Thaburi 115 - ÎVUKU RÎA ÛVORO MWARO

Ngai ûmwe ûrîa wa ma

¹ Tî tue, we Ngai-Mûnene, tî tue, we wenga nîwe wagîrîrwe nî gûkumua; nîûndû wa wendo waku ûtathiraga na wîvokeku waku.

² Nîndûî gîtûmaga andû a ndûrîrî matûrie atîrî, “Ngai wenyu arî kû?”

³ Ngai wetû arî îgûrû; na ekaga ûrîa onaga kwagîrîrîte.

⁴ Mîvuanano ya ngai cia andû a ndûrîrî irûthîtwe na sîlûva na thaavu, irûthîtwe na njara cia andû.

⁵ Irî na tûnyua, nwatî itiaragia, irî na metho, nwatî itionaga.

⁶ Irî na matû, nwatî itiîgucaga, irî na maniûrû, nwatî itinungagîra.

⁷ Irî na njara, nwatî itivutavutagia, irî na magûrû, nwatî itithiîcaga; na itirutaga mûgambo.

⁸ Andû arîa mairûthaga mekariî ta cio, na arîa onthe maciîvokaga mekariî ta cio.

⁹ Mue andû a Isiraeli, îîvokeni Ngai-Mûnene! Nîke ûtethio wenyu na ngo yenyu.

¹⁰ Mue nyomba ya Aroni, îîvokeni Ngai-Mûnene. Nîke ûtethio wenyu na ngo yenyu.

¹¹ Mue arîa mwîtigîrîte Ngai-Mûnene, mwîvokageni. Nîke ûtethio wenyu na ngo yenyu.

¹² Ngai-Mûnene nîatûririkanaga na nîagaatûrathima, nîakaarathima nyomba ya Isiraeli, na nîakaarathima nyomba ya Aroni.

¹³ Nîakaarathima arîa mamwîtigagîra, arîa anini na arîa anene.

¹⁴ Ngai-Mûnene arotûma mwongerereke, mue na njiarwa cienyu!

¹⁵ Mûrorathimwa nî Ngai-Mûnene, ûrîa waûmbire îgûrû na nthî!

¹⁶ Îgûrû nîkwa Ngai-Mûnene arî wenga; nwatî nîwavecanire nthî kûrî andû.

¹⁷ Andû arîa akuû matikumagia Ngai-Mûnene, kana agoocwe nî arîa mathiîcaga vûrûrirî wa arîa akuû.

¹⁸ Nwatî tue arîa tûrî mwoyo, nîtûkumagia Ngai-Mûnene, kuuma rîu nginya tene na tene. Kumiani Ngai-Mûnene!