Nehemia 1 - ÎVUKU RÎA ÛVORO MWARO

¹ Ûyû nîguo mûtaratara wa maûndû marîa Nehemia, mûvîcî wa Hakalia eekire. Aritashasike aarî mûthamaki wa Perisia. Mweri wa Kisilevu mwaka wa mîrongo îîrî kuuma atuîka mûthamaki, nie Nehemia, naarî Susa îtûûra rîrîa rînene.

Maûndû marîa Nehemia eeciragia megiî Jerusalemu

² Ûmwe wa aa mûrwaiya wetagwa Hanani nîwakinyire aumîte Juda arî gîkundirî Kîam andû engî. Nînaamaûririe ûvoro wîgiî Jerusalemu na ûvoro wîgiî Ayahudi etû arîa maaumîte îthamîriorî Baabuloni.

³ Nao nîmaambîrire atî andû arîa maatigarire na maacokire Juda marî na thîna nene mûno na nîmaranyararwa nî ageni arîa mariganîtie nao. Nîmambîrire atî nthingo cia Jerusalemu nî nyomomoku na ivingo cia kuo nî mvîu nî mwaki.

⁴ Rîrîa neguire ûguo nî nekarire nthî na ngîrîra. Nînaacakaire na ngîînyerekia îvinda rîa mîthenya mîîngî ngîvoyaga Ngai wa îgûrû.

⁵ Navoire ngiugaga atîrî, “Ngai-Mûnene, Ngai wa îgûrû! Wî Ngai mûnene na nîtûgwîtigîrîte. We Ngai nîwigaga kîrîkanîro na ûrî wendo ûtathiraga kûrî andû arîa makwendete na marûmagîrîra maathani maku.

⁶ Nthikîrîria na wîgue ngîkûvoya ûtukû na mûthenya nîûndû wa ndungata ciaku, andû a Isiraeli. Nîngumbûra atî tue andû a Isiraeli, nîtwîvîtie.

⁷ Nîtwîkîte maûndû macûku marîa mataringanîte na maathani maku. Tûtirûmîrîrîte maathani, mawatho na matuîro ma ciira marîa watûveere kûvîtûkîrîra kûrî ndungata yaku Musa.

⁸ Ririkana ûrîa werire ndungata yaku Musa atî, ‘Ethîrwa mue andû a Isiraeli tîmûtuîka evokeku mbere yakwa, nîngaamûnyagania kûrî ndûrîrî irîa ciîngî.

⁹ Nwatî mûngîkaanjokerera na mwathîkîre maathani makwa na mwîkage ûrîa maugîte, nîngaamûcokia vandû varîa nthuurîte va kûngoocagîra, wana ethîrwa mûnyaganîtie mûgakinya mîthiiarî yonthe ya nthî.’

¹⁰ “Ngai-Mûnene, andû aya nî aku na nî ndungata ciaku. Wamakûûrire na vinya na ûvoti waku mûnene.

¹¹ We Mwathani, thikîrîria mavoya makwa na mavoya ma ndungata icio ciîngî ciaku irîa irenda gûgûkumia ikenete. Ûmûnthî va ndungata yaku ûvootani na ûtûme mûthamaki ambîguîre ntha.” Vîndî îo nînie naarî ndungata yake ya kûmenyerera ndivei.