacio ûrî nthî yonthe, na nîwîguîkaga nginya mîthiia yonthe ya nthî. Ngai nîwaigire riûa îgûrû rîtûûrage kuo,

⁵ riûa riumaga kîraûko ta mûvikania akiuma nyombarî yake, rîkenete ta mûndû wa îvenya evarîrîtie kûvinyûra.

⁶ Riumagîrîra mûthiiarî ûmwe wa îgûrû na rîkavîtûkania nginya mûthiia ûcio wîngî. Gûtirî kîndû kîngîîthitha kuuma kûrî ûrugarî wa riûa.

Watho wa Ngai

⁷ Watho wa Ngai-Mûnene nî mûkinyanîru, nî ûvecaga mûndû vinya mûcerû. Maathani ma Ngai-Mûnene nî ma kwîvokeka, nîmavecaga ûûgî arîa matarî naguo.

⁸ Mawatho ma Ngai-Mûnene nî ma ma, na arîa mamavingagia methagîrwa marî akenu. Maathani ma Ngai-Mûnene nî matheru, na nî mathomithagia mûndû.

⁹ Gwîtigîra Ngai-Mûnene nî ûndû mwaro, na nîgûtûûra tene na tene. Matuîro ma Ngai-Mûnene nî ma ma; na nî magîrîru vîndî cionthe.

¹⁰ Nî makwendeka mûno gûkîra thaavu ntheri, marî mûrîo gûkîra ûûkî ûrîa mûtheru mûno.

¹¹ Nî manthomithagia nie ndungata yaku, nî monaga maûndû maro rîrîa namaathîkîra.

¹² Gûtirî mûndû wonaga mevia make ke mwene; ntheria we Ngai-Mûnene kuuma kûrî mavîtia marîa mbîkaga ndakûmenya.

¹³ Mvonokia wana kuuma kûrî mevia marîa mbîkaga ngîmenyaga, ndûgatûme mevia mau mandongorie. Ngaacoka gûtuîka mûndû mwagîrîru, na ndikethîrwa nîrî na mavîtia ma wîvia mûnene.

¹⁴ Ciugo ciakwa na meciria makwa maroîtîkîrîka nîwe, we Ngai-Mûnene, mûgitîri wakwa na mûvonokia wakwa!