Nthi 27 - ÎVUKU RÎA ÛVORO MWARO

¹ Ndûgetîîe nîûndû wa ûrîa ûgeeka rûyû, nîûndû ndwîcî gûkethîrwa gwîkariî atîa.

² Nîkava ûkumue nî andû arîa engî, gûkîra gwîkumia we mwene.

³ Îthiga na mûthanga nî ndito, nwatî thîna ûrîa ûngîretwe nî mûndû kîrimû nî mûrito makîria.

⁴ Marakara na mang'ûrîka nîkwa macûkangagia, nwatî wîru nîûcûkangagia makîria.

⁵ Nîkava mûndû agîkûruta mavîtia andû onthe makîgucaga, gûkîra mûndû ûrîa ûkûthithaga wendo wake.

⁶ Nîkava kûrutwa mavîtia nî mûrata wa ma, gûkîra kûmumunywa nî nthû rîrîa îrakûveenia.

⁷ Mûndû ûrîa ûrîte akavaa wana ûûkî nwa aûrege, nwatî mûndû arî mûvûtu egucaga wana irio irîa njûku irî na mûrîo.

⁸ Mûndû ûrîa ûtiganagîria mûciî wake, ekariî ta gîconi kîrîa kîûrûraga gîgatiganîria kîomba gîa kîo.

⁹ Maguta na mînyamû mînungi waro nîîkenagia mûndû, nwatî thîna nîûcûkangagia mûndû.

¹⁰ Ndûkariganîrwe nî mûrata waku kana mûrata wa aguo. Ndûgetie ûtethio kuuma kûrî andû a nyomba yaku vîndî ya thîna. Nîkava mûndû ûrîa mûtûûranîrîte nake gûkîra mûrwanyûkwe ûrîa ûrî kûraca.

¹¹ Mwana wakwa, gîa na ûûgî nîguo ngene, na ngîe na ûndû wa gûcokeria arîa manumaga.

¹² Mûndû mûûgî onaga thîna îgîûka akamîûrîra, nwatî mûndû mûritu eviraga thînarî akanyitwa nîguo.

¹³ Oca nguo ya mûndû ûrîa ûrûngamîrîrîte mûndû mûgeni nîûndû wa thirî, na wîkare nayo nginya rîrîa mûndû ûcio mûgeni akaarîva thirî ûcio.

¹⁴ Mûndû ûrîa ûramûkagia mûndû wîngî kîraûko augîrîrîtie, andû arîa engî mocaga ûndû ûcio ûrî kîrumi.

¹⁵ Mûndûmûka wa ngarari ekariî ta mbura îkiura îtagûkîa.

¹⁶ Kûmûgiria anegena nîta kwovera rûkûngi, kana gûkumbatîria maguta ma ndamaiyû na ngundi.

¹⁷ Mûndû aûvîgagua nî mûndû ûrîa wîngî, ta ûrîa cuuma înooraga îrîa îngî.

¹⁸ Mûndû ûrîa ûmenyagîrîra mûtî wa mûkûyû nîarîcaga matunda ma guo, nake mûndû ûrîa ûgitagîra mwathi wake nîakaavewa gîtîîo.

¹⁹ Mûndû angîcûthîrîria manjîrî onaga ûthiû wake, na meciria ma mûndû monanagia ûrîa ekariî.

²⁰ Kwa arîa akuû gûtiîcûraga, wana metho ma mûndû matiîganagia kwona.

²¹ Sîlûva na thaavu itheragua na mwaki, na mûndû amenyekaga na ngumo yake.

²² Wana ûgakima kîrimû na ndîrî ta mbembe, ndûngîruta ûrimû ndaarî yakîo.

²³ Rîthagia ndîthia ciaku waro, na ûmenyagîrîre ng'ondu na mbûri ciaku waro;

²⁴ nîûndû ûtonga ndûtûûraga tene na tene, wana ûthamaki ndûtûûraga tene na tene.

²⁵ Rîrîa watema nyaki ya kûrîthia na wamiga, thiî ûgateme nyaki irîmarî vîndî îrîa nyaki îrakûra rîngî.

²⁶ Ng'ondu nîigaakûva guoya wa nguo ciaku, na wendie mbûri ciaku wone mbeca cia kûgûra mîgûnda.

²⁷ Mbûri nîigaakûva îriia rîa gûkwîgana vamwe na nyomba yaku, na rîa ndungata ciaku cia aka.