Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Thaburi 105 - ÎVUKU RÎA ÛVORO MWARO


Ngai na andû ake
( 1Maû 16.8-22 )

1 Cokeriani Ngai-Mûnene ngatho, anîrîrani ûnene wake; menyithiani andû a nthî ûrîa ekîte.

2 Mwinîreni, mwinîreni nyîmbo cia kûmûkumia; menyithaniani maûndû ma magegania marîa ekîte.

3 Kenani nîûndû wa rîîtwa rîake, arîa onthe magoocaga Ngai-Mûnene nîmakene.

4 Cariani ûtethio kuuma kûrî Ngai-Mûnene, mûgoocageni vîndî cionthe.

5 Ririkanani maûndû ma magegania marîa eekire, ciama ciake na ûrîa aaririe ûvoro wa gûtucanîra ciira.

6 Mue njiarwa cia Iburahimu ndungata yake, mue njiarwa cia Jakovu, andû arîa athuurîte!

7 Ke nîke Ngai-Mûnene Ngai wetû; matuîro make ma ciira marî nthî yonthe.

8 Ke atûûraga aririkanaga kîrîkanîro gîake tene na tene, avingagia ciîranîro ciake kûrî njiarwa ngiri na ngiri.

9 Nîavingagia kîrîkanîro kîrîa aarûthire na Iburahimu, maûndû marîa erîîre Isaka na mwîvîtwa.

10 Ngai-Mûnene nîwathondekire kîrîkanîro na Jakovu, Kîam gûtûûra tene na tene.

11 Aaugire atîrî, “Nîngaakûva vûrûri wa Kanaani, na nîûgaatuîka îgai rîaku.”

12 Vîndî îo andû a Ngai maarî anini, matiarî na îgweta, na maarî ageni vûrûrirî wa Kanaani.

13 Maaûrûraga kuuma vûrûrirî ûmwe kûthiî wîngî, kuuma ûthamakirî ûmwe kûthiî wîngî.

14 Ngai ndeetîkîra mavinyîrîrua nî mûndû, nîwakaanagia athamaki nîguo agitîre andû ake.

15 Ameera atîrî, “Mûtikavutie andû arîa nyamûrîte, mûtigeke arathi akwa ûndû mûcûku.”

16 Ngai-Mûnene nîwatûmire kûgîe na yûra vûrûrirî wao, na agîcûkangia irio ciao cionthe.

17 Nwatî nîwavirire mûndû ûmwe mbere yao, Josefu, ûrîa wendetue arî ngombo.

18 Maamwovire magûrû na mînyororo, na akîovwa ngingo na mînyororo,

19 nginya rîrîa maûndû marîa aaugîte maavingire, kiugo Kîam Ngai-Mûnene nîkîamwîkîrire vinya.

20 Mûthamaki wa Misiri nîwathanire arekererue, mûnene wa mavûrûri nîwamûrekererie.

21 Nîwamûtwire mûrûngamîrîri wa mûciî wa mûthamaki, na mûnene wa indo ciake cionthe,

22 nîguo atongoragie anene ake wa ûrîa angîenda, na ataarage atongoria a mûthamaki.

23 Isiraeli nîwacokire akîthiî Misiri, Jakovu nîwatuîkire mûgeni vûrûrirî wa Hamu.

24 Ngai-Mûnene nîwatûmire andû ake maciarane mûno, na agîtûma magîe vinya gûkîra nthû ciao.

25 Nîwatûmire andû a Misiri mamene andû ake, andû a Misiri makîveenereria andû a Ngai-Mûnene.

26 Nîwacokire agîtûma ndungata yake Musa, na Aroni ûrîa aathuurîte.

27 Nîmaaringire ciama cia Ngai gatagatîrî ka andû a Misiri, na makîringa ciama kûu vûrûrirî wa Hamu.

28 Ngai nîwatûmire vûrûri ûgîe nduma, andû a Misiri nîmaaregire kwathîkîra watho wake.

29 Nîwagarûrire nyûnjî ciao igîtuîka nthakame, na akîûraga nthamaki ciao cionthe.

30 Vûrûri wao nîwecûrirwe nî ciûra, wana mûciî kwa mûthamaki ûgîcûrwa nîcio.

31 Ngai aathanire na gûkîgîa ngi nyîngî mûno, na vûrûri wonthe nîwecûrirwe nî rwagî.

32 Îthenya rîa mbura, aamaurithîrie mbura ya mbembe, na mveni ciamûrîkaga vûrûri wao wonthe.

33 Nîwacûkangirie mîthavibu na ya mîkûyû yao, na akiunanga mîtî yonthe vûrûrirî wao.

34 Ngai aathanire na gûgîûka ngige, ciana cia ngige itangîatarîkire;

35 ciarîîre mîmera yonthe îrîa yarî vûrûrirî, na ikîrîa irio ciao cionthe.

36 Nîwaûragire marikithathi monthe ma anake vûrûrirî wao, marikithathi monthe ma mîciî ya andû a Misiri.

37 Nîwacokire agîtongoria andû a Isiraeli makiuma kuo; maathiîre makuuîte sîlûva na thaavu, na gûtirî wanarî ûmwe wao warî na wonje.

38 Andû a Misiri nîmaakenire rîrîa andû a Isiraeli maathiîre, nîûndû nîmaametigagîra.

39 Ngai nîwatambûrûkirie îtu îgûrû rîa andû ake, na mwaki wa kûmamûrîkîra ûtukû.

40 Nîmeetirie irio, na Ngai akîmatûmîra tûthirimûkû, akîmava irio nyîngî kuuma îgûrû.

41 Nîwatûrire îthiga na manjî makiuma kuo, maanyûrûrûkire werûrî ta rûnjî.

42 Nîwaririkanire kîrîkanîro gîake kîtheru, kîrîa eerîre ndungata yake Iburahimu.

43 Kwoguo nîwatongoririe andû ake makiuma vûrûrirî, andû ake maaumire kuo makinaga marî na gîkeno.

44 Nîwamavere mîgûnda ya mavûrûri ma andû engî, na makîîgwatîra mîgûnda ya andû arîa maatûûraga kuo,

45 nîguo andû ake makaathîkîra mawatho make, na kûvingia maathani make. Kumiani Ngai-Mûnene!

©Bible Society of Kenya, 2019

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ