Thaburi 119 - ÎVUKU RÎA ÛVORO MWARO

Watho wa Ngai

¹ Kûrathimwa nî andû arîa marî mîthiîre mîrûngîrîru; arîa marûmagîrîra watho wa Ngai-Mûnene.

² Kûrathimwa nî arîa marûmagîrîra kîrîra gîake, arîa mamûcaragia na ngoro ciao cionthe;

³ andû arîa matekaga maûndû macûku; nwatî nîmarûmagîrîra njîra ciake.

⁴ We Ngai, nîûtûvete mawatho maku nîguo tûmarûmagîrîre na kinyi.

⁵ Naarî kethîrwa njîra ciakwa nwa irûngare, na njîra ya kûrûmîrîra mataaro maku!

⁶ Nîngîrûmîrîra maathani maku monthe, ndigaacoka gûconorithua.

⁷ Nîngaagûkumia na ngoro ntheru, rîrîa ngeeruta matuîro maku ma ciira ma kîvooto.

⁸ Ngaarûmagîrîra mawatho maku; ndûkandiganîrie viû!

Kwathîkîra watho wa Ngai-Mûnene

⁹ Nî atîa mûndû mwîthî angîvota kwiga ûtûûro wake ûrî mûtheru? Nî na njîra ya kûrûmîrîra maathani maku.

¹⁰ Ngûcaragia na ngoro yakwa yonthe, ndûkandekererie ndiganîria maathani maku.

¹¹ Nîmbigîte kiugo gîaku ngororî yakwa, nîguo ndigakwîvîrie.

¹² Ûrokumua, we Ngai-Mûnene; nthomithia mawatho maku.

¹³ Nganagîrîra mbugîrîrîtie maathani maku monthe marîa ûvecanîte.

¹⁴ Nîngenagîra kûrûmîrîra maathani maku, wata ûrîa mûndû akenaga arî na ûtonga mwîngî.

¹⁵ Nînîciragia na vinya ûvoro wîgiî mawatho maku, na nînûmagîrîra njîra ciaku.

¹⁶ Nîngenagîra mawatho maku; ndikaariganîrwa nî kiugo gîaku.

Gûkena nîûndû wa watho wa Ngai-Mûnene

¹⁷ Mbîka maûndû maro nie ndungata yaku, nîguo ndûûre na nûmagîrîre maathani maku.

¹⁸ Vingûra metho makwa nîguo mone maûndû ma magegania marîa marî wathorî waku.

¹⁹ Nie nîrî mûgeni gûkû nthî; ndûkanthithe maathani maku.

²⁰ Ngoro yakwa nîîrerirîria mûno, kûmenya maathani maku vîndî cionthe.

²¹ We Ngai-Mûnene nîûgûkagia andû arîa etîi na arîa arume, acio matiganagîria maathani maku.

²² Nthengutîria irumi na inyûrûri ciao, nîûndû nînûmagîrîra kîrîra gîaku.

²³ Wana ethîrwa athani nîmavangaga maregane nanie, nie ndungata yaku ngeciragia na vinya ûvoro wîgiî mawatho maku.

²⁴ Mataaro maku nîmo mangenagia, nîmo mamvecaga kîrîra.

Îtua rîa kwathîkîra watho wa Ngai-Mûnene

²⁵ Nie nîragaragara nthî nîrî vakuvî gûkua; njokeria vinya wakwa wata ûrîa wîranîrîte.

²⁶ Rîrîa naakwîrire maûndû marîa nekîte, we nîwambîgwire; nthomithia mawatho maku.

²⁷ Ndethia gûtaûkîrwa nî mawatho maku; na nîngwîciria na vinya îgûrû rîgiî maûndû maku ma magegania.

²⁸ Ngoro yakwa nî nthiru vinya nîûndû wa kîeva, nyongerera vinya wata ûrîa wîranîrîte.

²⁹ Nthengutîria njîra cia maveeni; na nîûndû wa ûrîa wî mwaro, nthomithia watho waku.

³⁰ Nînthuurîte njîra ya wîvokeku; nînûmîrîrîte matuîro maku ma ciira.

³¹ We Ngai-Mûnene ndwîre nûmagîrîra matuîro maku ma ciira; ndûkareke njonorithue.

³² Ngaarûmagîrîra ûrîa maathani maku maugîte, nîûndû nîûmvecaga ûtaûku mwîngî.

Kûvoya ûtaûku

³³ We Ngai-Mûnene, nthomithia kwathîkîra maathani maku, na nîngaamarûmîrîra nginya mûthiia.

³⁴ Mva ûtaûku, nîguo mvote kûrûmîrîra watho waku; na nîngaaûvingia na ngoro yakwa yonthe.

³⁵ Ndongoria na njîra ya maathani maku, nîûndû nîngenaga nîmo.

³⁶ Mva wendo wa kûrûmîrîra kîrîra gîaku, ndige kûrûmîrîra ûtonga.

³⁷ Mvotithia, ndikarûmîrîre maûndû matarî vata; na ûmve mwoyo ngîthiîcaga na njîra ciaku.

³⁸ Mvingîria nie ndungata yaku kîîranîro gîaku, kîrîa wîranîrîte kûrî arîa magwîtigagîra.

³⁹ Nthengutîria kîrumi kîrîa nîîtigîrîte, nîûndû matuîro maku ma ciira nî maro.

⁴⁰ Nînîriragîria mûno kwathîkîra maathani maku; mva mwoyo, nîûndû we wî mûthingu.

Kwîvoka watho wa Ngai-Mûnene

⁴¹ We Ngai-Mûnene, tiga wendo waku ûtathiraga ûke kûrî nie, na ûmvonokie wata ûrîa weranîre.

⁴² Nîngaavota gûcokeria arîa manumaga, nîûndû nînîvokete kiugo gîaku.

⁴³ Mvotithia kwaragia ûûma vîndî cionthe, nîûndû mwîvoko wakwa ûrî matuîrorî maku ma ciira.

⁴⁴ Ngaathîkagîra watho waku vîndî cionthe, tene na tene.

⁴⁵ Nthiîcaga nîrî na wîyathi, nîûndû nîngeragia kûmenya mataaro maku.

⁴⁶ Nîngaanîrîra maathani maku kûrî athamaki, na ndigaaconoka.

⁴⁷ Nîngenaga nî maathani maku, marîa mendete.

⁴⁸ Nîndîîte maathani maku na nînîmendete, na nîngeciria ûvoro wîgiî irîra ciaku.

Kûgîa na wîtîkio wathorî wa Ngai

⁴⁹ Ririkana ûrîa wambîrîre, nie ndungata yaku, kîîranîro kîu nîgîtûmîte ngîe na mwîvoko.

⁵⁰ Rîrîa nîrî mathînarî nînyûmagîrîrua, nîûndû kîîranîro gîaku nîkîmvecaga mwoyo.

⁵¹ Arîa mataicî Ngai manyararaga vîndî cionthe, nwatî nditiganagîria watho waku.

⁵² Rîrîa ngwîciria matuîro maku ma ciira marîa maarî kuo kuuma tene, nîngîcaga na ûmîrîru, We Ngai-Mûnene.

⁵³ Nînyitagwa nî marakara meengî, rîrîa ngwona andû arîa aganu makiuna watho waku.

⁵⁴ Ndwîre minaga watho waku nîrî mûgeni gûkû nthî.

⁵⁵ We Ngai-Mûnene, nîngûririkanaga ûtukû, na ngathîkîra watho waku.

⁵⁶ Nîngîte na gîkeno, nîûndû nîmbathîkîrîte maathani maku.

Kwîrutîra kûvingia watho wa Ngai-Mûnene

⁵⁷ We Ngai-Mûnene, nîwe îgai rîakwa, nîngwîranîra kûvingia mawatho maku.

⁵⁸ Nîngûkûria na ngoro yakwa yonthe, ûmbîguîre ntha wata ûrîa wîranîrîte.

⁵⁹ Rîrîa neciria ûvoro wa mîthiîre yakwa, nîngarûrûkaga ngarûmîrîra matuîro maku ma ciira.

⁶⁰ Mvinyûraga na ndiceragîrwa, nîguo mvingie maathani maku.

⁶¹ Wana ethîrwa ndegetwe na mîtego nî andû arîa aganu, ndiriganagîrwa nî watho waku.

⁶² Mbûkagîra ûtukû gatagatî nîguo ngûkumie, nîûndû wa matuîro maku ma ciira ma ûthingu.

⁶³ Nie nîrî mûrata wa andû onthe arîa magwîtigîrîte, mûrata wa arîa mathîkagîra mawatho maku.

⁶⁴ We Ngai-Mûnene, nthî îcûrîtwe nî wendo waku ûtathiraga; nthomithia mawatho maku.

Vata wa watho wa Ngai-Mûnene

⁶⁵ Nîûmbîkîte maûndû maro, nie ndungata yaku, wata ûrîa waranîre we Ngai-Mûnene.

⁶⁶ Nthomithia ûûgî na ûmenyo, nîûndû nîmbîtîkîtie maathani maku.

⁶⁷ Mbere ya ûmverithia, nînekaga mavîtia; nwatî rîu nîmbathîkagîra kiugo gîaku.

⁶⁸ We wî mwaro na wîkaga maûndû maro! Nthomithia mawatho maku.

⁶⁹ Andû arîa etîi maragia maûndû ma maveeni mambîgiî; nwatî nie nîndûûra mvingagia matuîro maku ma ciira na ngoro yakwa yonthe.

⁷⁰ Ngoro ciao imatîte ta maguta, nwatî nie nîngenaga nî watho waku.

⁷¹ Kwonua thîna gwakwa nîkwagîrîrîte, nîûndû nîgûtûmîte menye watho waku.

⁷² Watho ûrîa wamvere, kûrî nie nî mwaro mûno gûkîra thaavu na sîlûva cionthe.

Kîvooto kîa watho wa Ngai-Mûnene

⁷³ Wanyûmbire na njara ciaku na ûkînthondeka ûguo mbîkariî, mva ûtaûku nîguo menye maathani maku.

⁷⁴ Andû arîa magwîtigagîra nîmagaakena mamona, nîûndû kiugo gîaku nîkîo kîîrîgîrîro gîakwa.

⁷⁵ Nîmbicî atî we Ngai-Mûnene, ûtucaga ciira ûrîa kwagîrîrîte, na wamverithirie nîûndû ûrî mwîvokeku.

⁷⁶ Tiga wendo waku ûtathiraga ûnyûmîrîrie, wata ûrîa wambîrîre, nie ndungata yaku.

⁷⁷ Mbîguîra ntha nîguo ndûûre, nîûndû nie nîngenagua nî watho waku.

⁷⁸ Tiga andû arîa mataicî Ngai maconoke, nîûndû maragia maûndû makwa na njîra ya maveeni, nwatî nie ngeciragia na vinya ûvoro wa mataaro maku.

⁷⁹ Tiga arîa onthe magwîtigagîra maûke kûrî nie, nîguo mamenye matuîro maku ma ciira.

⁸⁰ Tûma ngoro yakwa yathîkagîre mawatho maku, nîguo ndigaconorithue.

Îvoya rîa mûndû nîguo akûûrwe

⁸¹ Ngai-Mûnene, nî nthirîte vinya nî kwîrirîria ûvonokio waku, nwatî mbigîte mwîvoko wakwa kiugorî gîaku.

⁸² Metho makwa nî manogu nî kûroria mbetererete kîrîa wambîrîre, nîraûria atîrî, “Ûkaanyûmîrîria rî?”

⁸³ Nie ngûnjarîte ta mbooro ya ndivei îrî ndogere; kûnarî ûguo ndirî mûriganîre nî maathani maku.

⁸⁴ Nie ndungata yaku, nînyûmîrîria nginya rî? Ûkaaverithia arîa manyariraga rî?

⁸⁵ Andû arîa etîi nîmamînjîrîte marima mangwîthie kuo, andû arîa matarûmagîrîra watho waku.

⁸⁶ Maathani maku monthe nî ma ma, andû manyariraga na njîra ya maveeni; ndethia!

⁸⁷ Maratigarîtie vanini kûmbûraga, nwatî nditiganîrîtie mawatho maku.

⁸⁸ Mbîguîra ntha nîûndû wa wendo waku ûtathiraga, nîguo nûmagîrîre matuîro maku ma ciira.

Kwîvoka watho wa Ngai-Mûnene

⁸⁹ Kiugo gîaku, we Ngai-Mûnene gîtûûraga tene na tene; nîkîîvandîte waro kûu îgûrû.

⁹⁰ Wîvokeku waku ûtûûraga kûrî njiarwa cionthe; we nîwavandire nthî vandû vayo, nayo nîîkindîrîtie vo.

⁹¹ Ciûmbe cionthe itûûraga kuo nîûndû wa rîathani rîaku, nîûndû indo cionthe nî ndungata ciaku.

⁹² Kethîrwa watho waku tîguo ûtûmaga ngene, nîngîrî mûkuû nî mathîna makwa.

⁹³ Ndikaariganîrwa nî maathani maku; nîûndû nîmo matûmîte ndûûre mwoyo.

⁹⁴ Nie nîrî waku, mvonokia; nîûndû nînîrutanagîria kûrûmîrîra maathani maku.

⁹⁵ Andû arîa acûku mekaraga manîthithîrîte nîguo mambûrage, nwatî nie nîîciragia ûvoro wa mawatho maku.

⁹⁶ Nîmenyete atî maûndû monthe makinyanîru marî mûthiia wamo, nwatî maathani maku matirî mûthiia.

Kwenda watho wa Ngai-Mûnene

⁹⁷ Ûûi, kaî nîmendete watho waku-î! Ndindaga ngîîciria ûvoro waguo mûthenya mûgima.

⁹⁸ Mawatho maku nîmatûmaga ngîe na ûûgî gûkîra nthû ciakwa, nîûndû mbîthagîrwa namo vîndî cionthe.

⁹⁹ Nîrî na ûtaûku mwîngî gûkîra arimû akwa onthe, nîûndû nînîciragia na vinya ûvoro wa mataaro maku.

¹⁰⁰ Nîrî na ûtaûku mwîngî gûkîra athuuri arîa akûrû, nîûndû nîmvingagia matuîro maku ma ciira.

¹⁰¹ Nînîrigagîrîria ndikethîrwe nîrî na mîtugo mîcûku, nîguo mvingagie kiugo gîaku.

¹⁰² Ndirî mûtiganîriu matuîro maku ma ciira, nîûndû we mwene nîwe ûnthomithîtie.

¹⁰³ Kaî nî mbîgucaga ciugo ciaku irî na mûrîo-î, irî mûrîo gûkîra ûûkî.

¹⁰⁴ Na njîra ya mawatho maku, nîngîcaga na ûtaûku, kwoguo nînthûrîte njîra cionthe cia maveeni.

Ûtheri kuuma wathorî wa Ngai-Mûnene

¹⁰⁵ Kiugo gîaku nî taa îrîa îmûrîkagîra kûrîa ngûthiîra, na ûtheri wa njîra yakwa.

¹⁰⁶ Nîmbîranîrîte na mwîvîtwa na nîngindîrîtie ûndû ûcio, atî ngaarûmagîrîra matuîro maku ma kîvooto.

¹⁰⁷ We Ngai-Mûnene, nînthînîkîte mûno, mva mwoyo wata ûrîa wîranîrîte.

¹⁰⁸ We Ngai-Mûnene îtîkîra îvoya rîakwa rîa gûgûcokeria ngatho, na ûnthomithie matuîro maku ma ciira.

¹⁰⁹ Mbîthagîrwa vîndî cionthe nîrî thînarî wa gîkuû, nwatî ndiriganagîrwa nî watho waku.

¹¹⁰ Andû arîa aganu nîmandegete na mûtego, nwatî nditiganîrîtie mawatho maku.

¹¹¹ Matuîro maku ma ciira nîmo îgai rîakwa rîa tene na tene; mau nîmo matûmaga ngoro yakwa îkene.

¹¹² Nînduîte na ngoro yakwa kwathîkîra mawatho maku nginya tene na tene.

Ûgitîri ûrî wathorî wa Ngai-Mûnene

¹¹³ Nînthûrîte andû a ngoro igîrî, nwatî nîmendete watho waku.

¹¹⁴ We nîwe ngo yakwa na nîwe ûngitagîra; kiugo gîaku nîkîo kîîrîgîrîro gîakwa.

¹¹⁵ Nthengutîrani mue andû evia, nîguo mbathîkîre maathani ma Ngai wakwa.

¹¹⁶ Nyitagîrîra wata ûrîa wîranîrîte, nîguo ndûûre mwoyo, ndûkareke kîîrîgîrîro gîakwa kînjonorithie.

¹¹⁷ Ndirîrîra, nîguo mbîthîrwe nîrî mûgitîre, na ngaathîkagîra maathani maku vîndî cionthe.

¹¹⁸ Ndwîtîkagîra andû onthe arîa matiganagîria mawatho maku, wara ûcio wao mûcûku nîwa mana.

¹¹⁹ Andû onthe a nthî arîa aganu ûmatucaga ta gîko, kwoguo nie nîmendete matuîro maku ma ciira.

¹²⁰ Nînîrainaina nîûndû wa gûgwîtigîra; na nînîregua guoya wa matuîro maku.

Kwathîkîra watho wa Ngai-Mûnene

¹²¹ Nîmbîkîte maûndû magîrîru na ma kîvooto; ndûkandiganîrie kûrî arîa mamvinyagîrîria.

¹²² Îranîra atî nîûkûndethia, nie ndungata yaku; ndûkareke andû arîa etîi mamvinyîrîrie.

¹²³ Metho makwa nî manogu nî gweterera ûvonokio waku, na ûvingie ciîranîro ciaku cia ûthingu.

¹²⁴ Mbîka nie ndungata yaku kûringana na wendo waku ûtathiraga; na ûnthomithie mawatho maku.

¹²⁵ Nie nî ndungata yaku; mva ûtaûku, nîguo menye matuîro maku ma ciira.

¹²⁶ Ngai-Mûnene, gaka nî kavinda gaku ga gwîka ûndû, nîûndû andû nîmaunîte watho waku.

¹²⁷ Nie nîmendete mawatho maku gûkîra thaavu, gûkîra thaavu ntheru.

¹²⁸ Kwoguo, nînûmagîrîra mawatho maku monthe; nînthûrîte njîra cionthe itarî cia ûma.

Kwîrirîria kwathîkîra watho wa Ngai-Mûnene

¹²⁹ Matuîro maku ma ciira nî ma magegania; kwoguo nîmavingagia na ngoro yakwa yonthe.

¹³⁰ Ciugo ciaku itaûrîtwe nîiretaga ûtheri; nîivecaga ûmenyo andû arîa mataicî ûndû.

¹³¹ Njathamîtie kanyua nîrî na ngumba nene mûno, nîûndû nînîriragîria maathani maku.

¹³² Nthikîrîria na ûmbîguîre ntha, wata ûrîa wîkaga andû onthe arîa makwendete.

¹³³ Ndirîrîra ndikagwe wata ûrîa waranîre, na ndûkareke mbathwa nî ûndû wa wonthe mûcûku.

¹³⁴ Ngûûra kuuma kûrî arîa mavinyanagîrîria, nîguo mvote kûvingia mawatho maku.

¹³⁵ Tûma ûthiû waku warîre ndungata yaku, na ûnthomithie mawatho maku.

¹³⁶ Methori manyûrûrûkaga kuuma methorî makwa ta rûnjî, nîûndû andû mativingagia watho waku.

Waragania wa watho wa Ngai-Mûnene

¹³⁷ We Ngai-Mûnene, wî mûthingu, na matuîro maku ma ciira nî ma ma.

¹³⁸ Ûvecanîte mawatho maku, na njîra ya ûthingu na ya wîvokeku mwîngî.

¹³⁹ Nîmbakanagwa nî marakara, nîûndû nthû ciakwa nîiriganagîrwa nî ciugo ciaku.

¹⁴⁰ Kîîranîro gîaku nî Kîam ma viû! Nanie ndungata yaku nînîkîendete.

¹⁴¹ Nie ndirî îgweta na nîrî mûnyarare, kûnarî ûguo, ndiriganagîrwa nî mawatho maku.

¹⁴² Ûthingu waku nîwa tene na tene, na watho waku nî wa ma.

¹⁴³ Mbîcûrîtwe nî mathîna na kîeva, nwatî maathani maku nîmo gîkeno gîakwa.

¹⁴⁴ Matuîro maku ma ciira methagîrwa vîndî cionthe marî ma kîvooto; mva ûtaûku nîguo ndûûre mwoyo.

Îvoya rîa kûvonokua kuuma kûrî nthû

¹⁴⁵ Nînîragûkaîra na ngoro yakwa yonthe; mbîtîka we Ngai-Mûnene na nîngwathîkîra mawatho maku!

¹⁴⁶ Nînîragûkaîra; mvonokia, nîguo mbathîkîre mawatho maku.

¹⁴⁷ Mbûkagîra kîraûko tene mbere ya kûthamburûkana ngagûkaîra ûndethie; mbigîte kîîrîgîrîro gîakwa kûrî ciugo ciaku.

¹⁴⁸ Ûtukû wonthe ndimamaga, nîguo nîcirie ûvoro wa ciîranîro ciaku.

¹⁴⁹ We Ngai-Mûnene, nthikîrîria nîûndû wa wendo waku ûtathiraga; menyerera ûtûûro wakwa nîûndû wa ûthingu waku.

¹⁵⁰ Andû arîa mavangaga maûndû macûku ma kûnyarira nîmarakuvîvîria, acio marî kûraca na watho waku.

¹⁵¹ Nwatî we Ngai-Mûnene, wî vakuvî nanie, na maathani maku monthe nî ma ma.

¹⁵² Kuuma tene nînamenyire matuîro maku ma ciira, wamathondekire matûûre tene na tene.

Kûvoya ûtethio

¹⁵³ Roria mathîna makwa na ûmvonokie, nîûndû ndiriganagîrwa nî watho waku.

¹⁵⁴ Mbarîrîria na ûngûûre; mva mwoyo wata ûrîa waranîre.

¹⁵⁵ Andû arîa aganu matikaavonokua, nîûndû matitindanagîra na mawatho maku.

¹⁵⁶ Ntha ciaku nî nyîngî, we Ngai-Mûnene, tûma ndûûre mwoyo nîûndû wî wa kîvooto.

¹⁵⁷ Nthû ciakwa na arîa manyariraga nî eengî, nwatî nditiganagîria matuîro maku ma ciira.

¹⁵⁸ Rîrîa naroria acukanîrîri, nî ndakaraga mûno, nîûndû matiathîkagîra maathani maku.

¹⁵⁹ We Ngai-Mûnene, taroria ûrîa mendete mawatho maku, mva mwoyo kûringana na wendo waku ûtathiraga.

¹⁶⁰ Gatûûrû ga kiugo gîaku nî ûûma; matuîro maku ma ciira ma ûthingu nîmatûûra tene na tene.

Kwîrutîra kûvingia watho wa Ngai-Mûnene

¹⁶¹ Andû arîa anene manyamaragia gûtarî na gîtûmi, nwatî ngoro yakwa îtûûraga îtigîrîte watho waku.

¹⁶² Nîngenaga nî kiugo gîaku, ta mûndû wîtavîrîte ûtonga mwîngî.

¹⁶³ Nînthûrîte maveeni mûno, nwatî nîmendete watho waku.

¹⁶⁴ Ngûkumagia maita mûgwanja wa mûthenya, nîûndû wa matuîro maku ma ciira ma ûthingu.

¹⁶⁵ Andû arîa mendete watho waku marî thayû mwîngî, gûtirî ûndû ûngîmavînga.

¹⁶⁶ We Ngai-Mûnene nîmbîrîgîrîrîte kûvonokua nîwe, na nînûmagîrîra maathani maku.

¹⁶⁷ Nîmbathîkagîra matuîro maku ma ciira; nînîmendete na ngoro yakwa yonthe.

¹⁶⁸ Nî mvingagia matuîro maku ma ciira na mataaro maku, nîûndû we nîwicî mîthiîre yakwa yonthe.

Îvoya rîa gwîtia ûtethio

¹⁶⁹ Tiga gûkaya gwakwa gîkinye kûrî we, we Ngai-Mûnene! Mva ûtaûku wata ûrîa waranîre.

¹⁷⁰ Tiga mathaithana makwa makinye kûrî we; mvonokia wata ûrîa waranîre.

¹⁷¹ Ngaagûkumagia vîndî cionthe, nîûndû nîûnthomithagia mawatho maku.

¹⁷² Nîngaaina ûvoro wîgiî kiugo gîaku, nîûndû maathani maku monthe nî magîrîru.

¹⁷³ Vîndî cionthe îthagîrwa wîvarîrîtie kûndethia, nîûndû nînthuurîte kûrûmîrîra mawatho maku.

¹⁷⁴ Nîmbetererete ûvonokio waku, we Ngai-Mûnene! Nie nîngenagua nî watho waku.

¹⁷⁵ Tiga ndûûre mwoyo nîguo ngûkumagie; na ûreke matuîro maku ma ciira mandethagie.

¹⁷⁶ Mbûrûraga ta ng'ondu yûrîte; ûka ûnjarie, nie ndungata yaku, nîûndû ndiriganagîrwa nî mawatho maku.