Thaburi 146 - ÎVUKU RÎA ÛVORO MWARO

Rwîmbo rwa gûkumia Ngai mûvonokia

¹ Kumia Ngai-Mûnene! Kumia Ngai-Mûnene, we ngoro yakwa!

² Ngaakumagia Ngai-Mûnene ûtûûrorî wakwa wonthe; ngainagîra Ngai ûtûûrorî wakwa wonthe.

³ Ndûkaige mwîvoko waku kûrî anene, ndûkaige mwîvoko waku kûrî mûndû, ndangîkûvonokia.

⁴ Rîrîa akua acokaga rûkûngûrî, mûthenya wa ûcio akua nîrîo mîvango yake îthiraga.

⁵ Gûkena nî mûndû ûrîa ûtethagua nî Ngai wa Jakovu, ûrîa mwîrîgîrîro wake ûrî kûrî Ngai-Mûnene Ngai wake,

⁶ ûrîa waûmbire îgûrû na nthî, îria na indo cionthe irîa irî kuo; ûrîa ûvingagia ciîranîro ciake vîndî cionthe.

⁷ Nîke ûtucaga cira wa arîa avinyîrîrie na kîvooto, nîke ûvecaga arîa avûtu gîa kûrîa. Ngai-Mûnene nî arekagîrîria arîa oove,

⁸ na nîavingûraga ndumumu metho. Nîaûkagîrîria arîa avinyîrîrie, na nîendete arîa athingu.

⁹ Ngai-Mûnene nîagitagîra ageni, nîatethagia aka a ndigwa na ciana cia ngoriai; nwatî nîacûkangagia andû arîa aganu.

¹⁰ Ngai-Mûnene nîatûûra aathanaga, Ngai wenyu mue andû a Zayuni akathanaga vîndî cionthe. Kumiani Ngai-Mûnene!