Thaburi 149 - ÎVUKU RÎA ÛVORO MWARO

Rwîmbo rwa gûkumia Ngai-Mûnene

¹ Kumiani Ngai-Mûnene! Inîrani Ngai-Mûnene rwîmbo rûcerû, mûkumieni kîûnganorî gîa etîkia!

² Isiraeli, kenerera Mûkûmbi, Andû a Zayuni canjamûkani nîûndû wa Mûthamaki wenyu.

³ Kumiani rîîtwa rîake mûkîinagia, nîmamwinîre na nduramu na mîtûrirû!

⁴ Nîûndû Ngai-Mûnene akenagua nî andû ake; nîatûmaga arîa enyivia mavootane.

⁵ Andû a Ngai nîmakene nîûndû wa kûvootana mbaararî, nîmaine na gîkeno ûtukû wonthe.

⁶ Nîmakumie Ngai maugîrîrîtie, manyitîte mviû cia njûra na njara.

⁷ Nîguo merîvîrîrie kûrî andû a mavûrûri, na maverithie andû arîa mataicî Ngai.

⁸ Nîmove athamaki ao na nyororo, na move atongoria ao na mvîngû cia cuuma;

⁹ na maverithie mavûrûri wata ûrîa kwathanîtwe. Ûcio nîguo ûvootani wa andû ake arîa evokeku. Kumiani Ngai-Mûnene!