Ntha 17 - ÎVUKU RÎA ÛVORO MWARO

Manjî kuuma îthigarî

¹ Andû onthe a Isiraeli nîmaaumire werûrî wa Sini. Nîmaathiîcaga vandû na makauma vo kûringana na ûrîa Ngai-Mûnene aamaathaga. Nao nîmaambire magema mao Refidimu, nwatî kûu gûtiarî manjî ma kûnyua.

² Andû nîmaambîrîrie gûtetia Musa makîmwîraga atîrî, “Tûve manjî ma kûnyua.” Nake Musa nîwamacokerie atîrî, “Mûrateta nîkî? Nîndûî kîratûma mûgerie Ngai-Mûnene?”

³ Nwatî andû maarî anyondu mûno, na nîmaathiîre na mbere gûteta makîûragia Musa atîrî, “Nîndûî gîatûmire ûtûruta Misiri? Wendaga tûke ûtûragîre gûkû werûrî na nyonda tûrî vamwe na ciana cietû na ng'ombe cietû?”

⁴ Kwoguo Musa nîwathaithire Ngai-Mûnene akîmwîra atîrî, “Nîmbîka andû aya atîa? Rîu marî vakuvî kûndiva na mathiga.”

⁵ Nwatî Ngai-Mûnene nîwerire Musa atîrî, “Oca atongoria amwe a andû a Isiraeli ûthiî nao mbere ya andû. Kuua mûragi ûrîa waringire manjî ma rûnjî rwa Nailo naguo.

⁶ Nîngaarûngama mbere yenyu îgûrû rîa îthiga kîrîmarî gîa Sinai. Thiî ûkaaringa îthiga rîu na mûragi waku na nîrîkaauma manjî ma kûnyuwa nî andû.” Ûguo nîguo Musa eekire akîonagwa nî atongoria onthe a Isiraeli.

⁷ Navo vandû vau nîwavatuîrîre rîîtwa akîveeta Masa na Meriba. Aveetire ûguo nîûndû vau nîvo andû maateteere na makîgeria Ngai-Mûnene makîûragia atîrî, “Ngai-Mûnene arî natue kana ndarî natue?”

Mbaara ya andû a Isiraeli na Amaleki

⁸ Nao Amaleki nîmaaûkire na makîambîrîria kûrûa na andû a Isiraeli marî Refidimu.

⁹ Nake Musa nîwerire Joshua atîrî, “Tûthuurîre arûme a gûkaathiî kûrûa na Amaleki rûyû. Nanie nîngaarûngama kîrîmarî îgûrû nyitîte mûragi ûrîa Ngai aambîrire nguue.”

¹⁰ Kwoguo Joshua nîwekire ûrîa Musa aamwathire eke. Aisiraeli nîmaathiîre kûrûa na Amaleki, nao Musa, Aroni na Huri makîthiî kîrîmarî îgûrû.

¹¹ Vîndî îrîa yonthe Musa eethagîrwa aûkîrîrîtie njara ciake, andû a Isiraeli nîmaavootanaga. Na rîrîa agwîthia njara ciake Amaleki makambîrîria kûvootana.

¹² Nwatî njara cia Musa nîcianogire. Kwoguo Aroni na Huri nîmaaretire îthiga nîguo Musa arîkarîre. Nao nîmaarûngamire mîena na makînyitîrîra njara ciake ciûkîrîrîtue nginya riûa rîkîthûa.

¹³ Ûguo nîguo Joshua aavootire Amaleki.

¹⁴ Nake Ngai-Mûnene nîwacokire akîra Musa atîrî, “Andîka ûvoro wîgiî ûvootani ûyû nîguo ûtuîke wa kûririkanagwa. Na wîre Joshua atî nîngûthiria Amaleki viû na ndûme mariganîre gûkû nthî.”

¹⁵ Musa nîwatumire metha ya kîgongoona na akîmîtuîra rîîtwa “Ngai-Mûnene nîke vendera yakwa.”

¹⁶ Na nîwaugire atîrî, “Ûkîrîria na îgûrû vendera ya Ngai-Mûnene! Ke nîatûûra arûaga na Amaleki tene na tene!”