Thaburi 143 - ÎVUKU RÎA ÛVORO MWARO

Îvoya rîa gwîtia ûtethio

¹ We Ngai mûnene, îgua îvoya rîakwa! Tega gûtû wîgue mathaithana makwa; njokeria nîûndû wî mwîvokeku, na wî mûthingu!

² Ndûkanjirithie nie, ndungata yaku, nîûndû gûtirî mûndû mûthingu mbere yaku.

³ Nthû ciakwa nîinûmîrîrîte, na ikamvoota viû. Nîitûmîte mbîkare ndumarî ta arîa maakwire tene.

⁴ Kwoguo nîrîmûthiru vinya; nîrî mûkuû ngoro viû.

⁵ Nîndirikanaga mîthenya ya tene, ngeciragia na vinya maûndû monthe marîa waneka, na ngaririkana maûndû monthe marîa wîkîte.

⁶ Nyambararîtie njara ciakwa kûrî we, ngoro yakwa îkûnyonderete ta ûrîa nthî nyûmû înyondagîra manjî.

⁷ Njokeria narua, we Ngai-Mûnene! Nîrîmûkuû ngoro viû. Ndûkandiganîrie, nîûndû warega kûndethia nîngûthiî kwa arîa akuû.

⁸ Ndirikanagia ûvoro wa wendo waku ûtathiraga wa kîraûko, nîûndû we nîwe nîîvokete. Monia njîra îrîa mbagîrîrwe nî kûthiîra, nîûndû we nîwe mvoyaga.

⁹ We Ngai-Mûnene, ndethûra kuuma kûrî nthû ciakwa; nîûndû mbûrîrîte kûrî we nîguo ûngitîre.

¹⁰ Nthomithia gwîka wendi waku, nîûndû we nîwe Ngai wakwa. Tiga wega waku ûndongoragie nthiîcagîrîre njîrarî irîa nûngarû.

¹¹ Mvonokia we Ngai-Mûnene nîûndû wa rîîtwa rîaku; nîûndû wa ûthingu waku nduta mathînarî.

¹² Nîûndû wa wendo waku ûtathiraga, thiria nthû ciakwa, na ûcûkangie nthû ciakwa cionthe, nîûndû nie nîrî ndungata yaku.