Maariko 14 - ÎVUKU RÎA ÛVORO MWARO

Mûvango wa kûûraga Jesû

¹ Mîthenya îîrî mbere ya kîrugo Kîam pasaka vamwe na kîrugo Kîam mîgate îrîa îtethagîrwa îkîrîtwe ndawa ya kwimbia, anene a athînjîri-Ngai, na arimû a Watho nîmaambîrîrie gûtuîria ûrîa mangînyita Jesû na nthitho nîguo mamûûrage.

² Nao nîmeeranire atîrî, “Tûtingîmûnyita andû arîa maûkîte kîrugorî Kîam pasaka makîonaga, nîûndû mavota kûgoma.”

Jesû nîwetîrîrue maguta arî Bethania

³ Jesû aarî îtûûrarî rîa Bethania mûciî gwa Simoni ûrîa warwarîte mangû. Rîrîa Jesû aarîcaga irio, mûndûmûka ûmwe nîwatonyire kûu nyomba akuuîte mûcuva wîcûrîte maguta maanungaga waro na ma goro. Nake mûndûmûka ûcio nîwakunûrire mûcuva ûcio na agîtîrîria maguta mau kîongorî Kîam Jesû.

⁴ Nao andû amwe arîa maarî vo nîmaarakarire na makîambîrîria kûrania atîrî, “Nîndûî gîatûma anange maguta mau.

⁵ Maguta mama nîmangîendua makîria ya dinarii magana mathatû, na mbeca icio ikavewa athîni.” Nao nîmaatetirie mûndûmûka ûcio mûno.

⁶ Nwatî Jesû nîwamerire atîrî, “Tiganani nake! Mûramûthînia nîkî? Mûndûmûka ûyû nîwambîka ûndû mwaro mûno.

⁷ Andû arîa athîni mûkethagîrwa nao vîndî cionthe na wa rîrîa rîonthe mûngîenda kûmatethia nwa mûmatethie. Nwatî mûtikethagîrwa nanie vîndî cionthe.

⁸ Mûndûmûka ûyû eka ûrîa avota gwîka. Etîrîria maguta mwîrîrî wakwa, nîguo aûvarîrie mbere ya ûthikwe.

⁹ Nîramwîra na ma atî kûrîa kuonthe Ûvoro Mwaro ûkaavunjua nthî yonthe, ûndû ûcio ambîka nîûkaaganagwa nîguo aririkanagwe.”

Judasi nîwacukanîrîre Jesû

¹⁰ Nake Judasi Mûsikariota ûmwe wa arutwa arîa îkûmi na aîrî, nîwathiîre kûrî anene a athînjîri-Ngai nîguo acukanîrîre Jesû kûrî o.

¹¹ Na rîrîa Judasi aameerire ûvoro ûcio, nîmaakenire mûno na makîmwîra atî nîmakûmûva mbeca. Nake Judasi nîwambîrîrie gûcaria kamweke nîguo amûnenganîre kûrî o.

Jesû nîwarîcanîre irio cia pasaka na arutwa ake

¹² Mûthenya wa mbere wa Kîrugo gîa kûrîa Mîgate îrîa îtethagîrwa îkîrîtwe ndawa ya kwimbia, na ûrîa tûtûrûme twa kûrîwa vîndî ya pasaka twathînjagwa, arutwa a Jesû nîmaamûririe atîrî, “Ûrenda tûgakûvarîrîrie irio cia pasaka kû?”

¹³ Nake Jesû nîwatûmire arutwa ake aîrî na akîmeera atîrî, “Thiîni mûtonye îtûûrarî na nîmûgûtûngwa nî mûndû akuuîte mûtûngi wa manjî;

¹⁴ muumeni vuva nginya nyomba wa yonthe îrîa agaatonya na mwîre mwene yo atîrî, ‘Mwarimû akûria atîrî: Îrî va nyomba ya ageni îrîa ngûrîra irio cia pasaka nîrî vamwe na arutwa akwa?’

¹⁵ Nake nîagûcoka amwonie nyomba ya îgûrû îkîrîtwe indo cionthe na îmvarîrie. Na aamwonia kuo, mûtûvarîrîrie irio cia pasaka.”

¹⁶ Nao arutwa acio nîmaathiîre îtûûrarî na makîthîra maûndû monthe mekariî wata ûrîa Jesû aameerîte. Nao nîmaathondekire irio cia pasaka.

¹⁷ Kîvwaî Kîam mûthenya wa ûcio, Jesû nîwakinyire marî na arutwa ake.

¹⁸ Na rîrîa meekarîte metharî makîrîa irio, Jesû nîwamerire atîrî, “Nîramwîra na ma atî ûmwe gatagatîrî kenyu ûrîa ûrarîcanîra nanie nîakûnjukanîrîra.”

¹⁹ Nao arutwa nîmaambîrîrie kûnyitwa nî kîeva na makîmûûria ûmwe kwa ûmwe atîrî, “Mwathani nî nie ngûgûcukanîrîra?”

²⁰ Nake Jesû nîwamacokerie atîrî, “Nî ûmwe gatagatîrî kenyu mue îkûmi na aîrî ûrîa ûravokanîria mûgate thuvurî vamwe nanie.

²¹ Mûrû wa Mûndû nîagûkua wata ûrîa mandîko maugîte. Nwatî kaî mûndû ûrîa ûgûcukanîrîra Mûrû wa Mûndû nîakûgîa na thîna-î! Wana nî kava mûndû ûcio atangîaciarirwe!”

Irio cia Mwathani cia kîvwaî

²² Rîrîa maarîcaga, Jesû nîwocire mûgate akîûrathima, akîwenyûranga na akîûnengera arutwa ake akiugaga atîrî, “Keni; ûyû nî mwîrî wakwa.”

²³ Nîwacokire agîoca gîkombe agîcokeria Ngai ngatho na akîmanengera; na onthe makînyunyanîra.

²⁴ Nake Jesû nîwamerire atîrî, “Îno nî nthakame yakwa ya kîrîkanîro, îrîa îgeetûrûrwa nîûndû wa andû eengî.

²⁵ Nîramwîra na ma atî nie ndigaacoka kûnyua ndivei îno rîngî nginya mûthenya ûrîa ngaamînyua îrî njerû Ûthamakirî wa Ngai.”

²⁶ Nao marîkia kwina rwîmbo nîmaaumire nyomba na makîthiî Kîrîmarî Kîam mîtî ya Mîtamaiyû.

Jesû nîwerire Petero atî nîakûmûkaana

²⁷ Jesû nîwamerire atîrî, “Muonthe nîmûkûremwa nî kûmîrîria na mûndiganîrie, nîûndû mandîko maugîte atîrî, ‘Ngai nîakaaûraga mûrîthi, nacio ng'ondu ivurunjûke.’

²⁸ Nwatî nariûka, nîngaamûtongoria tûthiî Galili.”

²⁹ Nake Petero nîwerire Jesû atîrî, “Wana arîa engî onthe mangîgûtiganîria nie ndigaagûtiganîria.”

³⁰ Nake Jesû nîwamwîrire atîrî, “Nîrakwîra na ma atî, mbere ya ngûkû îgambe maita maîrî ûtukû ûyû wa ûmûnthî, nîûkwîthîrwa ûngaanîte maita mathatû atî we ndûmbîcî.”

³¹ Nake Petero nîwaregire na vinya mûno na akîîra Jesû atîrî, “Nie ndingîgûkaana, wana angîthîrwa nîkwa ngûraganîrua vamwe nawe.” Nao arutwa acio engî onthe nîmaaugire wa guo.

Jesû nîwavoire arî Gethisemane

³² Jesû na arutwa ake nîmaathiîre vandû vetagwa Gethisemane, na Jesû akîîra arutwa ake atîrî, “Îkarani ava nyambe nthiî ngavoe.”

³³ Nake Jesû nîwetire Petero, Jakuvu na Johana na makîthiî marî vamwe. Na vîndî wa îo Jesû nîwanyitirwe nî kîeva, akîthînîka mûno ngororî yake,

³⁴ na akîîra arutwa ake atîrî, “Nie nîregua kîeva kîîngî mûno ngororî yakwa wa takwa nîngîkua. Îkarani ava na mûtikamame.”

³⁵ Nake Jesû agendagenda mbere vanini nîwegwîthirie nthî na akîvoya atî angîthîrwa nwa kûvoteke vîndî îo ya thîna ûcio ndîkamûkinyîre.

³⁶ Nake nîwavoire atîrî, “Vava! We nîûvotaga gwîka maûndû monthe. Nthengutîria gîkombe gîkî Kîam mathîna. Nwatî îka ûrîa we ûkwenda, tî ûrîa nie ngwenda.”

³⁷ Rîrîa aacokire varîa arutwa acio athatû maarî nîwamethîrîrie marî toro na akîûria Petero atîrî, “Simoni, nîkwa ûrî toro? Ndûngîvotire gwîkara wanarî îthaa rîmwe ûtarî toro?

³⁸ Îkaragani mwîmenyererete nîguo mûtikagwe mageriorî. Ngoro nî îrenda nwatî mwîrî ndûrî na vinya.”

³⁹ Jesû nîwamatigire rîngî, na akîvoya wata ûrîa aavoete.

⁴⁰ Rîrîa aacokire rîngî varîa arutwa maarî, nîwamethîrîrie marî toro, nîûndû matingîavotire gwîkara maraûkîtie. Nao nîmaarigirwe nî ûrîa makûmûcokeria.

⁴¹ Na rîrîa aathiîre varîa maarî riita rîa kathatû, nîwamerire atîrî, “Anga nginya rîu mûrî toro mûvurûkîte? Nî îthirîre vau! Îvinda nîrîakinya na Mûrû wa Mûndû nîakûnenganîrwa kûrî evia.

⁴² Rûngamani tûthiî! Roriani mûnjukanîrîri nîwakinya.”

Kûnyitwa kwa Jesû

⁴³ Rîrîa Jesû aaragia, Judasi ûrîa warî ûmwe wa arutwa arîa îkûmi na aîrî, nîwakinyire. Judasi aakinyire marî na andû makuuîte mviû cia njûra na njokoma. Nao maatûmîtwe nî anene a athînjîri-Ngai, arimû a watho na athuuri.

⁴⁴ Judasi nîwambîte kwîra kîrîndî atîrî, “Mûndû ûrîa mûkona ngîmumunya mûkaamenya nîke, na kwoguo mûkaamûnyita na mûthiî nake mûmûrangîrîte.”

⁴⁵ Na wa rîmwe Judasi nîwathiîre kûrî Jesû na akîmwîta, “Mwarimû!” Nîwacokire akîmûmumunya.

⁴⁶ Na kwoguo andû acio nîmaanyitire Jesû.

⁴⁷ Nwatî ûmwe wa andû arîa maarûngamîte vau nîwacomorire rûviû rwake na akîrenga gûtû kwa ngombo ya Mûthînjîri-Ngai ûrîa mûnene.

⁴⁸ Nake Jesû nîwamerire atîrî, “Mûkîte kûnyita mûkuuîte mviû na njokoma takwa mûkîte mûcunani?

⁴⁹ Nîrekaraga ngîmûthomithagia hekarûrî mûthenya wa mûthenya mûtakûnyita. Nwatî maûndû mama mekîka nîguo Mandîko Matheru mavingue.”

⁵⁰ Nao arutwa ake onthe nîmaaûrire na makîmûtiganîria.

⁵¹ Nake mwanake ûmwe werigicîte gacuka katheri, nîwaumire Jesû vuva. Nao andû acio nîmaageririe kûmûnyita,

⁵² nwatî nîwamatigîre cuka îrîa aarî nayo na akîvinyûra arî njaga.

Jesû nîwavirirwe mbere ya Kîama

⁵³ Andû arîa maamûnyitire nîmaamûvirire mûciî kwa Mûthînjîri-Ngai ûrîa mûnene. Nao anene a athînjîri-Ngai onthe, athuuri, wa vamwe na arimû a watho nîmaagomanîte kuo.

⁵⁴ Nake Petero nîwaumire Jesû vuva arî varaca na agîkinya nja ya nyomba ya Mûthînjîri-Ngai ûcio mûnene. Petero nîwekarire vau nja agîotaga mwaki arî vamwe na arangîri.

⁵⁵ Nao anene a athînjîri-Ngai, na Kîamma kîonthe nîmaacaragia ûira ûrîa mangîruta nîguo maûragithie Jesû nwatî ûgîtura.

⁵⁶ Andû eengî nîmaarutire ûira wa maveeni wîgiî Jesû, nwatî ûira wao nîwavînganaga.

⁵⁷ Nao andû amwe nîmaarûngamire na makîmûthanîrîria atîrî,

⁵⁸ “Nîtwamwîguire akiuga atîrî, ‘Nie nîngwomomora hekarû îno îthondeketwe nî andû, na vuva wa mîthenya îthatû njoke ndume îngî, îrîa îtathondeketwe nî andû.’ ”

⁵⁹ Nwatî wana mauga ûguo ûira wao nwa wavînganaga.

⁶⁰ Nake Mûthînjîri-Ngai mûnene nîwarûngamire mbere yao na akîûria Jesû atîrî, “Anga we ndûrî na ûndû ûngîcokia îgûrû rîa maûndû mama monthe ûrathitangwa namo?”

⁶¹ Nwatî Jesû ndaamatumûka, aakirire kivi. Wana rîngî Mûthînjîri-Ngai mûnene nîwaûririe Jesû atîrî, “We nîwe Mesaya, Mûriû wa Ngai ûrîa Mûrathime?”

⁶² Nake Jesû nîwamacokerie atîrî, “Îni, nînie ke. Na nîmûkoona Mûrû wa Mûndû ekarîte mwena wa ûrîo wa Ngai mwene vinya wonthe na agîûka arî matuurî ma îgûrû.”

⁶³ Nake Mûthînjîri-Ngai mûnene nîwatembûrangire nguo ciake arakarîte mûno akiugaga atîrî, “Gûtirî aira engî tûrenda.

⁶⁴ Mue nîmweîguîra akîruma Ngai! Nîmuga atîa îgûrû rîake.?” Nao andû onthe nîmaamûtuîrîre aûragwe.

⁶⁵ Nao andû amwe gatagatîrî kao nîmaambîrîrie gûtuîra Jesû mata, makîmûkunîka metho, na makîmûriva na mvî makîmwîraga atîrî, “Tecirîrie nî ûrîkû wakûringa.” Arangîri wa nao nîmaamûrivire.

Petero nîwakaanire Jesû

⁶⁶ Vîndî îrîa Petero aarî vau nja ya kîvaro, mwîrîtu ûmwe warî ndungata ya Mûthînjîri-Ngai mûnene nîwakinyire.

⁶⁷ Rîrîa oonire Petero agîota mwaki, nîwamûroririe mûno na akîmwîra atîrî, “Wa nawe mûrarî na Jesû wa Nazarethi.”

⁶⁸ Nake Petero nîwakaanire akiugaga atîrî, “Nie ndiîcî ûguo, na ndirataûkîrwa nî ûrîa ûrauga.” Petero auga ûguo, nîwacokire akiuma varîa aarî na akîthiî ya mwîrîgarî. Na vîndî wa îo ngûkû nîyagambire.

⁶⁹ Nake mwîrîtu ûcio nîwonire Petero na wa rîngî akîambîrîria kwîra arîa maarûngamîte vo atîrî, “Mûndû ûyû nî ûmwe wa arîa maraarî na Jesû!”

⁷⁰ Nwatî Petero nîwakaanire rîngî. Na kavinda kanini kavîtûka, andû arîa maarûngamîte vo nîmeerire Petero atîrî, “We nwa nginya wîthîrwe wî ûmwe wa arîa mararî nake nîûndû wî Mûgalili.”

⁷¹ Nwatî Petero nîwambîrîrie kwîvîta akiugaga atîrî, “Nîraria ûma na Ngai nî mûira atî nie ndicî mûndû ûcio mûraria ûvoro wake!”

⁷² Na kavinda wa kau ngûkû nîyagambire riita rîa kaîrî. Nake Petero nîwaririkanire ûrîa Jesû aamwîrîte atî, “Mbere ya ngûkû îgambe maita maîrî nîûkwîthîrwa ûngaanîte maita mathatû.” Nake Petero nîwatumûkire na kîrîro.