Nthi 19 - ÎVUKU RÎA ÛVORO MWARO

¹ Nîkava mûndû ethîrwe arî mûthîni na arî mwîvokeku, gûkîra mûndû waragia maveeni na arî kîrimû.

² Tî waro gwîka ûndû ûtambîte gwîciiria, nginya kavora ndiunîkaga îvîndî.

³ Mûndû angîîcûkangia nîûndû wa ûrimû wake, acokaga kûrakarîra Ngai-Mûnene.

⁴ Ûtonga ûtûmaga mûndû agîe na arata vîndî cionthe, nwatî athîni nîmatigagwa nî arata ao.

⁵ Mûndû ûrîa ûrutaga ûira wa maveeni nîakaaverithua, na mûndû ûrîa waragia maveeni ndakaarekererua.

⁶ Andû eengî nîmeyendithagia kûrî andû arîa marî îgweta, andû onthe mendaga gûtuîka arata a mûndû mûtana.

⁷ Mûthîni nîathûrîtwe nginya nî andû ao, wana arata ake matiendaga kwîthîrwa vakuvî nake. Ageragia kwaria nao, nwatî matimûthikagîrîria.

⁸ Mûndû ûrîa wîyendete nîacaragia ûûgî; mûndû ûrîa ûmenyagîrîra ûûgî nîagaakena.

⁹ Mûndû ûrîa ûrutaga ûira wa maveeni nîakaaverithua, nake ûrîa ûveenanagia nîakaathirua.

¹⁰ Gûtiagîrîre andû arîa aritu matûûrage ta itonga, na ngombo itiagîrîre kwathaga atongoria.

¹¹ Mûndû mûûgî ndarakaraga na îvenya, na rîrîa avîtîrua nîarekanagîra.

¹² Mûthamaki arî mûrakaru araramaga ta mûnyambû, nwatî ntha ciake nîta îme rîgwîrîrîte nyaki.

¹³ Mwana mûritu nwa aretere îthe thîna, na mûndûmûka wa ngarari ekariî ta mbura îkiura îtagûkîa.

¹⁴ Mûndû nwa agae indo na nyomba kuuma kûrî aciari, nwatî mûndûmûka mûûgî avecanagwa nî Ngai-Mûnene.

¹⁵ Ûgûûta ûtûmaga mûndû amame; nwatî kûgangara gûtûmaga mûndû anyitwe nî yûra.

¹⁶ Mûndû ûrîa ûvingagia maathani nîatûûraga mwoyo, na mûndû ûrîa ûnyararaga watho nîagaakua.

¹⁷ Mûndû ûrîa ûvecaga mûthîni kîndû, nîta gûkovithia Ngai-Mûnene, Ngai-Mûnene nîakaamûrîva nîûndû wa ciîko ciake.

¹⁸ Rûnga ciana ciaku itarî ngûrû, nwatî ndûkamaverithie ûndû ûngîmacûkangia.

¹⁹ Mûndû ûrakaraga na îvenya nwanginya akaaverithua, nîûndû ûngîmûruta thînarî, nwanginya ûkaamûruta kuo rîngî.

²⁰ Thikagîrîria ûgîtaarwa na ûrûmagîrîre ûrîa ûkûthomithua, nîguo vuvarî ûkaagîa na ûûgî.

²¹ Mûndû ethagîrwa arî na mîvango mîîngî ngororî yake, nwatî wendi wa Ngai-Mûnene nîguo wîkîkaga.

²² Ûndû ûrîa mwagîrîru kuumana na mûndû nî wîvokeku, nîkava mûndû mûthîni gûkîra mûndû ûrîa ûveenanagia.

²³ Gwîtigîra Ngai-Mûnene nî gûtûmaga mûndû atûûre îvinda îraca, na mûndû atûûraga arî mwîganîru na ndangînyitwa nî ûndû mûcûku.

²⁴ Mûndû kîgûûta nîta mûndû ûrîa ûrûmaga irio kuuma thaanirî na njara yake, nwatî ndavotaga gwîyakîria irio icio.

²⁵ Ûngîverithia mûndû mwîtîi, mûndû ûrîa mûritu nîagîcaga na ûûgî, ûngîruta mûndû mûûgî mavîtia nîagîcaga na ûmenyo.

²⁶ Mwana ûrîa ûverithagia îthe na akengata ng'ina kuuma mûciî nîenyararithagia na ageconorithia.

²⁷ Mwana wakwa ûngîrega kûrûmîrîra mataaro, nîrîo ûkaaûrîra maûndû ma ûûgî.

²⁸ Mûruti ûira ûtarî mwagîrîru nîanyararaga kîvooto, andû arîa aganu makenagîra maûndû marîa macûku.

²⁹ Mûndû wa îtherû nîaverithagua, nacio irimû nîikaarivwa mîrukuthu na ivoko.