Thaburi 106 - ÎVUKU RÎA ÛVORO MWARO

Wega wa Ngai kûrî andû ake

¹ Kumiani Ngai-Mûnene! Kumiani Ngai-Mûnene nîûndû nî mwaro; nîûndû wendo wake ûtathiraga ûtûûraga tene na tene.

² Nîûrîkû ûngîtaarîria maûndû manene marîa Ngai-Mûnene ekîte? Nîûrîkû ûngîvota kûmûkumia ûrîa kwagîrîrîte?

³ Kûrathimwa nî arîa marûmagîrîra kîvooto, arîa mekaga maûndû ma ûthingu vîndî cionthe.

⁴ We Ngai-Mûnene, ûndirikane ûgîka andû aku maûndû maro; ûndirikane ûkîvonokia andû aku,

⁵ nîguo monage andû aku makîgîa na ûtûûro mwaro, nîguo ngenanagîre na vûrûri waku, na ngaakenanîra na andû aku.

⁶ Tue nîtwîvîtie wata ûrîa methe metû ma tene meevirie, nîtwîvîtie na nîtwîkîte maûndû macûku.

⁷ Rîrîa methe metû maarî Misiri, matiataûkîrwa nî ciîko cia magegania irîa Ngai eekire, matiaririkana ûrîa aamoonirie wendo ûtathiraga maita meengî, nwatî nîmaareganire na ûrîa ûrî Îgûrû Mûno marî îriarî îtune.

⁸ Kûnarî ûguo nîwamavonokirie wata ûrîa eeranîrîte, nîguo onanie vinya wake mûnene.

⁹ Nîwathire îria îtune rînyaare, na rîkînyaara, aavîtûkîrîrie andû ake îriarî takwa marî nthî nyûmû.

¹⁰ Kwoguo nîwamavonokirie kuuma kûrî nthû ciao, na akîmakûûra kuuma kûrî vinya wa nthû ciao.

¹¹ Nthû ciao nîciaûrîre manjîrî, na gûtirî wanarî ûmwe wao watigarire.

¹² Andû a Isiraeli nîmaacokire magîtîkia ciugo ciake, na makina nyîmbo cia kûmûkumia.

¹³ Nwatî nîmaariganîrwe nî ciîko cia Ngai wa rîo, na makîrega gweterera ûtaari wake.

¹⁴ Marî werûrî nîmecûrirwe nî ngumba nene ya irio, na makîgeria Ngai marî kûu werûrî.

¹⁵ Nîwamavere kîrîa meetirie, nwatî nîwatûmire manyitwa nî mûrimû mûcûku.

¹⁶ Marî kûu werûrî nîmeguîrîre Musa wîru, na Aroni, ndungata ntheru ya Ngai-Mûnene.

¹⁷ Nthî nîyavingûkire na îkîmeria Dathani, na îkîthika Abiramu na arûmîrîri ake.

¹⁸ Mwaki nîwaumîrîre arûmîrîri ao, na ûkîvîvia andû acio aganu.

¹⁹ Nîmaarûthire karegwa marî kîrîmarî gîa Sinai, na makîgooca mûvuanano ûcio.

²⁰ Maatigire kûgooca Ngai ûrîa ûrî riiri, na makîambîrîria kûgooca mûvuanano wa ndegwa îrîa îrîcaga nyaki.

²¹ Maariganîrwe nî Ngai ûrîa wamavonokirie, ûrîa wekîte maûndû manene vûrûrirî wa Misiri.

²² Nîwekire maûndû ma magegania vûrûrirî wa Misiri, na maûndû ma kûmakania îriarî Îtune.

²³ Ngai nîangîathiririe andû ake, tiga nî Musa, ndungata îrîa aathuurîte waririe nake, na akîrigîrîria ndakamathirie nîûndû wa marakara make.

²⁴ Nîmaacokire makînyarara vûrûri ûcio mwaro, nîûndû matietîkia ûrîa Ngai aamerîrîte.

²⁵ Nîmaanugunire marî magemarî mao, na matiathîkîra Ngai-Mûnene.

²⁶ Kwoguo Ngai-Mûnene nîwevîtire na ma, akiuga atî nîagaatûma makuîre werûrî.

²⁷ Nîakaanyagania njiarwa ciao mavûrûrirî marîa mengî, na makuîre mavûrûrirî mageni.

²⁸ Nîmaacokire magîtuîka arûmîrîri a Baali marî Peori, na makîrîa magongoona marîa maarutîrîtwe mîvuanano îtarî mwoyo.

²⁹ Ciîko ciao nîciatûmire Ngai-Mûnene arakare, na makînyitwa nî mûrimû mûcûku.

³⁰ Nwatî Finehasi nîwaverithirie andû arîa maarî na mavîtia, na mûrimû ûcio mûcûku ûkîthira.

³¹ Ûndû ûcio nîwatûmire aririkanagwe ta mûndû mûthingu, kuuma vîndî îo nginya tene na tene.

³² Nîmaarakaririe Ngai-Mûnene marî ithimarî cia Meriba, na Musa nîwanyitirwe nî thîna nîûndû wa ûrîa meekire.

³³ Nîmaatûmire Musa ecûrwe nî ûrûrû ngororî, na akîaria atambîte gwîciiria.

³⁴ Andû a Isiraeli nîmaaregire kûraga andû a ndûrîrî, ta ûrîa Ngai-Mûnene aamaathîte meke.

³⁵ Nwatî nîmaanyitanîre na andû a ndûrîrî, na makîambîrîria gwîka tao.

³⁶ Nîmaagoocire mîvuanano ya ngai ciao, na ûndû ûcio nîguo watuîkire mûtego wa kûmathiria.

³⁷ Nîmaarutire anake na erîtu ao marî magongoona kûrî mîvuanano ya Kanaani.

³⁸ Nîmeetûrûrire nthakame ya andû mataarî na mavîtia, nthakame ya anake na erîtu ao; arîa maarutire marî magongoona kûrî mîvuanano ya Kanaani, naguo vûrûri ûkîgwatwa nî mûgiro nîûndû wa nthakame îo.

³⁹ Ûguo nîguo maatuîkire andû matarî atheru, na magîtuîka andû matarî evokeku kûrî Ngai nîûndû wa ciîko ciao.

⁴⁰ Kwoguo Ngai-Mûnene nîwarakarirue nî andû ake; nîwatimbirwe nî andû ake ke mwene.

⁴¹ Nîwamarekererie kûrî andû a ndûrîrî, na magîcoka kwathwa nî nthû ciao.

⁴² Nthû ciao nîciamavinyîrîrie, magîtuîka ndungata ciao na vinya.

⁴³ Maita meengî Ngai-Mûnene nîwamatethûrire, nwatî nîmaatwire maregane nake, na makîthiî na mbere gwîka maûndû macûku.

⁴⁴ Kûnarî ûguo, Ngai nîwonire mathîna mao, rîrîa eegwire kîrîro Kîamo.

⁴⁵ Nîwaririkanire kîrîkanîro gîake nîûndû wao, na akîricûkwa nîûndû wa wendo wake mwîngî ûrîa ûtathiraga.

⁴⁶ Ngai-Mûnene nîwatûmire arîa maamavinyagîrîria mameguîre ntha.

⁴⁷ We Ngai-Mûnene Ngai wetû, tûvonokie, tûcokanîrîrie vamwe kuuma mavûrûrirî, nîguo tûcokagie ngatho na tûkumagie rîîtwa rîaku rîtheru.

⁴⁸ Ngai-Mûnene, Ngai wa Isiraeli arokumua; arokumua tene na tene! Andû onthe nîmauge, “Ameni!”