Thaburi 116 - ÎVUKU RÎA ÛVORO MWARO

Gûcokia ngatho nîûndû wa kûvonokua kuuma gîkuûrî

¹ Nîmendete Ngai-Mûnene nîûndû nîambîgucaga, nîathikagîrîria mavoya makwa.

² Ke nîanthikagîrîria, kwoguo nîndûûra nîmûkayagîra vîndî cionthe.

³ Naarigicîrîtue nî ûgwati wa gîkuû, na ngînyitwa nî kîmako gîa kwa arîa akuû; necûrîtwe nî guoya na kîeva.

⁴ Nînacokire ngîkaîra rîîtwa rîa Ngai-Mûnene: “Ûûi Ngai-Mûnene, nakûthaitha ûmvonokie!”

⁵ Ngai-Mûnene nî mûtugi na nî mûthingu; Ngai wetû arî ntha.

⁶ Ngai-Mûnene nîagitagîra arîa matarî vinya; rîrîa naarî thînarî nîwamvonokirie.

⁷ Ngoro yakwa, gîa na thayû, nîûndû Ngai-Mûnene nîambîkîte maûndû maro.

⁸ Ngai-Mûnene nîwamvonokirie kuuma gîkuûrî na akangiria methori, na nîanyitîrîrîte ndikagwe.

⁹ Ndûûranagia na Ngai-Mûnene, vûrûrirî wa arîa marî mwoyo.

¹⁰ Nînathiîre mbere na gwîtîkia, wana rîrîa naaugire atîrî, “Nie nînthînîkîte mûno.”

¹¹ Wana rîrîa netigagîra nînaugire: “Andû onthe tî evokeku.”

¹² Nîndûî nîngîva Ngai-Mûnene, nîûndû wa maûndû monthe maro marîa ambîkîte?

¹³ Nîngaarutîra Ngai-Mûnene îtega rîa gîkombe Kîam ûvonokio, na ngaîre rîîtwa rîake nîûndû wa kûmvonokia.

¹⁴ Nîngaavingia mîvîtwa yakwa kûrî Ngai-Mûnene, andû ake onthe marî vo.

¹⁵ Gîkuû Kîam andû a Ngai-Mûnene, nî ûndû ûrî vata mbere yake.

¹⁶ We Ngai-Mûnene, nie nîrî ndungata yaku; ndungata yaku, mwana wa ndungata yaku ya mûndûmûka. We nîûnjovorete mînyororo yakwa.

¹⁷ Nîngûkûrutîra îgongoona rîa gûcokia ngatho, na ngaîre rîîtwa rîaku.

¹⁸ Nîngaavingia mîvîtwa yakwa kûrî Ngai-Mûnene, nîmîvingie andû ake onthe makîonaga,

¹⁹ arîa maûnganîte hekarûrî ya Ngai-Mûnene, gatagatîrî gaku, we Jerusalemu. Kumiani Ngai-Mûnene!