Thaburi 104 - ÎVUKU RÎA ÛVORO MWARO

Rwîmbo rwa gûkumia mûmbi

¹ Ngoro yakwa, kumia Ngai-Mûnene! We Ngai-Mûnene, Ngai wakwa, kaî wî mûnene-î! We wîkîrîte gîtîîo na riiri,

² wîkunîkîrîte na ûtheri ta nguo, ûtambûrûkîtie îgûrû ta îgema,

³ ûtumîte mûciî waku îgûrû rîa manjî ma îgûrû. Ûtuîte matu gîkaari gîaku gîa gûkuucua, na ûthiîcaga ûtûîte mathagurî ma rûkûngi.

⁴ Ûtûmagîra ngûngi irî ta anjaama aku, na ûgatûmîra mwaki na nînîmbî ciaguo ta ndungata ciaku.

⁵ Nîwe wavandire nthî waro îgûrû rîa mîcingi wayo, na ndîkenyenyeka tene na tene.

⁶ Wamîkunîkire na îria ta mûndû ekunîkîrîte na nguo, namo manjî magîkunîkîra irîma.

⁷ Rîrîa wagûkirie manjî, nîmaaûrire, rîrîa meegwire mûrurumo waku nîmaaûrire na îvenya.

⁸ Nîmaanyûrûrûkire kuuma irîmarî na makîthiî ciandarî, nîmaathiîre kûrîa wamathondekerete.

⁹ Nîwathondekere manjî mîtaro îrîa matangîvîtûka, nîguo matigakunîkîre nthî rîngî.

¹⁰ Nîûtûmaga manjî matherûke ciandarî, na nyûnjî ikanyûrûrûka gatagatî ka irîma.

¹¹ Nîivecaga nyamû cionthe cia kîthaka manjî, nyûmbû inyunyaga manjî nyûnjîrî icio na ikanyondoka.

¹² Iconi itumaga ciomba ciacio mîtîrî îrîa îrî vakuvî na nyûnjî icio, ciûmbaga mvûarî cia mîtî îo na ikaina.

¹³ Nîûtûmaga mbura kuuma îgûrû yure irîmarî, nayo nthî îgecûrwa nî irathimo ciaku.

¹⁴ Nîûtûmaga nyaki îkûre nîûndû wa ng'ombe, na mîmera nîguo andû mamîtûmîre, nîguo magîcage na irio kuuma nthî,

¹⁵ na ndivei ya kûmacanjamûra, maguta ma ndamaiyû ma kûmûkenia, na irio cia gûtûma agîe na vinya.

¹⁶ Mîtî mînene ya Ngai-Mûnene nîgîcaga na manjî ma kwîgana, mîtarakwe ya Lebanoni îrîa ke aavandire.

¹⁷ Iconi nîitumaga ciomba ciacio mîtîrî îo; ngune nîitumaga ciomba ciacio mîtîrî ya mîthithinda.

¹⁸ Ngûrûngû itûûraga irîmarî irîa ndaca na îgûrû, namo mathiiî methithaga makurungurî.

¹⁹ We waûmbire mweri nîguo ûthimage mavinda; narîo riûa nîrîmenyaga îvinda rîa kûthûa.

²⁰ Ûtûmaga nduma yûke, na gûgatuka, nacio nyamû cionthe cia kîthaka ikaumîra.

²¹ Ciana cia mînyambû iraramaga rîrîa îkûguîma, cietagîrîra nîguo Ngai aive gîa kûrîa.

²² Rîrîa riûa rîaratha, nîicokaga kûrîa ciîkaraga, ikathiî kûmama imamorî ciacio.

²³ Mûndû nîacokaga akathiî kûruta wîra wake, na arutaga wîra wake nginya kîvwaî.

²⁴ We Ngai-Mûnene, nîwîkîte maûndû meengî mûno! Wathondekire monthe na ûûgî! Nthî îcûrîte ciûmbe ciaku.

²⁵ Kûrîa kûrî na îria rînene na rîariî, kûrîa gûtûûraga ciûmbe itangîtarîka, ciûmbe irî mwoyo, nene na nini.

²⁶ Kûu nîkuo meri ithiîcagîrîra, na Leviathani, kîûmbe kîrîa kînene waûmbire kîthakagîre kuo.

²⁷ Ciûmbe cionthe nîwe cietagîrîra, nîguo ûive irio îvinda rîrîa rîagîrîru.

²⁸ Irîcaga wa kîrîa kîonthe ûivecaga, rîrîa wakûnjûra njara yaku, irîcaga na ikavaa.

²⁹ Rîrîa waitiganîria nîciîgucaga guoya, waruta mîvevû ya cio, nîikucaga igacoka rûkûngûrî kûrîa ciaumire.

³⁰ Rîrîa waicokeria mîvevû yaku, nîigîcaga na mwoyo rîngî, we nîûtûmaga nthî îgîe na ûtûûro mûcerû.

³¹ Riiri wa Ngai-Mûnene ûrotûûra tene na tene, Ngai-Mûnene arokenua nî wîra wake ke mwene!

³² Aroragia nthî îkainaina, anyitaga irîma ikauma ndogo.

³³ Nîndûûra minagîra Ngai-Mûnene ûtûûrorî wakwa wonthe, nîndûûra ngumagia Ngai wakwa vîndî yonthe ya ûtûûro wakwa.

³⁴ Ngai-Mûnene arokenua nî meciria makwa, nîûndû gîkeno gîakwa kiumaga varî ke.

³⁵ Evia onthe marothirua gûkû nthî, na andû arîa aganu mathire viû! Ngoro yakwa kumia Ngai-Mûnene! Kumiani Ngai-Mûnene!