Ndari 8 - ÎVUKU RÎA ÛVORO MWARO

Taa

¹ Ngai-Mûnene nîwerire Musa

² ere Aroni atîrî, “Rîrîa akia taa, nîaigagîrîre taa icio mûgwanja vandû va cio na onage atî ûtheri wacio nîûramûrîka na kûu mbere.”

³ Aroni nîwathîkire, na akigîrîra taa vandû va cio na ûtheri wacio ûkîmûrîka na kûu mbere wata ûrîa Ngai-Mûnene aathîte Musa.

⁴ Vandû vau va kwigîrîrwa taa vaarûthîtwe na thaavu ya gûturwa kuuma nthî nginya îgûrû wata ûrîa Ngai-Mûnene oonetie Musa.

Kûtherua na kwamûrwa kwa Alawi

⁵ Ngai-Mûnene nîwerire Musa atîrî,

⁶ “Thuura Alawi kuuma gatagatîrî ka andû a Isiraeli na ûmatherie

⁷ ta û: Maminjîrie manjî matheru na ûmeere meyenje mîîrî yao yonthe na mathambie nguo ciao nîguo methîrwe marî atheru.

⁸ Macoke moce ndegwa îmwe îtarî ngûrû, matega ma irio ma mûtu mûvinyu ûtukanîtue na maguta ma ndamaiyû na woce ndegwa îngî îtarî ngûrû ya îtega rîa kûtheria mevia.

⁹ Nîûkaagomania andû a Isiraeli onthe vamwe na ûvire Alawi vau mbere ya îgema rîa Ngai-Mûnene.

¹⁰ Wavira Alawi mbere ya Ngai-Mûnene, andû a Isiraeli nîmakaamaigîrîra njara,

¹¹ nake Aroni acoke anyamûrîre Alawi matuîke kîveo Kîam mwanya kuuma kûrî andû a Isiraeli nîguo mandungatagîre.

¹² Alawi nîmagaacoka maigîrîre njara ciao îgûrû rîa ciongo cia ndegwa icio. Nîûkaaruta îmwe yacio kûrî Ngai-Mûnene îrî îtega rîa kûtheria mevia, nayo îo îngî îrî îtega rîa kûvîvua nîûndû wa kûtheria Alawi.

¹³ “Îra Alawi mathiî mbere ya Ngai-Mûnene na mandutîre kîveo gîakwa Kîam mwanya na ûtue Aroni na avîcî ake anene ao.

¹⁴ Amûrania Alawi na andû acio engî a Isiraeli nîguo matuîke akwa.

¹⁵ Warîkia kûmatheria na kûmamûra, nîmagaatuîka andû agîrîru a kûruta wîra îgemarî rîa Ngai-Mûnene.

¹⁶ Nînyamûrîrîtwe o kuuma gatagatîrî ka marikithathi monthe ma andû a Isiraeli nîguo matuîke akwa kîûmbe.

¹⁷ Vîndî îrîa naûragire marikithathi monthe ma andû na ma nyamû kûu Misiri, nînaamûrire marikithathi ma andû na ma nyamû ma andû a Isiraeli matuîke akwa.

¹⁸ Nwatî rîu nyamûkîrîte Alawi matuîke akwa îthenya rîa marikithathi monthe ma Isiraeli.

¹⁹ Nîmvecanîte Alawi kûrî Aroni na avîcî ake marî kîveo kuuma kûrî Aisiraeli, nîguo matungatagîre Aisiraeli îgemarî rîa Ngai-Mûnene, na mamagitagîre kûrî thîna ûrîa mangîcemania naguo mangîkuvîrîria varîa vatheru Mûno.”

²⁰ Kwoguo Musa, Aroni na andû onthe a Isiraeli nîmaamûrire Alawi wata ûrîa Musa aathîtwe nî Ngai-Mûnene.

²¹ Alawi nîmetheririe makîthambia nguo ciao nake Aroni nîwamamûrîre Ngai-Mûnene marî kîveo Kîam mwanya. Nîwamarûthîre îgongoona rîa kûmatheria.

²² Kwoguo Alawi nîmaathiîre gûtungata îgemarî rîa Ngai-Mûnene marî rungu rwa Aroni na avîcî ake.

²³ Ngai-Mûnene nîwerire Musa atîrî,

²⁴ “Mûlawi wa wonthe akinyia ûkûrû wa mîaka mîrongo îîrî na îtano na makîria, agaatungataga îgemarî rîa Ngai-Mûnene,

²⁵ na akinyia mîaka mîrongo îtano, atigane na wîra anogoke.

²⁶ Nwa atethagîrîrie Alawi acio engî gûtungata îgemarî rîa Ngai-Mûnene. Nwatî ndagîrîrwe nî kûruta wîra arî wenga.”