Thaburi 109 - ÎVUKU RÎA ÛVORO MWARO

Îteta rîa mûndû arî thînarî

¹ We Ngai nîwe ngumagia, ndûgakire!

² Andû arîa aganu na maveenanagia nîmarantharîkîra, maragia maûndû makwa na njîra ya maveeni.

³ Maragia maûndû macûku mambîgiî, mantharîkagîra gûtarî na gîtûmi.

⁴ Wana ethîrwa nînîmendete, nîmareganaga nanie, kûnarî ûguo nînaamavoere.

⁵ Nîmekaga maûndû maro nao makandîva na maûndû macûku, nînîmendete, nwatî o nîmamenete.

⁶ Thuura mûcirithania mwaganu wa gûcirithia nthû yakwa, tiga mûmûthitangi amûvire îgootirî.

⁷ Rîrîa acirithua, nîatuîkage arî na mavîtia, gwîtetera gwake nîgûtarwe ûrî wîvia!

⁸ Ûtûûro wake nîûnyivanyivue; na mûndû wîngî oce wîra wake.

⁹ Ciana ciake ituîke cia ngoriai, nake mûka atuîke wa ndigwa!

¹⁰ Ciana ciake nîciûrûrage ikîvoyaga; na mengatwe kuuma maganjorî kûrîa matûûraga!

¹¹ Mûndû ûrîa ûmûkombithîtie kîndû, nîamûcune indo îrîa agîte nacio cionthe.

¹² Gûtikagîe na mûndû wa kûmwîguîra ntha, kana wa kûmenyerera ciana ciake cia ngoriai.

¹³ Njiarwa ciake cionthe irokua; rîîtwa rîake rîroriganîra rûciarorî rwa kaîrî.

¹⁴ Ngai-Mûnene aroririkana waganu wa methe make, na ndakarekere ng'ina mevia make.

¹⁵ Ngai-Mûnene aroririkanaga mevia mao vîndî cionthe, nwatî o maroriganîra viû gûkû nthî!

¹⁶ Mûndû ûcio ndaaririkana gûtugana, aanyaririre andû arîa maarî athîni na avatari, na arîa matakwîvota nginya akîmaûraga.

¹⁷ Ke endeete kûrumana, aronyitwa nî irumi icio! Ndeendaga kûrathimithania, wanake ndakarathimwe!

¹⁸ Kûrî ke, kûrumana nîta gwîîkîra nguo, irumi icio iromûconja mwîrî wonthe ta manjî, na itonye mavîndîrî ta maguta!

¹⁹ Irumi iromûkunîka ta nguo irîa ekagîra, na imûthiûrûrûkîrie ta mûcivi ûrîa eyovaga wa mûthenya!

²⁰ Ngai-Mûnene arorîva nthû ciakwa na maûndû mau, andû acio maragia maûndû macûku na njîra îtagîrîrîte!

²¹ Nwatî we Ngai Mwathani wakwa, ndethia nîûndû wa rîîtwa rîaku, mvonokia, nîûndû wendo waku ûtathiraga nî mwaro.

²² Nie nîrî mûthîni na nîrî ngîa; na ngurarîtue nginya ngororî.

²³ Nîrathira ta kîruru gîa kîvwaî; nîrarivarivwa ta ngige.

²⁴ Maru makwa matirî na vinya nîûndû wa kwînyerekia; ndigîtwe rûûo na mavîndî.

²⁵ Andû mamonaga makanthekerera; mamonaga makainainia ciongo ciao na kînyarari.

²⁶ Ndethia, we Ngai-Mûnene Ngai wakwa; mvonokia nîûndû wa wendo waku ûtathiraga!

²⁷ Tiga andû mamenye atî nîwe wîkîte ûguo; we Ngai-Mûnene, nîwe wîkîte ûguo.

²⁸ Tiga andû manume, nwatî we ûndathime, tiga arîa marantharîkîra maconoke, nanie, ndungata yaku, ngene.

²⁹ Nthû ciakwa nîikunîkîrwe nî nthoni ta nguo; na mekîre gîconoko ta nguo irîa mekagîra.

³⁰ Nîngaacokeria Ngai-Mûnene ngatho nyîngî mbugîrîrîtie; nîngaamûkumia kîûnganorî Kîam andû,

³¹ nîûndû nîagitagîra andû arîa athîni, na akamavonokia kuuma kûrî arîa mamatucagîra kûragwa.