Thaburi 103 - ÎVUKU RÎA ÛVORO MWARO

Wendo wa Ngai

¹ We ngoro yakwa, kumia Ngai-Mûnene, mwoyo wakwa wonthe nîûkumie rîîtwa rîake rîtheru.

² We Ngoro yakwa, kumia Ngai-Mûnene, ndûkariganîrwe nî maûndû maro marîa ekîte.

³ Nîke ûndekagîra mevia monthe, na akamvonia mîrimû yakwa yonthe.

⁴ Nîke ûmvonokagia kuuma kûrî gîkuû, akamonia wendo ûtathiraga na ntha.

⁵ Nîke ûmvecaga indo mbaro ûtûûrorî wakwa, nîguo mbîkarage nîrî mwîthî na nîrî na vinya ta nderi.

⁶ Ngai-Mûnene atucaga ciira na kîvooto, na akonania waragania kûrî arîa avinyîrîrie.

⁷ Nîwamenyithirie Musa maûndû marîa aavangîte gwîka, nîwonirie andû a Isiraeli ciîko ciake.

⁸ Ngai-Mûnene arî ntha na nî mûtugi, ndarakaraga na îvenya na ecûrîtwe nî wendo ûtathiraga.

⁹ Ndagaatûgûkagia vîndî cionthe, kana atûûra arakarîte tene na tene.

¹⁰ Ndatûverithagia kûringana na mevia metû, kana atûrîvia kûringana na mavîtia metû.

¹¹ Nîûndû ta ûrîa îgûrû na nthî iracavanîrîrîtie, nwaguo wendo wake ûtathiraga ûrî mwîngî kûrî arîa mamwîtigîrîte.

¹² Taûrîa îrathîro na îthûîro iracavanîrîrîtie, nwaguo atûthengutagîria mevia metû kuuma kûrî tue.

¹³ Taûrîa ciana ciîgucagîrwa ntha nî îthe, nwaguo Ngai-Mûnene egucagîra arîa mamwîtigîrîte ntha.

¹⁴ Nîûndû nîaicî ûrîa tûmbîtwe; nîaicî atî tûrî rûkûngû.

¹⁵ Nwatî, ûtûûro wa mûndû wîkariî ta nyaki, akûraga ta maûa marî mûgûndarî;

¹⁶ rûkûngi rûcokaga rûkamavuruta makathira, na gûtirî mûndû ûcokaga kûmona rîngî.

¹⁷ Nwatî wendo ûtathiraga wa Ngai-Mûnene, ûtûûraga tene na tene, kûrî arîa onthe mamwîtigagîra, na ûthingu wake ûtûûraga kûrî njiarwa cionthe,

¹⁸ cia andû arîa mathîkagîra kîrîkanîro gîake, na maririkanaga kûvingia maathani make.

¹⁹ Ngai-Mûnene nîaigîte gîtî gîake Kîam ûthamaki kûu îgûrû, ke nî mûthamaki wa indo cionthe.

²⁰ Kumiani Ngai-Mûnene, mue araika arîa anene na marî vinya, mue mwathîkagîra watho wake na mwîkaga ûrîa augîte.

²¹ Kumiani Ngai-Mûnene, mue ciûmbe cionthe cia îgûrû, mue ndungata ciake irîa ciîkaga wendi wake.

²² Kumiani Ngai-Mûnene, mue ciûmbe ciake cionthe; mûkumieni mûrî kûrîa kuonthe athanaga. We ngoro yakwa, kumia Ngai-Mûnene!