Nthi 31 - ÎVUKU RÎA ÛVORO MWARO

Ûtaari kûrî Mûthamaki

¹ Ino nîcio ciugo cia Lemueli, mûthamaki wa Masa irîa aathomithirue nî ng'ina:

² “Mwana wakwa nîngwîra atîa? Mwana wa nda yakwa nîngwîra atîa? Mwana ûrîa navoire Ngai akîmva nîngwîra atîa?

³ Ndûkathirie vinya waku na aka, ndûkavecane ûtonga waku kûrî andû acio macûkangagia athamaki.

⁴ Tathikîrîria Lemueli, athamaki matiagîrîrwe nî kûnyua ndivei, kana athani merirîrie kûnyua njovi.

⁵ Mangînyua, nîmariganagîrwa nî mawatho, na makariganîrwa nî ivooto cia arîa matarî vinya.

⁶ Njovi ndûrû îkundagua andû arîa marî vakuvî gûkua, nayo ndivei îkundagua andû arîa mecûrîtwe nî kîeva.

⁷ Tiga manyue nîguo mariganîrwe nî ûthîni wao, matigacoke kûririkana rîngî mathîna mao.

⁸ “Aragîrîria andû arîa matangîvota kwîyarîrîria, na waragîrîrie ivooto cia arîa matarî na vinya.

⁹ Maragîrîrie na ûtwithanagie ciira na kîvooto, menyagîrîra ivooto cia arîa athîni na arîa marî na ûvatari.”

Mûndûmûka Mwaro

¹⁰ Mûndûmûka mwaro angiuma kû, arî goro gûkîra mathaga.

¹¹ Mûthuuriwe nîamwîvokete, mûthuuriwe nîonaga umithio kuumana nake tene na tene.

¹² Ndekaga mûthuuriwe maûndû macûku, ûtûûrorî wake wonthe ekaga mûthuuriwe maûndû maro.

¹³ Acaragia guoya na itambaa irîa mbaro na nîarutaga wîra na kîîo.

¹⁴ Ta ûrîa meri cia andû arîa magûraga na makendia indo ciîkaga, nîguo mûndûmûka mwaro acaragia irio ciake kuuma kûraca.

¹⁵ Aûkagîra tene gûtarî kûrathamburûkana, akarugîra andû ake irio, na akava ndungata ciake wîra.

¹⁶ Eciragia kûgûra mûgûnda na akaûgûra, na nîatûmagîra mbeca irîa athûkûmîte kûvanda mîtî ya mîthavibu.

¹⁷ Evaragîria kûruta wîra wake na vinya, na akaûruta na kîîo.

¹⁸ Nîamenyaga atî wîra wake ûrî umithio, arutaga wîra nginya ûtukû na taa.

¹⁹ Okothaga ndigi na njara ciake, na agatuma nguo ciake na ndigi icio.

²⁰ Nîavecaga andû arîa athîni, na nîatethagia arîa marî na ûvatari.

²¹ Ndegucaga guoya vîndî ya mvevo, nîûndû ethagîrwa atumîrîte andû a mûciî wake nguo cia ûrugarî.

²² Atumaga nguo cia kwara ûrîrî, na ekagîra nguo mbaro cia rangi wa njambarawe.

²³ Mûthuuriwe nîavecagwa gîtîîo rîrîa marî na athuuri arîa engî, rîrîa marî na athuuri arîa engî a îtûûra.

²⁴ Mûndûmûka mwaro atumaga nguo mbaro na agaciendia, na nîendagia mîcivi kûrî andû arîa magûraga na makendia indo.

²⁵ Nîakumagua nîûndû wa vinya na gîtîîo gîake, na ndetigagîra mavinda marîa magaaûka.

²⁶ Aragia na ciugo irî na ûûgî, na nîataaraga andû arîa engî arî na wendo.

²⁷ Mûndûmûka mwaro nîamenyagîrîra mûciî wake waro, ndethagîrwa arî kîgûûta.

²⁸ Ciana ciake nîimûcokagîria ngatho, wana mûthuuriwe nîamûkumagia.

²⁹ Augaga atîrî, “Aka eengî nîmekîte maûndû maro, nwatî we nîûmakîrîte onthe.”

³⁰ Ûgemu nîûveenanagia, na ûthaka nîûthiraga, nwatî mûndûmûka wîtigîrîte Ngai-Mûnene nîakumagua.

³¹ Nîakenagîre maciaro ma wîra wake, na wîra wake ûtûmage akumue nî andû onthe.