Thaburi 17 - ÎVUKU RÎA ÛVORO MWARO

Îvoya rîa mûndû ûtarî ûcuke

¹ Thikîrîria, we Ngai-Mûnene, ngîkûthaitha wonanie kîvooto; thikîrîria ngîgûkaîra nîguo ûndethie! Thikîrîria ngîkûvoya na ma.

² Nduîra atî nîrî mwagîrîru, nîûndû we nîwicî ûma.

³ We nîwicî ngoro yakwa, nîûkîte kûrî nie ûtukû, nîûnduîrîtie waro viû, na ûkamenya atî ndiaragia maûndû macûku.

⁴ Ndiîkaga maûndû macûku ta andû arîa engî, nî mvingagia mawatho maku na ndinyitanagîra na andû arîa aganu.

⁵ Vîndî cionthe nî nûmagîrîra njîra ciaku, na ndianaitiganîria.

⁶ We Ngai, nîrakûvoya nîûndû nî ûmbîgucaga, tega matû maku na ûnthikîrîrie.

⁷ Onania wendo waku ûtathiraga na njîra ya magegania, we ûvonokagia arîa maûkaga kûrî we, ûmagitîre kuuma kûrî nthû ciao.

⁸ Ngitîra ta ndongu ya riitho, ûnthithe rungu rwa mathagu maku,

⁹ ndikatharîkîrwe nî andû arîa aganu, nthû ciakwa irîa inthiûrûrûkîrîtie ikîenda kûmbûraga.

¹⁰ Matirî ntha na maragia na mwîtîîo.

¹¹ Manûmagîrîria kûrîa ngûthiî na nîmanthiûrûrûkîrîtie, magîcaria kamweke nîguo mangwîthie nthî.

¹² Mambetererete mevarîrîtie ta mûnyambû, makîenda kûndambururanga tûcunjî.

¹³ Ûka we, Ngai-Mûnene! Regana nao na ûmavoote! Mvonokia na rûviû rwaku kuuma kûrî andû arîa aganu,

¹⁴ mvonokia na vinya waku we Ngai-Mûnene, kuuma kûrî andû arîa marî na indo cionthe irîa mendaga. Maverithie na îvera rîrîa ûmaigîrîte, ciana ciao irokinyîrwa nî îvera rîu, na rîkinyîre ciana cia ciana ciao!

¹⁵ Nwatî nie nîngaakwona, nîûndû nîrî mûthingu; na rîrîa ngaaramûka, nîngecûrwa nî gîkeno ngîkwona ûrîa wîkariî.