Ndari 9 - ÎVUKU RÎA ÛVORO MWARO

Pasaka ya kaîrî

¹ Ngai-Mûnene nîwarîrie Musa arî werûrî wa Sinai, mwerirî wa mbere wa mwaka wa kaîrî kuuma andû a Isiraeli mauma Misiri na akîmwîra atîrî,

² “Îra andû a Isiraeli makûngûagîre kîrugo Kîam Pasaka îvinda rîrîa rîtuîtwe.

³ Narîo nî kîvwaî Kîam mûthenya wa îkûmi na îna Kîam mweri ûyû. Nwanginya mathîkagîre mawatho monthe megiî kîrugo kîu.”

⁴ Kwoguo Musa nîwerire andû makûngûîre Pasaka.

⁵ Na kîvwaî Kîam mûthenya wa îkûmi na îna mweri wa mbere andû nîmaakûngûîre Pasaka marî werûrî wa Sinai. Kwoguo andû a Isiraeli nîmeekire maûndû monthe wata ûrîa Ngai-Mûnene aathîte Musa.

⁶ Nwatî gatagatîrî ka andû acio, kwarî andû amwe mataarî atheru nîûndû wa kûvutia kimba Kîam mûndû. Andû acio matingîavotire gûkûngûîra Pasaka mûthenya ûcio. Kwoguo nîmaathiîre kûrî Musa na Aroni

⁷ na makîra Musa atîrî, “Tue tûrî na gîko nîûndû nîtûvutîtie kimba Kîam mûndû, nwatî tûragirua tûrutîre Ngai-Mûnene matega îvinda rîrîa rîtuîtwe tûrî vamwe na Aisiraeli acio engî nîkî?”

⁸ Musa nîwacokirie atîrî, “Etererani nginya mbîgue ûrîa Ngai-Mûnene akûmbatha îgûrû rîenyu.”

⁹ Ngai-Mûnene nîwerire Musa

¹⁰ ere andû a Isiraeli atîrî, “Rîrîa mûndû ûmwe gatagatîrî kenyu kana wa njiarwa cienyu arî na gîko nîûndû wa kûvutia kimba Kîam mûndû, kana arî rûgendorî, nwanginya akûngûagîre Pasaka ya Ngai-Mûnene.

¹¹ Nîakûngûagîre Pasaka kîvwaî Kîam mûthenya wa îkûmi na îna mweri wa kaîrî, na arîcage mîgate îtekîrîtwe ndawa ya kwimbia na amîrîcanagîrie na mîtî mîrûrû.

¹² Ndagatigaragie irio ikinyia kîraûko kana auna îvîndî rîa nyamû wa yonthe ya kîrugo Kîam Pasaka. Nîakûngûagîre pasaka akîrûmagîrîra mawatho monthe ma yo.

¹³ Nwatî mûndû wa wonthe mûtheru, na ethîrwe ndarî rûgendorî na ndakûngûagîra Pasaka ndakethagîrwa arî ûmwe wa andû akwa, nîûndû ndandutagîra matega vîndî îrîa îtuîtwe. Mûndû ûcio akaaverithua nîûndû wa mevia make.

¹⁴ “Ethîrwa kûrî mûgeni ûtûûrîte kwenyu na nwa ende gûkûngûîra Pasaka ya Ngai-Mûnene nwanginya amîkûngûîre kûringana na ûrîa watho wa Pasaka uugîte. Kwoguo gûkaarûmagîrîrwa watho ûmwe nî mue wana ageni.”

Îtu îgûrû rîa îgema rîa gûcemanîrua

¹⁵ Mûthenya ûrîa îgema rîa gûcemanîrua rîarûngamirue, îtu nîrîaûkire rîkîrîkunîkîra. Îtu rîu rîethagîrwa rîrî îgûrû rîa îgema rîa gûcemanîrua ûtukû wonthe na rîekariî ta mwaki.

¹⁶ Ûguo nîguo îtu rîu rîekaraga mîthenya yonthe. Rîethagîrwa rîkunîkîrîte îgema mûthenya, na rîonekaga rîkariî ta mwaki ûtukû.

¹⁷ Îvinda rîonthe rîrîa îtu rîauma îgûrû rîa îgema rîu, andû a Aisiraeli nîmaathiîcaga mbere na rûgendo. Na varîa rîarûngama andû a Isiraeli nîmaarûngamaga na magekara vo.

¹⁸ Maathiîcaga mbere na rûgendo rîrîa Ngai-Mûnene amatha mathiî, na maambaga magema rîngî rîrîa Ngai-Mûnene amatha mambe. Andû a Isiraeli meekaraga magemarî vîndî îrîa yonthe îtu rîethagîrwa rîrî îgûrû rîa îgema rîa gûcemanîrua.

¹⁹ Mavinda mamwe îtu nîrîekaraga îgûrû rîa îgema rîa gûcemanîrua kavinda karaca, na andû a Aisiraeli nîmaathîkagîra Ngai-Mûnene na matiathiîcaga mbere na rûgendo.

²⁰ Namo mavinda mamwe îtu nîrîekaraga îgûrû rîa îgema rîa gûcemanîrua mîthenya mînini. Vîndî îrîa Ngai-Mûnene athana mathiî, nîmaathiîcaga na vîndî îrîa athana mekare magemarî nîmeekaraga.

²¹ Mavinda mamwe îtu rîekaraga îgûrû rîa îgema rîa gûcemanîrua kuuma kîvwaî nginya kîraûko, na îtu rîathenguta nîmaathiîcaga wa rîmwe, kûrî mûthenya kana ûtukû.

²² Wana îtu rîngîekarire îgûrû rîa îgema rîa gûcemanîrua mîthenya îîrî, mweri kana makîria Aisiraeli matiaumaga kûrîa maambîte magema, nwatî rîathenguta nîmaathiîcaga.

²³ Meekaraga metererete wa ûrîa Ngai-Mûnene angîathana meke, kûvîtûkîra kûrî ndungata yake Musa. Athana mathiî nîmaathiîcaga na athana marûngame nîmaarûngamaga.