Thaburi 144 - ÎVUKU RÎA ÛVORO MWARO

Gûcokeria Ngai ngatho nîûndû wa ûvootani

¹ Ngai-Mûnene, îthiga rîakwa arokumua, ûrîa ûnthomithagia kûrûa na akamvarîrîria nîûndû wa mbaara.

² Nî mûrata wakwa wa kwîvokeka na mûgitîri wakwa, nîangitagîra na akamvonokia, nîke ngo yakwa na nîîthithaga varî ke, nîavootaga mavûrûri na akamaiga rungu rwakwa.

³ We Ngai-Mûnene, mûndû nî ndûî ûyû ûrûmbûyanagia nake? Mûndû nî ndûî ûyû ûtindanagîra nake?

⁴ Mûndû nîta mîvevû; ûtûûro wake ûvana ta kîruru kîvîtûkîte.

⁵ We Ngai-Mûnene vingûra matû maku na ûnyûrûrûke nthî; vutia irîma nîguo irute ndogo!

⁶ Venithia rûveni ûnyaganie nthû; ikia mîguî yaku na ûmavinyûrie.

⁷ Tambûrûkia njara yaku kuuma îgûrû, ndethûra na ûndute manjîrî meengî; mvonokia kuuma kûrî ageni,

⁸ arîa maragia maveeni, na mevîtaga wana rîrîa makûthaana.

⁹ Nîngûkwinîra rwîmbo rûcerû, we Ngai; nîngwinîra ngîvûraga ngita.

¹⁰ We nîûvecaga athamaki ûvootani, nîwe ûtethûraga Daudi, ndungata yaku.

¹¹ Mvonokia kuuma kûrî nthû mbaganu, na ûmvonokie kuuma kûrî ageni, arîa maragia maveeni, na mevîtaga wana rîrîa makûthaana.

¹² Anake etû wîthîrî wao marogîa na vinya, ta mîtî ya mwarano îrîa îkûraga waro. Erîtu etû maroekara ta itugî, irî nyumie cia kûgemia nyomba ya mûthamaki.

¹³ Makûmbî metû maroîcûra irio cia mîthemba yonthe; ng'ondu cietû irociara tûgondu ngiri makûmi meengî.

¹⁴ Ng'ombe cietû irociara njaû nyîngî, itikarege kûgîa mavu kana ivuna. Gûtikagîe kîeva kana kîrîro icagirî cietû.

¹⁵ Gûkena nî vûrûri ûrîa ûrathimîtwe na maûndû mau, gûkena nî andû arîa Ngai wao arî ke Ngai-Mûnene!