Thaburi 148 - ÎVUKU RÎA ÛVORO MWARO

Nthî yonthe gûkumia Ngai-Mûnene

¹ Kumiani Ngai-Mûnene! Kumiani Ngai-Mûnene mûrî îgûrû, mûkumieni mue mûtûûraga îgûrû mûno.

² Mûkumieni mue araika ake onthe, mûkumieni mue athigari a îgûrû!

³ Mûkumieni mue riûa na mweri, mûkumieni mue njata cionthe irîa ikengaga.

⁴ Mûkumie we îgûrû mûno, na mûmûkumie mue manjî marîa marî îgûrû rîa matu.

⁵ Indo cionthe nîikumie rîîtwa rîa Ngai-Mûnene, nîûndû nîke wathanire, na ikîûmbwa.

⁶ Nîwavandire wa kîndû varîa kîrî tene na tene, na nîwathondekire watho ûtangîgarûrwa.

⁷ Kumiani Ngai-Mûnene mue mûrî gûkû nthî, mue ciûmbe irîa nene cia manjîrî, na îriarî kûrîa kûrikîru mûno.

⁸ Mveni, mbura ya mbembe, mbaravu na mbaa, rûkûngi rûnene rûrîa rûvingagia watho wake!

⁹ Irîma na tûrîma tuonthe, mîtî ya matunda na mîtî yonthe ya mûtitû.

¹⁰ Nyamû cionthe cia mûciî na cia kîthakarî, ciûmbe irîa itambaga nthî na iconi, mûkumieni.

¹¹ Athamaki a nthî na andû onthe, anene na athani onthe a nthî mûkumieni.

¹² Kumiani Ngai-Mûnene, mue anake na erîtu, andû arîa akûrû na ciana.

¹³ Andû onthe nîmakumie rîîtwa rîa Ngai-Mûnene, nîûndû rîîtwa rîake nî rînene gûkîra marîîtwa monthe. Riiri wake nî mûnene gûkîra nthî na îgûrû.

¹⁴ Nîatûmîte andû ake magîe na vinya, nîguo andû ake onthe mamûgooce, andû a Isiraeli arîa endete mûno. Kumiani Ngai-Mûnene!