Kîam 50 - ÎVUKU RÎA ÛVORO MWARO

¹ Josefu nîwenamîrîre varî îthe, akîmûkumbatîria na akîmûmumunya akîrîraga.

² Nîwacokire akîatha ndungata ciake ciûmithie mwîrî wa îthe. Nao nîmeekire guo.

³ Mwîrî wa Jakovu îthe wa Josefu waûmithirue îvinda rîrîa rîagîrîrîte rîa mîthenya mîrongo îna (40). Andû a Misiri nîmaacakaire nîûndû wa gîkuû Kîam Jakovu mîthenya mîrongo mûgwanja (70).

⁴ Mîthenya ya gûcakaîra Jakovu yathira, Josefu nîwerire anene a thirikari ya mûthamaki wa Misiri atîrî, “Ethîrwa nîmbîtîkîrîkîte nî mue, nîngûmûthaitha mûthiî mwîre mûthamaki atîrî,

⁵ ‘Rîrîa vava aarî vakuvî gûkua, nîwambîrire nîmwîrîre atî nîngaamûthika mbîrîrarî îrîa aathondekete vûrûrirî wa Kanaani. Kwoguo nakûthaitha ûmbîtîkîrie nthiî ngathike vava ngînacoka.’ ”

⁶ Nake mûthamaki wa Misiri nîwacokirie atîrî, “Thiî ûkathike aguo wata ûrîa wamwîrîre.”

⁷ Kwoguo Josefu nîwathiîre kûthika îthe. Nacio ndungata cionthe cia mûthamaki wa Misiri, atongoria onthe na athuuri onthe a Misiri nîmaathiîre vamwe na Josefu.

⁸ Andû a mûciî wa Josefu, aa mûrwang'ina na andû onthe a nyomba ya îthe nîmaathiîre vamwe na Josefu. Ciana, ng'ondu, mbûri na ng'ombe nîcio tu ciatigirwe vûrûrirî wa Gosheni.

⁹ Nîmaathiîre marî gîkundi kînene mûno. Amwe maakuuîtwe nî ikaari cia mbarathi na engî mekarîrîte mbarathi.

¹⁰ Rîrîa maakinyire îtîrirî rîa Atadi, varîa ngano ciavûragîrwa mwena wa îveti wa Jorodani, nîmaacakaire kavinda karaca maugîrîrîtie. Josefu nîwacakaîre îthe mîthenya mûgwanja.

¹¹ Rîrîa andû a Kanaani moonire andû acio magîcakaya marî îtîrirî rîa Atadi nîmaaugire atîrî, “Andû a Misiri marî na kîeva kînene mûno!” Kîu nîkîo gîatûmire vandû vau vetwe Abeli-miziraimu.

¹² Kwoguo avîcî a Jakovu nîmeekire wata ûrîa amaathîte.

¹³ Nîmaakuuire mwîrî wake makîûvira Kanaani na makîûthika ngurungarî îrîa yarî mûgûndarî wa Makipela mwena wa îrathîro wa Mamure. Ngurunga îo nî îrîa Iburahimu aagûrire wa vamwe na mûgûnda kuuma kûrî Efironi ûrîa Mûhiti nîguo agîe na vandû va kûthikanaga.

¹⁴ Vuva wa kûthika îthe, Josefu nîwacokire Misiri marî vamwe na aa mûrwang'ina na andû onthe arîa maathiîte nake kûthika îthe.

Josefu nîwaûmîrîrie aa mûrwang'ina

¹⁵ Rîrîa aa mûrwang'ina na Josefu moonire atî îthe nîwakua, nîmeyûririe atîrî, “Twa kwîthîrwa Josefu atûûraga atûmenete na rîu nîakwîrîvîrîria maûndû macûku marîa twamwîkire?”

¹⁶ Kwoguo nîmaatûmire andû kûrî Josefu makamwîre atîrî “Mbere ya vava akua,

¹⁷ aatwîrire tûkwîre atî ‘Ûrekere aa mûrwanyûkwe mavîtia marîa maagwîkire.’ Rîu tue ndungata cia Ngai wa aguo twakûthaitha ûtûrekere mavîtia marîa twakûvîtîrie.” Josefu nîwarîrire egua ndûmîrîri îo.

¹⁸ Aa mûrwang'ina na Josefu nîmaacokire magîûka o ene na makînamîrîra mbere ya Josefu makîmwîra atîrî, “Tue tûrî ndungata ciaku.”

¹⁹ Nwatî Josefu nîwamerire atîrî, “Nie ndingîvota gwîka ûrîa Ngai angîka? Tigani kûmaka.

²⁰ Mweciragia mwambîkaga ûndû mûcûku, nwatî Ngai nîwatûmire ûndû ûcio ûtuîke mwaro nîguo andû engî matigakue wata ûrîa mûrona gwîkariî ûmûnthî.

²¹ Kwoguo mûtiagîrîrwe nî gwîtigîra. Nîngûthiî na mbere kûmûmenyerera wa vamwe na ciana cienyu.” Kwoguo Josefu nîwamaûmîrîrie wa rîngî na akîmarîria waro mûno.

Gûkua kwa Josefu

²² Josefu nîwathiîre na mbere gûtûûra Misiri vamwe na andû a nyomba ya îthe. Nîwatûûrire mîaka îgana rîmwe rîa îkûmi (110).

²³ Josefu nîwakûrire nginya akîona ciana cia Efiraimu, wana ciana cia ciana cia Efiraimu. Josefu nîwatûûrire nginya akîgwata ciana cia Makiru mûvîcî wa Manase.

²⁴ Josefu nîwerire aa mûrwang'ina atîrî, “Nîrî vakuvî gûkua. Nwatî gûtirî nganja Ngai nîakaamûtongoria amûrute vûrûrirî ûyû amûvire vûrûrirî ûrîa erîre Iburahimu, Isaka na Jakovu.”

²⁵ Josefu nîwacokire akîra andû ake mevîte atîrî, “Rîrîa Ngai akaamûtongoria amûvire vûrûrirî ûcio, nîmûgaakuua mavîndî ma mwîrî wakwa mûthiî namo.”

²⁶ Kwoguo Josefu nîwakuuire arî Misiri arî na ûkûrû wa mîaka îgana rîa îkûmi (110). Nîmaaûmithirie mwîrî wake na magîwîkîra îthandûkûrî rîa kûûthika.