Thaburi 107 - ÎVUKU RÎA ÛVORO MWARO

ÎVUKU RÎA GATANO Tha 107—150 Gûkumia wega wa Ngai

¹ “Cokeriani Ngai-Mûnene ngatho, nîûndû nî mwaro; nîûndû wendo wake ûtathiraga nîwa tene na tene!”

² Tiga arîa makûûrîtwe nî Ngai-Mûnene mauge guo, arîa avonoketie kuuma thînarî,

³ na akamacokia kuuma mavûrûrirî mageni, kuuma mwena wa îrathîro na kuuma mwena wa îthûîro, kuuma mwena wa rûgûrû na kuuma mwena wa îveti.

⁴ Amwe maaûrûraga werûrî ûtaarî kîndû, na mationa njîra îngîmavira îtûûrarî mangîtûûra.

⁵ Maarî avûtu na makanyonda, na nîmaatete mwîvoko.

⁶ Nîmaacokire magîkaîra Ngai-Mûnene marî thînarî, na akîmavonokia kuuma maûndûrî marîa maamagiaga.

⁷ Nîwamatongoririe njîrarî nûngarû, nginya magîkinya îtûûrarî rîrîa maatûûrire.

⁸ Nîmacokerie Ngai-Mûnene nîûndû wa wendo wake ûtathiraga, nîûndû wa maûndû ma magegania marîa aamekîre.

⁹ Nîûndû nîanyondoraga arîa anyondu, na andû arîa avûtu nîamavaithagia indo mbaro.

¹⁰ Andû amwe maatûûraga ndumarî marî na îvooru, marî na mînyamaaro na movetwe na mînyororo,

¹¹ nîûndû nîmaareganîte na mawatho ma Ngai, na makaira mataaro ma Ûrîa ûrî Îgûrû Mûno.

¹² Nîmaathirîte vinya nîûndû wa wîra mûrito, nîmaagwîre nthî na mationa mûndû wa kûmatethia.

¹³ Nîmaacokire magîkaîra Ngai-Mûnene marî thînarî, na akîmavonokia kuuma maûndûrî marîa maamagiaga.

¹⁴ Nîwamarutire ndumarî kûu kwarî na îvooru, na agîtucanga mînyororo yao.

¹⁵ Nîmakumie Ngai-Mûnene nîûndû wa wendo wake ûtathiraga, nîûndû wa maûndû ma magegania marîa aamekîre.

¹⁶ Ke nîaunangaga mîrango ya gîcango, na agatemanga mîkîgo ya cuuma.

¹⁷ Andû amwe maarî irimû nîûndû wa mevia mao, na makathînîka nîûndû wa maûndû mao macûku;

¹⁸ nîmaatimbirwe nî irio cia mûthemba wa wonthe, na maarî vakuvî gûkua.

¹⁹ Nîmaacokire magîkaîra Ngai-Mûnene marî thînarî, na akîmavonokia kuuma maûndûrî marîa maamagiaga.

²⁰ Nîwathanire na ûkîmavonia, na akîmavonokia matikathire.

²¹ Nîmakumie Ngai-Mûnene nîûndû wa wendo wake ûtathiraga, nîûndû wa maûndû ma magegania marîa aamekîre.

²² Nîmarute matega ma kûmûcokeria ngatho, na mauge ûrîa ekîte na nyîmbo makenete.

²³ Andû amwe nîmaathiîrîre îriarî na meri, makîrutaga wîra wa kwendia na kûgûra kûu îriarî.

²⁴ Nîmoonire ciîko cia Ngai-Mûnene, maûndû ma magegania marîa eekire kûu îriarî.

²⁵ Nîwathanire, na rûkûngi rûnene rûkîvurutana, rûgîtûma makûmbî ma manjî îriarî maûkîrîre.

²⁶ Meri ciaikagua na îgûrû, igacoka igaikua kûrîa kûriku, ûmîrîru wao nîwathirîre kûu ûgwatirî ûcio.

²⁷ Maavîngirwe na magîtûgûgana ta mîrîu, na makîthirîrwa nî wara wa gwîtethia naguo.

²⁸ Nîmaacokire magîkaîra Ngai-Mûnene marî thînarî, na akîmavonokia kuuma maûndûrî marîa maamagiaga.

²⁹ Nîwatûmire rûkûngi rûrîa rwavurutanaga rûvorera, na makûmbî ma manjî îriarî magîkira.

³⁰ Nîmaacokire magîkena nîûndû nîkwavoorere, na Ngai-Mûnene nîwamakinyirie varîa meendaga meri irûngame.

³¹ Nîmakumie Ngai-Mûnene nîûndû wa wendo wake ûtathiraga, nîûndû wa maûndû ma magegania marîa aamekîre.

³² Nîmanîrîre ûnene wa Ngai-Mûnene marî varîa andû maûnganîte, na mamûkumie marî varîa atongoria magomanîte.

³³ Nîagarûraga nyûnjî igatuîka werû, na akanyaria kûrîa kûtherûkaga manjî.

³⁴ Nîatûmaga mûthetu ûrîa mûnoru ûtuîke werû wa cumbî, nîûndû wa waganu wa andû arîa matûûraga kuo.

³⁵ Nîagarûraga werû ûgatuîka maria ma manjî, na nthî nyûmû îkatherûka manjî.

³⁶ Nîatûmaga andû arîa avûtu matûûre kuo, na magatuma îtûûra kûrîa magaatûûraga.

³⁷ Nîmaarîmire mîgûnda makîvanda mîthavibu, na nîmagîcaga maketha meengî.

³⁸ Nîwarathimire andû ake na makîongerereka mûno, na agîtûma ndîthia yao ya ng'ombe yongerereke.

³⁹ Rîrîa maanyivanyivire na makîthirua vinya na njîra ya kûvinyîrîrua na kûthînua,

⁴⁰ nîwanyararire atongoria arîa maamavinyagîrîria, na agîtûma maûrûre werûrî kûndû gûtarî njîra.

⁴¹ Nwatî nîwavonokirie arîa ngîa kuuma mathînarî mao, na agîtûma andû a nyomba yao mongerereke ta ndîthia ya ng'ondu.

⁴² Andû arîa athingu monaga ûguo magakena, nwatî arîa onthe aganu nîmakiraga mona ûguo.

⁴³ Andû arîa aûgî nîmecirie ûvoro wa maûndû mama, na maririkane wendo ûtathiraga wa Ngai-Mûnene.