Luka 6 - ÎVUKU RÎA ÛVORO MWARO

Kîûria kîgiî mûthenya wa thavatû

¹ Mûthenya ûmwe wa thavatû rîrîa Jesû na arutwa ake mathiîrîrîte mîgûndarî ya ngano. Arutwa ake nîmaatuire igira cia ngano, makîirikitha na makîambîrîria kûrîa ngano.

² Nao Afarisai amwe nîmaamûririe atîrî, “Nîndûî kîratûma mue mwîke ûrîa Watho wetû ûgirîtie gwîkwe mûthenya wa thavatû?”

³ Nake Jesû nîwamacokerie atîrî, “Anga mûtianathoma ûrîa Daudi eekire vîndî îrîa ke na arîa maarî nake maavûtire?

⁴ Daudi aatonyire nyombarî ya Ngai, agîoca mîgate îrîa yategeretwe Ngai, akîrîa na agîcoka akînengera andû arîa maarî nake. Ûguo nîguo ke eekire wana ethîrwa Watho wetû ndwîtîkîrîtie mûndû wîngî kûrîa mîgate îo tiga athînjîri-Ngai onga.”

⁵ Nake Jesû akîrîkîrîria nîwamerire atîrî, “Mûrû wa Mûndû nî Mwathani nginya wa mûthenya wa thavatû.”

Jesû nîwavonirie mûndû wonjete njara

⁶ Mûthenya wîngî wa thavatû, Jesû nîwatonyire îvoerorî na akîthomithîria andû kuo. Nakuo kûu îvoerorî kwarî na mûndû warî na njara yake ya ûrîo yonjete.

⁷ Nao arimû a Watho na Afarisai nîmaacaragia ûndû ûrîa mangîthitanga Jesû naguo na kwoguo nîmaamûtuîririe mûno nîguo moone kana nîakûvonania, mûthenya wa thavatû.

⁸ Nwatî Jesû nîwamenyaga meciria mao, na kwoguo nîwerire mûndû ûcio wonjete njara yake atîrî, “Ûka na ûrûngame ava.” Mûndû ûcio nîwarûngamire na akiumîra vau mbere.

⁹ Nake Jesû nîwamerire atîrî, “Nie nîrenda kûmûria watho wetû ûtwîtîkîrîtie twîkage atîa mûthenya wa thavatû? Ûtwîtîkîrîtie tûtethanagie kana tûnûvanage! Kûvonokia mwoyo wa mûndû kana gûûcûkangia?”

¹⁰ Nake Jesû nîwacokire akîroria andû acio onthe na akîîra mûndû ûcio atîrî, “Kûnjûra njara yaku.” Nake mûndû ûcio nîwekire ûguo na njara yake îkîvona.

¹¹ Nao andû acio nîmaatûmbirwe nî marakara na makîambîrîria kûrania ûrîa magwîka Jesû.

Jesû nîwathuurire Atûmwa îkûmi na aîrî

¹² Na mîthenyarî îo, Jesû nîwathiîre kîrîmarî îgûrû kûvoya na agîkara kuo ûtukû mûgima akîvoyaga Ngai.

¹³ Na kîraûko gwakîa, Jesû nîwetire arutwa ake na gatagatîrî kao akîîthuurîra îkûmi na aîrî, arîa eetire atûmwa.

¹⁴ Nao maarî; Simoni (ûrîa aatuîrîre rîîtwa akîmwîta Petero), na mûrwang'ina Enderea; Jakuvu na mûrwang'ina Johana, Filipu, Batholomayo,

¹⁵ Mathaayo, Toma, Jakuvu mûrû wa Alufayo, Simoni (ûrîa wetagwa Zeloti),

¹⁶ Judasi mûrû wa Jakuvu, na Judasi Mûsikariota ûrîa wacukanîrîre Jesû.

Jesû nîwathomithirie na akîvonania

¹⁷ Vîndî îrîa Jesû aanyûrûrûkire aumîte kîrîmarî arî vamwe na atûmwa ake, nîwarûngamire vandû varaganu arî vamwe na gîkundi kînene mûno Kîam arutwa ake. Nao andû eengî mûno arîa maaumîte matûûrarî ma Judea, Jerusalemu na nginya matûûrarî ma Turo na Sidoni marîa maarî ndeererî cia îria, nîmaathiîre kûrî Jesû nîguo mamûthikîrîrie na mavonue mîrimû yao.

¹⁸ Wana nginya andû arîa maathînagua nî ngoma nîmaavonirue.

¹⁹ Nao arwaru onthe nîmaageragia kûmûvutia nîûndû vinya nîyaumaga kûrî ke na îkamavonia onthe.

Kîrathimo na kîeva

²⁰ Jesû nîwaroririe arutwa ake na akîmeera atîrî, “Kûrathimwa nîmue athîni, nîûndû Ûthamaki wa Ngai nî wenyu!

²¹ Kûrathimwa nîmue arîa avûtu rîu, nîûndû nîmûkaavaithua! Kûrathimwa nîmue arîa mûrarîra rîu, nîûndû nîmûkaatheka!

²² Kûrathimwa nîmue vîndî îrîa andû mamûmena, mamûrega, mamûruma, na mamûcambia nîûndû wa Mûrû wa Mûndû.

²³ Vîndî îrîa gwekîka ûguo, kenagani na mûgacanjamûka nîûndû nîmwigîrîtwe kîveo kînene mûno îgûrû nîûndû ûguo nwaguo methe ma andû acio meekire arathi.

²⁴ “Na kaî mue andû arîa atongu rîu mûrî na thîna-î! Nîûndû mue mûrî anyitu kîrîa kîmwîganaga ûtûûrorî wenyu.

²⁵ Na kaî mue andû arîa avau rîu mûrî na thîna-î! Nîûndû mue nîmûkaavûta. Na kaî mue mûratheka rîu mûrî na thîna-î! Nîûndû mue nîmûkegua kîeva na mûrîre!

²⁶ Na kaî mue andû arîa mûkumagua nî andû onthe mûrî na thîna-î! Nîûndû ûguo nwaguo methe ma andû acio meekire arathi a maveeni.”

Endagani nthû cienyu

²⁷ “Namue andû arîa mûnthikîrîrîtie nîramwîra atîrî: Endagani nthû cienyu. Nao andû arîa mamûmenete mekageni waro.

²⁸ Arîa mamwimagîra irî, metagîrieni kîrathimo kuuma kûrî Ngai, na mûvoyagîre arîa mamwîkaga naaî.

²⁹ Mûndû angîgûcamûra rûvî rûthîa rwa mwena ûmwe, mûvûgûrîre wana rûu rwîngî arûcamûre. Na mûndû angîgûcuna îgooti rîaku, mwîtîkîrie oce nginya cati yaku.

³⁰ Mûndû wa wonthe angîkûvoya kîndû mûve, na mûndû wa wonthe angîgûcuna kîndû gîaku, ndûkamwîtie.

³¹ Îkaga andû arîa engî wata ûrîa ûngîenda o magwîke.”

³² “Mûngîrathimwa atîa, angîthîrwa mûkendaga tu wa andû arîa mamwendete? Wana nginya evia nîmendaga andû arîa mamendete!

³³ Kûngîtuîka atî andû arîa mamwîkaga waro nwao mûgeekaga waro, mûngîrathimwa atîa? Wana nginya evia nîmekaga wa guo!

³⁴ Na kûngîtuîka atî andû arîa mamûrîvaga nwao mûgaakombithagia, mûngîrathimwa atîa? Wana nginya evia nîmakombithagia evia arîa engî nîguo makaarîva na kîthimi wata kîu!

³⁵ Vandû va ûguo, endagani nthû cienyu na mûciîkage waro na mûkombithanagie mûtakûgîa na mwîvoko wa gûkaarîvwa. Namue nîmûkaagîa na îgai rînene na mûtuîke ciana cia Ngai ûrîa ûrî Îgûrû Mûno. Nîûndû Ngai arî ntha kûrî andû arîa matarî ngatho na arîa methagîrwa marî na mîtugo mîcûku.

³⁶ Kwoguo îgucanagîrani ntha wata ûrîa îthe wenyu amwîgucagîra ntha.

Gûtucanîra ciira

³⁷ “Mûtigatucanîre ciira, na wanamue mûtigaatuîrwa. Mûtigekûûe andû arîa engî na wanamue mûtigeekûûîrwa. Ovanagîrani na wanamue nî mûkooverwa.

³⁸ Vecanagani namue nîmûkaavewa iveo nî Ngai, mwîcûrîrîtue, igakindîrwa, ikainainua na ikathûmbwa. Nîûndû kîthimi kîrîa mûthimanagîra nakîo nîkîo Ngai akaamûthimîra nakîo.”

³⁹ Nake Jesû nîwacokire akîva arutwa ake ngerekano akîmeera atîrî, “Angwa ngaûria! Mûtumumu nwa onie mûtumumu ûrîa wîngî njîra? Na kinthî wa oîrî tîkwa mangîvarûka îrimarî?

⁴⁰ Gûtirî mûrutwa ûngîneneva gûkîra mwarimû wake, nwatî mûrutwa wa wonthe angîthomithua viû atuîkaga ta mwarimû wake.

⁴¹ “Nîndûî gîtûmaga wone kîvuti kîrîa kîrî riithorî rîa mûrûanyûkwe, nwatî ûkaremwa nî kwona gîting'û kîrîa kîrî riithorî rîaku?

⁴² Ûngîvota kwîra mûrûanyûkwe atî nîûkûmûruta kîvuti kîrîa kîrî riithorî rîake atîa, wa rîrîa we ûtangîvota kwona gîting'û kîrîa kîrî riithorî rîaku? We mvinga îno! Amba ûrute gîting'û kîrîa kîrî riithorî rîaku, nîguo ûvote kwona waro ûkîruta kîvuti kîrîa kîrî riithorî rîa mûrûanyûkwe!

Mûtî na maciaro ma guo

⁴³ “Gûtirî mûtî mwaro ûngîciara maciaro macûku kana mûtî mûcûku ûciare maciaro maro.

⁴⁴ Wa mûtî ûmenyekaga na maciaro ma guo. Nîûndû ngûyû ititucagwa mîtîrî ya mîgua kana thavibu ituuwe kaiavarî.

⁴⁵ Mûndû mwaro aragia maûndû maro marîa maumîte ngororî yake. Nake mûndû mûcûku aragia maûndû macûku marîa maumîte ngororî yake. Mûndû aragia maûndû marîa mecûrîte ngororî yake.

Atumi aîrî a nyomba

⁴⁶ “Nîndûî gîtûmaga mûmbîte, ‘Mwathani, Mwathani,’ na mûtiîkaga maûndû marîa nîmwîraga mwîke?

⁴⁷ Mûndû wa wonthe ûkaga kûrî nie, akegua ciugo ciakwa na agaciathîkîra, nîngûmwonia ûrîa ke ekariî.

⁴⁸ Ekariî ta mûtumi wa nyomba ûrîa wambire kwînja mûcingi mûrikîru na akîûthondeka rûciararî. Vîndî îrîa rûnjî rwaunire manjî maruo nîmaaringire nyomba îo na vinya, nwatî matiaminainia nîûndû yarî ndume waro.

⁴⁹ Nwatî mûndû wa wonthe ûrîa wîgucaga ciugo ciakwa na akarega gûciathîkîra ekariî ta mûndû ûrîa watumire nyomba atambîte kûthondeka mûcingi. Vîndî îrîa rûnjî rwaunire na manjî maruo makîringa nyomba îo na vinya, nyomba îo nîyomomokire wa rîmwe. Nyomba îo nîyomomokire na vinya îkîvaragana.”