Nthi 16 - ÎVUKU RÎA ÛVORO MWARO

¹ Mûndû nîavangaga maûndû, nwatî Ngai-Mûnene nîke ûtûmaga mavinge.

² Mûndû onaga ciîko ciake cionthe irî mbaro, nwatî Ngai-Mûnene atuîragia ngoro ya mûndû.

³ Nengera Ngai-Mûnene maûndû marîa ûrenda gwîka, na mîvango yaku nîîkaavinga.

⁴ Ngai-Mûnene aaûmbire indo cionthe irî na itûmi ciacio, wana mûthiia wa andû arîa aganu nî kûthirua.

⁵ Ngai-Mûnene nîathûrîte andû onthe arîa etîi, nama, andû acio nwanginya makaaverithua.

⁶ Gûtuîka mwathîki na mwîvokeku nîgûtûmaga Ngai overe mûndû mevia. Gwîtigîra Ngai-Mûnene nî kûgiragia mûndû eke maûndû macûku.

⁷ Ngai-Mûnene angîkenua nî mîthiîre ya mûndû, nîatûmaga wana nthû cia mûndû ûcio ituîke arata.

⁸ Nîkava kûgîa na indo nini na njîra ya wîvokeku, gûkîra kûgîa na indo nyîngî na njîra îtarî na kîvooto.

⁹ Mûndû nîavangaga maûndû make, nwatî Ngai-Mûnene nîke wonagia mûndû ûrîa agwîka.

¹⁰ Mûthamaki atucaga matua avotithîtue nî Ngai; ndavîtagia rîrîa agûtua ciira.

¹¹ Ngai-Mûnene endaga kîthimi kîthîrwe kîrî Kîam ma, ithimi cionthe nîke warûthire.

¹² Athamaki nîmathwîre gwîka ûndû mûcûku, nîûndû ûthingu nîguo ûtûmaga ûthamaki ûgîe vinya.

¹³ Mîario mîagîrîru nîîkenagia mûthamaki, na nî endete arîa maragia maûndû ma ma.

¹⁴ Marakara ma mûthamaki nwa matûme mûndû akue, na mûndû mûûgî nîageragia kûmathiria.

¹⁵ Rîrîa ûthiû wa mûthamaki ûrî mûkengu kûrî na ûtûûro, ntha ciake nîta îtu rîa mbura.

¹⁶ Kûgîa na ûûgî nî waro gûkîra kûgîa na thaavu, nîkava kûthuura ûtaûku gûkîra sîlûva.

¹⁷ Andû arîa marî mîthiîre mîrûngîrîru nîmaûragîra maûndû marîa macûku; mûndû ûrîa ûmenyagîrîra mîthiîre yake nîagitagîra mwoyo wake.

¹⁸ Mwîtîîo nî ûtûmaga mûndû acûkange, na mwîyambo ûkaga mbere ya mûndû agwa.

¹⁹ Nî kava gûtuîka mûndû mwînyivia na mûthîni, gûkîra kûgaana indo irîa itavîtwe na andû etîi.

²⁰ Mûndû ûrîa ûrûmagîrîra ûrîa athomithîtue nîathatûkagwa, kûrathimwa nî mûndû ûrîa wîvokete Ngai-Mûnene.

²¹ Mûndû mûûgî nîecîkene nîûndû wa ûtaûku wake, na ciugo ciake mbaro nîigucagîrîria andû.

²² Ûûgî nî kîthima Kîam mwoyo kûrî mûndû ûrîa ûrî naguo, nwatî andû arîa aritu maverithagua nî ûrimû wao.

²³ Andû arîa aûgî nîmeciragia mbere ya kwaria, na mîario yao nîgucagîrîria andû.

²⁴ Ciugo mbaro ciîkariî ta ûûkî, nîciîguithagia mwoyo mûrîo na igekîra mwîrî vinya.

²⁵ Kûrî mîthiîre mûndû onaga îrî mîagîrîru, nwatî mûthiiarî îviraga mûndû gîkuûrî.

²⁶ Vata wa irio nîûtûmaga mûndû arute wîra na vinya, yûra nîrîtûmaga mûndû arute wîra na kîîo.

²⁷ Mûndû ûrîa mûcûku avangaga wa maûndû marîa macûku, ciugo ciake ivîvagia ta mwaki.

²⁸ Andû arîa acûku nîo matûmaga kûgîe na ngucanio, na nîo matûmaga andû arîa mendanîte mamenane.

²⁹ Andû arîa aganu maveenagîrîria arata ao, na makamavira thînarî.

³⁰ Mûndû ûrîa unaga metho, ethagîrwa akîvanga maûndû macûku, na mûndû ûrîa ûrûmithanagia mîromo nîekaga ûndû mûcûku.

³¹ Mbuî nîta nthûmbî ya riiri, îvecagwa mûndû ûrîa ûtûûrîte na njîra ya ûthingu.

³² Nîkava mûndû ûtarakaraga na îvenya gûkîra mûndû njamba. Nîkava mûndû wînyitagia maûndûrî gûkîra kûnyita îtûûra rîonthe.

³³ Andû maikagia mîtî nîguo mamenye ûrîa gûgaatuîkîka, nwatî Ngai-Mûnene nîke ûtucaga ûrîa gûgaatuîkîka.