Kîam 35 - ÎVUKU RÎA ÛVORO MWARO

Jakovu arî Betheli nîwarathimirwe nî Ngai

¹ Ngai nîwerire Jakovu atîrî, “Ûkîra ûthiî Betheli ûtûûre kuo; na ûtumîre Ngai metha ya kîgongoona kuo. Ngai ûcio nîke wakumîrîre rîrîa waûraga nî mûrwanyûkwe Esaû.”

² Jakovu nîwerire andû a mûciî wake na arîa onthe maarî nake atîrî, “Tani ngai ng'eni irîa mûrî nacio, mwîtherie, mûrute nguo irîa mûrî nacio mwîkîre ciîngî.

³ Tigani tûkîre tûthiî Betheli, nîguo ngatumîre Ngai metha ya kîgongoona. Ngai ûcio nîke wandethirie rîrîa naarî thînarî, na nîke wîthîrîtwe arî vamwe nanie kûrîa kwonthe naathiîcaga.”

⁴ Kwoguo nîmaanengere Jakovu ngai cionthe ng'eni irîa maarî nacio, na mindo irîa mekîrîte matû. Jakovu nîwaithikire rungu rwa mûtî wa mûvuru vakuvî na Shekemu.

⁵ Rîrîa Jakovu na avîcî ake maambîrîrie rûgendo, andû a matûûra marîa maamathiûrûrûkîrîtie nîmaanyitirwe nî guoya nyîngî kuuma kûrî Ngai. Kwoguo nîmaaremirwe nî kûmarûmîrîria.

⁶ Jakovu na andû ake onthe nîmaakinyire Luzi (na nîkuo gwîtagwa Betheli) vûrûrirî wa Kanaani.

⁷ Nîwatumire metha ya kîgongoona vau na agîîta vandû vau Eli-betheli, nîûndû kûu nîkuo Ngai aamumîrîre rîrîa aaûraga kuuma kûrî mûrwang'ina Esaû.

⁸ Debora ûrîa warerire Rebeka nîwakwire na akîthikwa rungu rwa mûtî wa mûvuru mwena wa îveti wa Betheli. Kwoguo mûtî ûcio nîwetirwe Aloni-bakuthi.

⁹ Rîrîa Jakovu aaumire Padani-aramu (Mesopotamia), Ngai nîwamumîrîre rîngî na akîmûrathima.

¹⁰ Ngai nîwamwîrire atîrî, “We wîtagwa Jakovu, nwatî kuuma rîu ûgetagwa Isiraeli.” Kuuma vîndî îo Jakovu nîwambîrîrie gwîtagwa Isiraeli.

¹¹ Ngai nîwacokire akîmwîra atîrî, “Nînie Ngai mwene vinya wonthe. Ûrogîa na ciana nyîngî. Ndûrîrî nyîngî nîikauma kûrî njiarwa ciaku, na nîûgatuîka îthe wa athamaki.

¹² Nîngaakûva vûrûri ûrîa naveete Iburahimu na Isaka, na vuvarî nîûvecane kûrî njiarwa ciaku.”

¹³ Ngai nîwacokire akiuma vau maaragîria na akîthiî.

¹⁴ Jakovu nîwavandire îthiga rîa kîririkano vandû vau Ngai aamwaragîria arî, na akîrîtîrîria îtega rîa indo cia kûnyuwa na maguta, akîrîrathima.

¹⁵ Nîwacokire agîta vandû vau maragîria na Ngai Betheli.

Rakeli nîwakwire

¹⁶ Jakovu na andû a mûciî wake nîmaaumire Betheli. Na marî varaca na Efiratha, îvinda rîa Rakeli rîa kûgîa na mwana nîrîakinyire, na aarî na ûrûrû mwîngî mûno wa gûciara.

¹⁷ Rîrîa eegucaga ûrûrû mwîngî wa gûciara, mûndûmûka wa kûmûtethereria gûciara nîwamwîrire atîrî, “Ndûkegue guoya Rakeli, nîûndû nîûkûgîa mwana wîngî wa kavîcî.”

¹⁸ Rakeli nîkwa aakucaga, nwatî mbere ya atigithana, nîwetire kaana kau Benoni, nwatî îthe agîgeta Benjamini.

¹⁹ Kwoguo Rakeli nîwakwire na akîthikwa mûkîrarî wa njîra ya kûthiî Efiratha na nîyo Bethilehemu.

²⁰ Nake Jakovu nîwavandire îthiga rîa kîririkano îgûrû rîa mbîrîra yake, na nginya ûmûnthî, îthiga rîu rîtwîre rîonanagia mbîrîra ya Rakeli.

²¹ Isiraeli nîwathiîre na mbere na rûgendo na akîamba îgema rîake mwena ûcio wîngî wa nyomba nene ya Ederi.

Avîcî a Jakovu

²² Vîndî îrîa Isiraeli aatûûraga vûrûrirî ûcio, Reubeni nîwamenyanire kîîmwîrî na Biliha ûrîa warî mûndûmûka wa kwigwa wa îthe na Isiraeli nîwamenyire ûvoro ûcio. Jakovu aarî na anake îkûmi na aîrî

²³ Avîcî a Lea maarî: Reubeni (îrikithathi rîa Jakovu), Simeoni, Lawi, Juda, Isakaru, na Zebuluni.

²⁴ Avîcî a Rakeli maarî: Josefu na Benjamini.

²⁵ Avîcî a Biliha, ndungata ya Rakeli ya mûndûmûka maarî Dani na Nafutali.

²⁶ Avîcî a Zilipa ndungata ya Lea ya mûndûmûka maarî Gadi na Asheri. Aya nîo avîcî a Jakovu arîa maaciarîrwe Padani-aramu (Mesopotamia.)

Gûkua kwa Isaka

²⁷ Jakovu nîwathiîre Mamure kûrî îthe Isaka vakuvî na Kiriathariba (na nîyo Heburoni), kûrîa Iburahimu na Isaka maatûûraga.

²⁸ Isaka aatûûrire mîaka îgana rîmwe rîa mîrongo înana,

²⁹ na agîkua arî mûkûrû mûno, nao avîcî ake, Esaû na Jakovu makîmûthika.