Kîam 44 - ÎVUKU RÎA ÛVORO MWARO

Gîkombe kîrîa kîaûrîte

¹ Josefu nîwacokire akîatha ndungata îrîa yamenyagîrîra gwake mûciî atîrî, “Îcûrîria andû aya irio wa irîa mangîvota gûkuua nguniarî ciao, na mbeca cia wa mûndû ciîkîrwe nguniarî yake.

² Îkîra gîkombe gîakwa gîa sîlûva mûromorî wa ngunia ya mûrwang'ina ûrîa mûnini vamwe na mbeca ciake cia kûgûra irio.” Ndungata îo nîyekire ûguo yerirwe nî Josefu.

³ Kîraûko tene mûthenya ûcio wîngî, nîmarekererue menûke na mvunda ciao.

⁴ Matarî marathiî kûraca mûno, Josefu nîwerire ndungata îrîa yamenyagîrîra gwake mûciî atîrî, “Vinyûra narua ûrûmîrîrie andû acio na wamakinyîra ûmaûrie atîrî, ‘Nîndûî gîgûtûma mûrîvia waro na naaî?

⁵ Nîndûî gîtûmire mwîe gîkombe gîa sîlûva Kîam mûnene wakwa na nîkîo aragûraga nakîo? Ûguo mwîkire nî naaî mûno!’ ”

⁶ Rîrîa ndungata îo yamakinyîre nîyacokere ciugo wa icio.

⁷ Nao nîmaamûririe atîrî, “Mwathi wetû, ûkîaria ûguo ûrenda kuga atîa? Nama tûtirî eku ûndû ta ûcio.

⁸ We nîwîcî atî tûkiuma Kanaani, nîtûracokirie mbeca irîa twonire mîromorî ya ngunia cietû. Tûngîîa sîlûva kana thaavu kuuma mûciî kwa mwathi waku nîkî?

⁹ Ûrîa ûkethîrwa arî nakîo gatagatîrî getû, nîaûragwe nao acio engî matuîke ngombo cia mwathi wetû.”

¹⁰ Nake nîwamerire atîrî, “Îî, nînetîkia ûguo mwauga, nwatî ûcio wocete gîkombe nîke tu ûgûtuîka ngombo yakwa, nao acio engî mathiî.”

¹¹ Kwoguo wa mûndû nîwaigire ngunia yake nthî na akîmîvingûra.

¹² Nayo ndungata îo ya Josefu nîyacaririe gîkombe kîu nguniarî ya wa mûndû kwambîrîria ûrîa mûkûrû nginya ûrîa mûnini. Gîkombe kîu nîkîonekire nguniarî ya Benjamini.

¹³ Nao nîmaatembûrangire nguo ciao marî na kîeva, magîkuithia mvunda mîrigo, na magîcoka îtûûrarî.

¹⁴ Rîrîa Juda na aa mûrwang'ina maacokire kwa Josefu mûciî, nîmaamwîthîrîrie kuo na makînamîrîria mothiû mao marî mbere yake.

¹⁵ Nake Josefu nîwamerire atîrî, “Mweka ûguo nîkî? Nîkwa mûtaicî atî mûndû ta nie nwa aragûrie na akamenya ûrîa mwîkire?”

¹⁶ Juda nîwacokirie atîrî, “Tue tûngîkwîra atîa mwathi wetû? Tûngîkararia atîa? Tûngîîtigithia atîa? Ngai nîwonanîtie mevia metû tue ndungata ciaku. Kwoguo tue tuonthe tûrî ngombo ciaku vamwe na ûcio wanyitwa arî na gîkombe.”

¹⁷ Nwatî Josefu nîwamerire atîrî, “Naarî! Nie ndingîka ûguo! Nwa mûndû ûrîa ûraarî na gîkombe ûgûtuîka ngombo yakwa. Nwatî mue cokani kûrî aguo na thayû.”

Juda nîwathaithanîre Benjamini

¹⁸ Juda nîwathiîre kûrî Josefu na akîmwîra atîrî, “Mwathi wakwa, nakûthaitha ûmbîtîkîrie mbarie nawe nie ndungata yaku, na ndûkarakare nîûndû wakwa. Nîmbicî we ûrî na ûvoti ta wa mûthamaki wa Misiri ke mwene.

¹⁹ Mwathi wetû rîrîa twarî Misiri vîndî ya mbere nîwatûririe atîrî, ‘Aguo arî vo, na mûrî mûrwanyûkwe wîngî?’

²⁰ Nîtwagûcokerie atîrî, ‘Îî, tûrî na vava na nî mûkûrû na tûrî mûrwaiya wîngî na nîke kîvinga nda kîrîa vava aagîre na ûkûrû. Mûrwang'ina na mwanake ûcio nîwakwire na nîke tu ûtigarîte varî ng'ina mûmûciari. Îthe nîamwendete mûno.’

²¹ We nîwatwîrire tûmûrete gûkû nîguo ûmwone,

²² natue tûgîgûcokeria tûgîkwîra atî kamwana kau gatingîrekua nî îthe nîûndû kangîmûtiga, ke nwa akue.

²³ Nîwacokire ûgîtwîra atîrî, ‘Ethîrwa mûtigaaûka na mwanake ûcio wenyu mûnini, ndigetîkîra kwonana namue rîngî.’

²⁴ “Rîrîa twacokire kûrî vava nîtwamwîrire ûrîa waugire.

²⁵ Vava nîwatwîrire tûcoke rîngî tûgûre irio nini.

²⁶ Natue nîtwamwîrire atîrî, ‘Tîtûthiî nîûndû tûtingîtîkîrua twonane na Josefu tûtarî na mûrwaiya ûcio mûnini. Tûngîtîkîrua tûmwone ethîrwa nwa tûthiî na mwanake ûcio mûnini.’

²⁷ Nake vava nîwatwîrire atîrî, ‘Nîmwîcî atî mûka wakwa Rakeli aanjiarîre anake aîrî;

²⁸ ûmwe nîwandigire, na nwanginya ethîrwe aarîrwe nî nyamû cia kîthaka nîûndû kuuma rîrîa aathiîre, ndianamwona.

²⁹ Ethîrwa nîmûgwoca ûyû wanake kuuma kûrî nie na acoke one mûtino rûgendorî rûu mûthiîte, nîmûgûtûma ngîe na kîeva kîngîmbûraga nîrî mûthuuri mûkûrû.’

³⁰ “Kwoguo mwathi wakwa, wona nathiî kûrî vava ndungata yaku ndarî na mwanake ûyû na aigîtwe mwoyo nî mwanake ûyû,

³¹ rîrîa akoona atî tûtirî nake nîkwa agaakua nîûndû wa kîeva nîûndû wa ûrîa amwendete.

³² Nînevîtire mbere ya vava atî nîngûtuîka mûmenyereri wa mwanake ûcio. Nînaamwîrire atî narega gûcoka na mwanake ûcio, ngaacokererwa nî kîrumi tene na tene.

³³ Kwoguo mwathi wakwa, tiga mbîkare gûkû nîrî ngombo yaku vandûrî va mwanake ûcio. Mwîtîkîrie acoke na aa mûrwang'ina.

³⁴ Nîngîcoka atîa kûrî vava ethîrwa tîtûthiî na mwanake ûcio? Nie tînyûmîrîria kwona maûndû macûku marîa mangîûka kûrî vava.”