Mathaayo 14 - ÎVUKU RÎA ÛVORO MWARO

Gûkua kwa Johana Mûvatithania

¹ Kavinda wa kau, Herode ûrîa wathanaga Galili nîwegwire ngumo ya Jesû,

² na akîîra ndungata ciake atîrî, “Ûyû nî Johana Mûvatithania ûriûkîte, na nîkîo arî na ûvoti wa kûringa ciama.”

³ Mbere ya ûguo Herode nîwathanîte Johana anyitwe, ovwe na mvîngû na acoke aikue njeera. Herode eekire ûguo nîûndû wa Herodia ûrîa warî mûka wa mûrwang'ina Filipu.

⁴ Johana nîwekaraga akîîraga Herode atîrî, “Watho ndûgwîtîkîrîtie ûvikie Herodia!”

⁵ Herode nîwendaga kûûragithia Johana, nwatî nîwetigagîra Ayahudi nîûndû o meetîkîtie atî Johana aarî mûrathi.

⁶ Rîrîa mûthenya wa gûkûngûîra gûciarwa kwa Herode wakinyire, mwarî wa Herodia nîweinirie arî mbere ya ageni onthe. Herode nîwakenirue mûno nî mwîrîtu ûcio,

⁷ na akîîrîra mwîrîtu ûcio akîîvîtaga atî nîakûmûva kîndû wa kîonthe kîrîa angîmwîtia.

⁸ Nake mwîrîtu ûcio nîwerirwe nî ng'ina kîrîa agwîtia. Kwoguo nîwerire Herode atîrî, “Mva wa rîu kîongo Kîam Johana Mûvatithania kîrî thaanirî.”

⁹ Mûthamaki nîwegwire kîeva kîîngî mûno, nwatî nîûndû wa ûrîa eevîtîte arî mbere ya ageni ake, ke nîwathanire atî mwîrîtu ûcio anengerwe kîrîa eetîtie.

¹⁰ Kwoguo Herode nîwatûmanire njeera Johana agatinue kîongo.

¹¹ Nakîo kîongo kîu nîkîaretirwe kîrî thaanirî na gîkînengerwa mwîrîtu ûcio nake agîkîvira kûrî ng'ina.

¹² Nao arutwa a Johana nîmaathiîre magîoca mwîrî wake na makîûthika, nao nîmaacokire makîthiî na makîra Jesû.

Jesû nîwavaithirie kîrîndî kînene

¹³ Rîrîa Jesû eegwire ûvoro wîgiî Johana, nîwatwîre gatarûrî akiuma kûu na akîthiî vandû vataarî na andû arî wenga. Nwatî rîrîa andû meegwire ûguo, nîmaaumire matûûrarî mao na makîmûrûmîrîra mathiîte na magûrû.

¹⁴ Rîrîa Jesû aakinyire rûtererî rwa îria, nîwonire kîrîndî kînene na akîringwa nî ntha nîûndû wakîo na akîvonia arîa maarî arwaru.

¹⁵ Kîvwaî kîu, arutwa a Jesû nîmaathiîre kûrî ke na makîmwîra atîrî, “Gûkû tûrî nî werûrî na nîgûtukire, rekereria andû mathiî na kûu icagirî nîguo makegûrîre kîndû mangîrîa.”

¹⁶ Nake Jesû nîwamacokerie atîrî, “Matiagîrîrwe nî kûthiî, mue manengereni kîndû mangîrîa.”

¹⁷ Nao nîmaamûcokerie atîrî, “Ava tûrî na mîgate îtano na nthamaki igîrî tu.”

¹⁸ Nake Jesû nîwamerire atîrî, “Ireteni ava nîrî.”

¹⁹ Jesû nîwacokire akîra andû mekare nthî nyakirî. Ke nîwacokire agîoca mîgate îo îtano na nthamaki icio igîrî, akîroria na îgûrû, agîcokia ngatho kûrî Ngai na akîmîrathima. Nîwamîenyûrangire na akîmînenganîra kûrî arutwa magaîre andû.

²⁰ Andû onthe nîmaarîre na makîvaa. Nao arutwa nîmaacokire makîûngania matigari na magîcûra ciondo îkûmi na igîrî.

²¹ Andû arîa maarîre mîgate na nthamaki, marî arûme ta ngiri ithano, gûtagûtarwa aka na ciana.

Jesû nîwathiîrîre manjîrî na magûrû

²² Jesû nîwacokire akîra arutwa ake matwe îtarûrî nîguo maringe mûringo ûcio wîngî wa îria mwerua arekereria kîrîndî kînûke.

²³ Vuva wa kûrekereria kîrîndî, Jesû nîwaunûkirie kîrîmarî arî wenga kûvoya. Na kîvwaî gîakinya, Jesû aarî kîrîmarî arî wenga.

²⁴ Kavindarî kau îtarû rîarî îriarî vandû varaca kuuma nthî nyûmû. Narîo îtarû nîrîaikanagua nî makûmbî ma manjî, nîûndû rûkûngi nîrwavurutanaga rwerekerete na kûrîa îtarû rîaumaga.

²⁵ Kîraûko tene mûno Jesû nîwakinyire kûrî arutwa ake athiîrîrîte manjîrî.

²⁶ Na rîrîa arutwa maamwonire athiîrîrîte manjîrî nîmaamakire mûno na makiuga atîrî, “Îno nî ngoma.” Nao nîmaaugire mbu mûno nîûndû wa guoya.

²⁷ Nake Jesû nîwamaarîrie wa rîmwe na akîmeera atîrî, “Nînie, tigani gwîtigîra, îyûmîrîrieni.”

²⁸ Nake Petero nîwacokerie Jesû atîrî, “Mwathani, ethîrwa nîwe mbîra mbûke kûrî we nthiîrîrîte manjîrî îgûrû.”

²⁹ Nake Jesû nîwamwîrire atîrî, “Ûka.” Kwoguo Petero nîwaumire îtarûrî, na akîambîrîria kûthiîra manjîrî îgûrû erekerete kûrî Jesû.

³⁰ Nwatî rîrîa oonire rûkûngi rûnene nîwetigîre, na akîambîrîria kûvorokera manjîrî. Nake nîwaugîrîrie atîrî, “Mwathani, mvonokia!”

³¹ Na wa rîmwe Jesû nîwatambûrûkirie njara akîmûnyita na akîmwîra atîrî, “Kaî wîtîkio waku nî mûnini-î! Nîkî gîtûmire ûgîe na nganja?”

³² Rîrîa Jesû na Petero maatwîre gatarûrî, rûkûngi nîrwatigire kûvurutana.

³³ Nao arutwa arîa maarî gatarûrî nîmaagoocire Jesû makiugaga atîrî, “Nî ma we ûrî Mûriû wa Ngai!”

Jesû nîwavonirie arwaru arî Genesareti

³⁴ Rîrîa maaringire îria nîmaakinyire vûrûrirî wa Genesareti.

³⁵ Nao andû a vûrûri ûcio nîmaamenyire Jesû. Na kwoguo nîmaatûmanîre andû onthe arîa maarî arwaru nîguo mavirwe kûrî ke.

³⁶ Nao nîmaathaithire Jesû etîkîre arwaru mavûrûrie wana ethîrwa nî mîthiia ya nguo yake. Nao arîa onthe maamîvûrûririe nîmaavonirue.