Thaburi 147 - ÎVUKU RÎA ÛVORO MWARO

Gûkumia Ngai Mwene vinya wonthe

¹ Ngai-Mûnene arokumua! Nîwaro kwina nyîmbo cia gûkumia Ngai wetû; gûkumia Ngai nî ûndû mwaro na mwagîrîru.

² Ngai-Mûnene nîke ûtumaga rîngî Jerusalemu; nîaracokia mûciî Aisiraeli arîa marî îthamîriorî.

³ Ke nîavonagia arîa akuû ngoro, na akamova ironda ciao.

⁴ Nîke ûmenyaga ûrîa njata ciîgana, na nîaciîcî cionthe na marîîtwa mau.

⁵ Ngai-Mûnene nî mûnene na nîecûrîtwe nî ûvoti, ûûgî wake ndûngîthimîka.

⁶ Ngai-Mûnene nîaûkagîrîria arîa avinyîrîrie, nwatî agaikia arîa aganu mûtheturî.

⁷ Inîrani Ngai-Mûnene mûkîmûcokagîria ngatho, inîrani Ngai wetû mûkîvûraga mîtûrirû.

⁸ Nîatambarûkagia matu îgûrû rîetû, nîke ûtûmaga mbura yure nthî, na agatûma nyaki îmere irîmarî.

⁹ Nîavecaga nyamû gîa kûrîa, na akava tûcui twa ikûngûrû rîrîa twagamba.

¹⁰ Ndakenagua nî vinya wa mbarathi, kana akenua nî athigari njamba.

¹¹ Nwatî Ngai-Mûnene akenagua nî arîa mamwîtigagîra, arîa mevokaga wendo wake ûtathiraga.

¹² Kumia Ngai-Mûnene, we Jerusalemu! Kumia Ngai waku, we Zayuni!

¹³ Nîekagîra ivingo cia mîrango yaku vinya, na nîarathimaga andû aku.

¹⁴ Nîagitagîra mîvaka yenyu, nîakûvecaga ngano îrîa mbaro.

¹⁵ Nîathanaga gûkû nthî, na ûrîa auga nîwîkagwa na îvenya.

¹⁶ Atambarûkagia mbaravu ta mûrengeti, na akanyagarûkia mbaa ta mûu.

¹⁷ Auragia mbura ya mbembe ta mathiga, na gûtirî mûndû ûngîûmîrîria mvevo îo.

¹⁸ Nîacokaga akathana na îkararûka, nîatûmaga rûvuvo rûvurutane, na manjî mathiî.

¹⁹ Nîamenyithagia Jakovu ndûmîrîri yake, na akava Isiraeli mawatho na matuîro ma ciira.

²⁰ Ndaaneka ûndû ta ûcio vûrûrirî wîngî; na matiîcî mawatho make. Kumiani Ngai-Mûnene!