Thaburi 112 - ÎVUKU RÎA ÛVORO MWARO

Gîkeno kîa mûndû mwaro

¹ Kumiani Ngai-Mûnene! Kûrathimwa nî mûndû ûrîa wîtigîrîte Ngai-Mûnene, ûrîa ûkenaga mûno rîrîa akwathîkîra maathani make.

² Njiarwa ciake nîigaatuîka andû marî vinya vûrûrirî; njiarwa cia andû arîa arûngîrîru nîikaarathimwa.

³ Mûciî wake nîûkaagîa na ûtonga na indo nyîngî, na ûthingu wake ûtûûraga tene na tene.

⁴ Andû arîa aro, atugi, marî ntha na athingu, nîmaragîrwa nî ûtheri ndumarî.

⁵ Kûrathimwa nî mûndû ûrîa akombithanagia indo ciake na ûtaana, ûrîa wîkaga maûndû make na njîra ya kîvooto.

⁶ Mûndû ûrîa mûthingu ndakaavootwa; agaatûûra aririkanagwa tene na tene.

⁷ Ke ndetigagîra kwîgua ûndû mûcûku; wîtîkio wake nî mwîkindîriu, na evokaga Ngai-Mûnene.

⁸ Ndamakaga na ndetigagîra, nginya rîrîa akoona nthû ciake ikîvootwa.

⁹ Arutaga na ûtaana, akava andû arîa athîni; ûtaana wake ûtûûraga tene na tene; ethagîrwa na vinya na nîwîtigîrîtwe.

¹⁰ Mûndû ûrîa mwaganu onaga ûguo akarakara; arîcithanagia magego nîûndû wa ûthû akînathiî; mwîrîgîrîro wake ûtuîkaga wa mana.