Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Nahumu 3 - ÎVUKU RÎA ÛVORO MWARO

1 Kaî îtûûra rîîrî rîûraganaga na rîveenanagia rîrî na thîna-î! Rîcûrîte ûthani na indo nyîngî irîa ciîîtwe, rîtigaatiga gûtava indo!

2 Thikîrîria mûgambo wa ivoko, mûgambo wa nthugû cia ikaari, mûgambo wa mavûngû ma mbarathi mûrurumo wa ikaari cia mbarathi.

3 Arîa mathiîcaga mekarîrîte mbarathi nîmaratharîkîra, mviû na matumû nîiravenavenia; arîa maûragîtwe matingîtarîka, ciimba nî nyîngî mûno; andû maravîngîcwa nî arîa akuû!

4 Îtûûra rîa Nineve ûtuîkîte îraa. Ûthaka waku ûragucîrîria andû ta mîthega, watuire mavûrûri ngombo na njîra ya ûmaraa waku, na andû a ndûrîrî ûkîmatua ngombo na mîthega yaku.

5 Ngai-Mûnene mwene vinya wonthe arauga atîrî, “Nîngûkûverithia we Nineve! Nîngûkûruta nguo wîthîrwe wî njaga, na ndûme andû a mavûrûri moone njaga yaku, na mothamaki moone gîconoko gîaku.

6 Nîngûgwikîria gîko, na ngwîke maûndû ma kînyûrûri, ngûtue kîndû gîcûku gîa kwîroragîrwa nî andû.

7 Andû onthe arîa magakûonaga makaûraga nîwe makiugaga atîrî, ‘Nineve nî njûkangie! Nîûrîkû ûkûmûcakaîra? Nû ûkûmwîguîra ntha?’

8 We Nineve nîwe mwaro gûkîra Thebesi, îtûûra rînene rîrîa rîtumîtwe vakuvî na rûnjî rwa Nilo? Thebesi yathiûrûrûkîrîtue nî manjî, îria rîarî mûciî wake, na manjî marî rûthingo rwake.

9 Ethiopia na Misiri nîcio ciarî vinya wake, na ûvoti wamo ndwarî kîthimi. Andû a Puti na Lîbia nîo mamûtethererie.”

10 Kûnarî ûguo, andû a Thebesi nîmaakuirwe marî mîgwate. Ciana ciakuo ciarivagîrwa ndeererî cia varavara ikenda gûkua. Anene ao nîmaakuirwe marî na mînyororo, na makîgaanua gatagatî ka arîa mamanyitîte.

11 Nineve, wanawe nîûkaarîwa! Wanawe nîûkaaûra nî nthû yaku.

12 Kûndû gwaku kuonthe gwa kwîgitîra gûkethîrwa gwîkariî ta mîkûyû îrî mîtune; nwatî inainia mîkûyû wone, matunda mainainua magûcaga kanyuarî ka mûmarîi.

13 Taroria athigari aku, marî guoya ta aka, naguo vûrûri waku wîkarîte ûtarî na ûgitîri mbere ya nthû ciaku. Mwaki nîûvîvîtie ûgitîri wenyu viû.

14 Tavani manjî mwîvarîrîtie kûrigicîrua; îkîrani nthingo cienyu cia kwîgitîra. Kinyangani ndaka ya yûmba, na mûvarîrîrie vandû va kûvîvîria matuvarî.

15 Wana mûrî kûu mwaki nwa ûkamûvîvia, nîûkaaûragîrwa mbaararî. We nîûkaathirua ta irio ikîrîwa nî ngige. Ongererekani mwîgane ta ngige, mwongerereke mwîkare ta mvandi!

16 Andû arîa magûraga na makendia indo moongererekete magakîra njata cia îgûrû! Nwatî rîu nîathiîu ta ûrîa ngige itambarûkagia mathagu mau ikagûrûka ikathiî.

17 Anene aku nîta mvandi, irîa ciîkaraga nthingorî, atongoria aku nîta ikundi cia ngige ciûmbîrîrîte rûthingorî, mûthenya ûrîa kûrî mvevo, nwatî rîrîa riûa rîara nîigûrûkaga, na gûtirî mûndû ûmenyaga kûrîa ciathiî!

18 We mûthamaki wa Asîria, arîthi aku nîkwa mamamîte, andû aku arîa marî îgweta nîkwa nîmaragocerera. Andû aku manyaganîtie irîmarî, na gûtirî mûndû wa kûmacokanîrîria.

19 Gûtirî mûndû wa kûvonia ngurara ciaku, na ironda ciaku itingîvona. Arîa onthe megucaga ûvoro waku, nîmavûravûra mvî nî gûkena. Nî mûndû ûrîkû waûrire waganu waku ûcio ûtarî mûthiia?

©Bible Society of Kenya, 2019

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ