Luka 3 - ÎVUKU RÎA ÛVORO MWARO

Mavunjio ma Johana Mûvatithania

¹ Mwakarî wa îkûmi na gatano wa wathani wa Tiberio, mûthamaki wa Roma, Pontio Pilato nîke warî mûnene wa Judea. Nake Herode aathanaga vûrûrirî wa Galili, nake mûrwang'ina Filipu aathanaga icunjî cia Iturea na Turakoniti. Nake Lisania aathanaga vûrûrirî wa Abilene.

² Nao Anasi na Kaiafa nîo maarî anene a athînjîri-Ngai. Vîndî îo, ndûmîrîri ya Ngai nîyakinyîre Johana mûvîcî wa Zakaria arî werûrî.

³ Kwoguo Johana nîwathiîre akîvunjagia vûrûrirî wonthe ûrîa wakuvîvîrîtie rûnjî rwa Jorodani akiugaga atîrî, “Îîrireni mûcoke mûvatithue, nake Ngai nîakûmwovera mevia menyu.”

⁴ Wata ûrîa mûrathi Isaia aarathire akiuga atîrî, “Kûrî na mûndû ûranîrîra werûrî akauga: ‘Varîriani njîra ya Mwathani; na mûrûngarie tûcîra twake!

⁵ Cianda cionthe nîigeecûrua, na irîma cionthe na tûrîma tûvaraganue. Nakuo kûrîa gûtarî kûrûngarû kûrûngarue, na kûrîa gûtarî kwaraganu kwaraganue.

⁶ Nao andû onthe nîmakoona ûvonokio wa Ngai!’ ”

⁷ Andû eengî nîmaathiîre kûrî Johana nîguo amavatithie. Nake nîwameraga atîrî, “Mue ciana ino cia njoka! Nû ûmwîrîte atî nwa mûvote kûûrîra marakara ma Ngai marîa mageere gûka?

⁸ Îkani ciîko irîa ikwonania atî nîmwîrirîte mevia menyu. Mûtikambîrîrie kwîîra na ngoro cienyu atî, Iburahimu nîke îthe wenyu wa tene. Nie nîramwîra atî Ngai nwa oce mathiga mama na athondekere Iburahimu ciana kuuma kûrî mo!

⁹ Wana rîu îthanwa nîrige gîtinarî Kîam mûtî. Kwoguo mûtî wa wonthe ûtaciaraga maciaro maro, nîûgûtemwa na wikue mwakirî.”

¹⁰ Nao andû nîmaamûririe atîrî, “Kwoguo nîtwîka atîa vi?”

¹¹ Nake Johana nîwamacokerie atîrî, “Mûndû wonthe ûrî na cati igîrî nwa nginya ave ûrîa ûtarî, na mûndû wa wonthe ûrî na irio nwa nginya agaîre ûrîa ûtarî.”

¹² Nao etia amwe a mbeca cia gooti nîmaathiîre kûvatithua na makîmûûria atîrî, “Mwarimû, tue natue twagîrîrwe nî gwîka atîa?”

¹³ Johana nîwamacokerie atîrî, “Tigagani gwîtia andû mbeca nyîngî gûkîra ûrîa watho ûmwîtîkîrîtie.”

¹⁴ Nao athigari amwe nîmaacokire makîmûria atîrî, “Rîu natue-rî nîtwîka atîa?” Johana nîwamacokerie atîrî, “Tigagani gûcuuna mûndû wana ûmwe mbeca ciake na vinya kana mwigîrîre mûndû kîng'enyo. Îganagwani nî mûcara wenyu.”

¹⁵ Andû nîmaambîrîrie kûgîa na mwîvoko mûnene nîûndû wa ndûmîrîri îrîa Johana aavecanaga. Kwoguo nîmaambîrîrie kwîyûria na ngoro ciao kana Johana nîke Mesaya.

¹⁶ Nwatî Johana nîwerire andû onthe atîrî, “Nie nîmûvatithagia na manjî, nwatî ûrîa mûnene kûngîra nîaûkîte. Na nie ndirî mwagîrîru wa kwovora ndigi cia iratû ciake. Ke akaamûvatithagia na Roho Mûtheru na mwaki.

¹⁷ Nake rîu nîanyitîte gîtaararû nîguo agûrûkie ngano, na aithuuranîre aciige îkûmbîrî, acoke oce macaki amavîvie na mwaki ûrîa ûtavoraga.”

¹⁸ Johana nîwavunjîrie andû Ûvoro Mwaro agîtûmagîra njîra nyîngî akîmeeraga marûngarie mîthiîre yao.

¹⁹ Johana nîwatetirie Herode ûrîa warî mûnene nîûndû Herode nîwocete Herodia ûrîa warî mûka wa mûrwang'ina akamûtua mûka, na agacoka ageka maûndû meengî ma waganu.

²⁰ Ûndû wîngî warî mûcûku mûno ûrîa Herode eekîte nî atî nîwavingîrithîtie Johana njera.

Kûvatithua kwa Jesû

²¹ Rîrîa andû onthe maarîkirie kûvatithua, Jesû nîwacokire akîvatithua. Na vîndî îrîa avoyaga Ngai, îgûrû nîrîavingûkire

²² na Roho Mûtheru akîmûnyûrûrûkîra ekariî ta ndutuura. Naguo mûgambo nîwaumire na îgûrû ûkiugaga atîrî, “We nîwe Mûrû wakwa ûrîa mendete; nie nîngenetue nîwe.”

Mûtaratara wa methe ma tene ma Jesû

²³ Vîndî îrîa Jesû aambîrîrie wîra wake, aarî na ûkûrû ta wa mîaka mîrongo îthatû. Andû meciragia Jesû aarî mûvîcî wa Josefu, mûvîcî wa Heli,

²⁴ Heli aarî mûvîcî wa Mathati, mûvîcî wa Lawi, mûvîcî wa Meliki, mûvîcî wa Janai, mûvîcî wa Josefu,

²⁵ mûvîcî wa Matathia, mûvîcî wa Amosi, mûvîcî wa Nahumu, mûvîcî wa Esili, mûvîcî wa Nagai,

²⁶ mûvîcî wa Maathi, mûvîcî wa Matathia, mûvîcî wa Sumeini, mûvîcî wa Joseki, mûvîcî wa Joda,

²⁷ mûvîcî wa Joanani, mûvîcî wa Resa, mûvîcî wa Zerubabeli, mûvîcî wa Salathieli, mûvîcî wa Neri,

²⁸ mûvîcî wa Meliki, mûvîcî wa Adi, mûvîcî wa Kosamu, mûvîcî wa Elimadami, mûvîcî wa Eri,

²⁹ Mûvîcî wa Joshua, mûvîcî wa Eliezeri, mûvîcî wa Jorimu, mûvîcî wa Mathati, mûvîcî wa Lawi,

³⁰ mûvîcî wa Simioni, mûvîcî wa Juda, mûvîcî wa Josefu, mûvîcî wa Jonamu, mûrû wa Eliakimu,

³¹ mûvîcî wa Melea, mûvîcî wa Mena, mûvîcî wa Matatha, mûvîcî wa Nathani, mûvîcî wa Daudi,

³² mûvîcî wa Jesse, mûvîcî wa Obedi, mûvîcî wa Boazu, mûvîcî wa Salimoni, mûvîcî wa Nahashoni,

³³ mûvîcî wa Aminadabu, mûvîcî wa Adimini, mûvîcî wa Aroni, mûvîcî wa Hezironi, mûvîcî wa Perezi, mûvîcî wa Juda,

³⁴ mûvîcî wa Jakovu, mûvîcî wa Isaka, mûvîcî wa Iburahimu, mûvîcî wa Tera, mûvîcî wa Nahoru,

³⁵ mûvîcî wa Sheragi, mûvîcî wa Reu, mûvîcî wa Pelegi, mûvîcî wa Eberi, mûvîcî wa Shela,

³⁶ mûvîcî wa Kainani, mûvîcî wa Afakisadi, mûvîcî wa Shemu, mûvîcî wa Noa, mûvîcî wa Lameki,

³⁷ mûvîcî wa Methusela, mûvîcî wa Enoku, mûvîcî wa Jeradi, mûvîcî wa Mahalaleli, mûvîcî wa Kainani,

³⁸ mûvîcî wa Enosi, mûvîcî wa Sethi, mûvîcî wa Adamu, mwana wa Ngai.