Ndari 32 - ÎVUKU RÎA ÛVORO MWARO

Mîvîrîga îrîa îrî mwena wa îrathîro wa Jorodani

¹ Andû a mûvîrîga wa Reubeni na wa Gadi maarî na ndîthia nyîngî mûno. Rîrîa moonire vûrûri wa Jazeri na vûrûri wa Gileadi warî na kûndû kwaro kwa ndîthia ciao,

² nîmaathiîre kûrî Musa, Eliazaru, mûthînjîri-Ngai na atongoria a andû na makîmeera atîrî,

³ “Îtûûra rîa Atarothi, Diboni, Jazeri, Nimura, Heshiboni, Eleale, Sebamu, Nebo na Beoni,

⁴ nî vûrûri ûrîa Ngai-Mûnene aavootanîre andû a Isiraeli. Vûrûri ûcio nî mwaro wa ndîthia na tue ndungata ciaku tûrî na ndîthia nyîngî mûno.

⁵ Kwoguo ethîrwa nwa mwîtîkîre tûramûria na gîtîîo mûtûve vûrûri ûyû ûtuîke wetû, na mûtigatwîre tûthiî tûgatûûre mûringo wa rûnjî rwa Jorodani.”

⁶ Musa nîwaûririe andû acio a mûvîrîga wa Reubeni na wa Gadi atîrî, “Mue mûrenda gwîkara gûkû rîrîa andû enyu a Isiraeli marî mbaararî?

⁷ Mûraûraga andû enyu a Isiraeli ngoro nîkî mûkîrega kûthiî vûrûri ûrîa mwaveerwe nî Ngai-Mûnene?

⁸ Ûguo nîguo methe menyu ma tene meekire vîndî îrîa naamatûmire kuuma Kadeshi-barinea makathigane vûrûri.

⁹ Maathiîre nginya Kîamndarî Kîam Eshikoli, na makîona vûrûri. Nwatî rîrîa maacokire, nîmaaûragire andû a Isiraeli ngoro nîguo maremwe nî kûthiî vûrûrirî ûrîa maavetwe nî Ngai-Mûnene.

¹⁰ Mûthenya ûcio Ngai-Mûnene nîwatûmbirwe nî marakara na akîîvîta akiuga atîrî,

¹¹ ‘Nama gûtirî wanarî mûndû ûmwe wa arîa maaumire Misiri ûrî na ûkûrû wa mîaka mîrongo îîrî kûthiî na îgûrû ûgaatonya vûrûri ûrîa nevîtire atî nîngaava Iburahimu, Isaka na Jakovu, nîûndû nîmaaregire kûmbathîkîra.’

¹² Kalebu mûvîcî wa Jefune kuuma Kenezi, na Joshua mûvîcî wa Nuni nîo tu magaatonya vûrûrirî wa Kîîranîro, nîûndû methîrîtwe makîathîkîra Ngai-Mûnene.”

¹³ Ngai-Mûnene nîwarakarirue mûno nî andû a Isiraeli na agîtûma maûrûre werûrî îvinda rîa mîaka mîrongo îna (40) nginya rîrîa rûciaro rûu ruonthe rwekîte maûndû macûku mbere ya Ngai-Mûnene rwakwire.

¹⁴ Namue rûciaro rwa evia, nîmûkinyîte varîa methe menyu maarî, mûgatûma marakara ma Ngai-Mûnene kûrî Aisiraeli mongerereke!

¹⁵ Mue andû a Reubeni na a Gadi mwarega kûrûmîrîra Ngai-Mûnene, ke nîakaamûtiganîria werûrî rîngî, na nîmûgaatûma andû aya onthe mathire.

¹⁶ Nao nîmaathiîre kûrî Musa makîmwîra atîrî, “Amba ûtwîtîkîrie tûtumîre ng'ondu cietû njaga na tûtumîre ciana cietû matûûra.

¹⁷ Tue nîtûgwoca indo cietû cia mbaara nîguo tûthiî mbaararî na andû etû a Isiraeli. Tûkethîrwa tûtongoretie mbaararî nginya tûmakinyie vûrûri ûrîa magaatûûra. Nwatî nîtûtiga ciana cietû gûkû matûûrarî mama mairigîre nîûndû makethîrwa marî agitîre kuuma kûrî andû a vûrûri ûyû.

¹⁸ Tûtigaacoka mîciî gwetû nginya rîrîa Aisiraeli onthe makegwatîra vûrûri ûrîa maagaîrwe.

¹⁹ Tûtigooca kûrîa maagaîrwe mwena wa îthûîro wa Jorodani, nîûndû tûrî anyitu îgai rîetû mwena ûyû wa îrathîro wa Jorodani.”

²⁰ Musa nîwamerire atîrî, “Ethîrwa nîmûgwîka ûguo mûrauga, ocani indo cienyu cia mbaara wa rîu mûrî ava mbere ya Ngai-Mûnene mûthiî mbaararî.

²¹ Andû enyu onthe arîa marî na indo cia mbaara nîmaringe rûnjî rwa Jorodani, na matongoretue nî Ngai-Mûnene, matharîkîre nthû cietû nginya Ngai-Mûnene aivoote;

²² na mwoce vûrûri ûcio. Mwarîkia gwîka ûguo mûcoke, nîûndû nîmwîthîrwa mûrîkîtie wîra wenyu kûrî Ngai-Mûnene na kûrî andû a Isiraeli. Nake Ngai-Mûnene nîagetîkîra atî vûrûri ûyû ûrî mwena wa îrathîro wa rûnjî rwa Jorodani, nî wenyu.

²³ Nwatî mwarega kûvingia ciîranîro cienyu, nîramwîra nama atî mûkeethîrwa mwîvîtie mbere ya Ngai-Mûnene, na nîmûkaaverithua nîûndû wa wîvia wenyu.

²⁴ Kwoguo tumani matûûra ma ciana cienyu na ciaga cia ng'ondu cienyu nwatî mûtikarege gwîka maûndû marîa mweranîre!”

²⁵ Nao andû a mûvîrîga wa Gadi na wa Reubeni nîmeerire Musa atîrî, “Mwathi wetû tue ndungata ciaku nîtûgwîka ûrîa watwatha.

²⁶ Aka etû, ciana, mbûri na ng'ombe cietû nîciîkara gûkû matûûrarî ma Gileadi.

²⁷ Nwatî tue ndungata ciaku nîtwîvarîrîtie kûthiî mbaararî tûtongoretue nî Ngai-Mûnene. Nîtûkûringa rûnjî rwa Jorodani na tûrûe wata ûguo wauga.”

²⁸ Kwoguo Musa nîwathire Eliazaru, mûthînjîri-Ngai, Joshua, na atongoria acio engî a mîvîrîga ya Isiraeli akîmera atîrî,

²⁹ “Ethîrwa andû a mûvîrîga wa Gadi na wa Reubeni nîmakaaringa rûnjî rwa Jorodani vamwe namue, marî na indo ciao cia mbaara na matongoretue nî Ngai-Mûnene, nîmûkaavootana na mwoce vûrûri ûcio, mûcoke mûûve andû a mûvîrîga wa Gileadi ûtuîke wao.

³⁰ Nwatî ethîrwa matikaaringa rûnjî rwa Jorodani mathiî mbaararî namue, mûkaagaa vûrûri wa Kanaani mûrî nao.”

³¹ Nao andû a Gadi na a Reubeni nîmaacokirie atîrî, “Mwathi wetû, nîtûgwîka wata ûrîa Ngai-Mûnene atwatha.

³² Nîtûkûthiî tûtongoretue nî Ngai-Mûnene tûkinye vûrûri wa Kanaani tûrî na indo cietû cia mbaara na tûrûe. Naguo vûrûri ûyû ûrî mwena wa îrathîro wa Jorodani nîwîthîrwa ûrî wetû.”

³³ Kwoguo Musa nîwavere andû a mûvîrîga wa Gadi na wa Reubeni, na nuthu ya mûvîrîga wa Manase mûvîcî wa Josefu, vûrûri wonthe wa Mûthamaki Sihoni wa Amori na vûrûri wa Ogu, Mûthamaki wa Bashani vamwe na matûûra ma mavûrûri mau, na matûûra marîa mengî maariganîtie namo.

³⁴ Mûvîrîga wa Gadi nîwatumire matûûra ma: Diboni, Atarothi, Aroeri,

³⁵ Atirothi-shofani, Jazeri, Jogibeha,

³⁶ Bethi-nimura na Bethiharani, matûûra marîa mairigîre na magîtuma ciaga cia ng'ondu.

³⁷ Mûvîrîga wa Reubeni nîwatumire rîngî matûûra ma Heshiboni, Eleale, Kiriathaimu,

³⁸ Nebo na Baali-meoni (marîîtwa ma matûûra mama nîmaagarûrirwe) na Sibuma. Nîmaatuîrîre matûûra marîa maatumire marîîtwa mengî.

³⁹ Njiarwa cia Makiru mûvîcî wa Manase nîmaatharîkîre vûrûri wa Gileadi, makîûnyita na magîtava Amori arîa maatûûraga kuo.

⁴⁰ Kwoguo Musa nîwavere andû a mûvîrîga wa Makiru vûrûri wa Gileadi na magîtûûra kuo.

⁴¹ Jairi, wa mûvîrîga wa Manase nîwatharîkîre icagi imwe cia Gileadi na agîitava, agîcoka akîiva marîîtwa (Icagi cia Jairi).

⁴² Noba nîwatharîkîre îtûûra rîa Kenathi na akîrînyita vamwe na icagi irîa ciariganîtie narîo, na agîtania îtûûra rîu na rîîtwa rîake. Kwoguo nîwarîtire Noba.