Kîam 27 - ÎVUKU RÎA ÛVORO MWARO

Isaka nîwarathimire Jakovu

¹ Rîrîa Isaka aakûrire na akîûra metho, nîwetire Esaû, mûvîcî ûrîa mûkûrû na akîmwîra atîrî, “Mûvîcîwa!” Nake Esaû nîwacokirie atîrî, “Îî nîrî ava.”

² Isaka nîwamwîrire atîrî, “Rîu nîngûrire, na nwa ngue vîndî wa yonthe.

³ Kwoguo oca ûta waku na mîguî, ûthiî kîthakarî na ûmbûragîre nyamû îmwe.

⁴ Ûcoke ûke ûndugîre irio mbaro irîa mendete, ûndetere ndîe, nîguo ngûrathime mbere ya ngua.”

⁵ Rebeka nîwathikîrîrîtie ndeto irîa Isaka eeraga mûvîcî Esaû. Kwoguo rîrîa Esaû aaumagarûkire akîthiî kûguîma,

⁶ Rebeka nîwerire Jakovu atîrî, “Nie negua aguo akîra mûrwanyûkwe Esaû atîrî,

⁷ ‘Ndetere nyamû na ûndugîre irio mbaro ndîe. Narîkia kûrîa nîngûkûrathima nîrî mbere ya Ngai-Mûnene mbere ya ngua.’

⁸ Rîu mwana wakwa, thikîrîria ûrîa ngûkwîra na wîke guo.

⁹ Thiî ndîthiarî ûnyite twori twîrî tûtû tûnoru, ûndetere nîguo nthondekere aguo irio mbaro irîa endete mûno.

¹⁰ Ûcoke ûmûvirîre arîe nîguo akûrathime mbere ya akua.”

¹¹ Nwatî Jakovu nîwerire ng'ina atîrî, “Mûrwaiya ethagîrwa ecûrîte njuîrî mwîrî, nwatî nie mbîthagîrwa nîrî mûtenderû mwîrî.

¹² Vava avota kûvutia mwîrî wakwa na amenye atî nîkwa nîramûveenia. Na njîra îno, nie nîngwîgîrîra kîrumi vandû va kîrathimo.”

¹³ Nake ng'ina nîwamûcokerie atîrî, “Mûvîcîwa, we îka ûrîa nîrakwîra. Thiî ûndetere twori; kîrumi kîrîa kîngîkûnyita nîkînyite nie.”

¹⁴ Kwoguo Jakovu nîwathiîre kûgîra twori na akîretera ng'ina. Nîwarugire irio mbaro irîa îthe endete.

¹⁵ Rebeka nîwacokire agîoca nguo irîa mbaro cia Esaû irîa aaigîte nyomba, na agîkîra Jakovu.

¹⁶ Rebeka nîwacokire agîoca tûrûûo twa twori na agîkîra Jakovu njara wana ngingo kûrîa gûtaarî na njuîrî.

¹⁷ Rebeka nîwanengere Jakovu irio irîa ciarî mbaro mûno vamwe na mûgate ûrîa aarugîte.

¹⁸ Jakovu nîwathiîre kûrî îthe na akîmwîra atîrî, “Vava!” Nake îthe nîwamûcokerie atîrî, “Îî; we nîwe û mûvîcîwa?”

¹⁹ Nake Jakovu nîwacokerie îthe atîrî, “Nînie Esaû, mûvîcîguo ûrîa mûkûrû; nîmbîkire ûrîa ûmbîrire. Nakûthaitha ûkîra wîkare nthî ûrîe nyama ino nakûretera nîguo ûndathime.”

²⁰ Nake Isaka nîwamûririe atîrî, “Mûvîcîwa, nîkwa wona nyamû ya kûraga na îvenya atîa?” Jakovu nîwacokerie Isaka atîrî, “Ngai-Mûnene, Ngai waku nîke ûndethirie namîona.”

²¹ Isaka nîwerire Jakovu atîrî, “Nakûthaitha ûkaûke vakuvî nîguo ngûvutie menye nama kana nîwe mûvîcîwa Esaû.”

²² Jakovu nîwathiîre vakuvî na îthe nake îthe akîmûvutia na akiuga atîrî, “Mûgambo waku ûreguîka ta wa Jakovu, nwatî njara nî cia Esaû viû.”

²³ Isaka ndaamenya Jakovu nîûndû njara ciake ciarî na njuîrî ta cia Esaû. Na arî vakuvî kûrathima Jakovu,

²⁴ nîwamûririe wa rîngî atîrî, “Nîma atî we nîwe mûvîcîwa Esaû?” Nake Jakovu nîwamûcokerie atîrî, “Îî nî nie.”

²⁵ Nake Isaka nîwaugire atîrî, “Ndetere nyama ndîe nîguo narîkia kûrîa ngûrathime.” Jakovu nîwamûvirîre nyama, na agîcoka akîmûvirîra ndivei nîguo anyue.

²⁶ Nake îthe Isaka nîwamwîrire atîrî, “Ûka vakuvî mûvîcîwa nîguo ûmumunye.”

²⁷ Rîrîa Jakovu aathiîre vakuvî na îthe nîguo amûmumunywe, Isaka nîwanungîre nguo ciake, akîmûrathima na akîmwîra atîrî, “Mûnungo mwaro wa mûvîcîwa nwa ta mûnungo wa mûgûnda ûrîa Ngai-Mûnene arathimîte.

²⁸ Ngai arokuurîria îme kuuma îgûrû na anorie mîgûnda yaku! Arokûva irio nyîngî na ndivei!

²⁹ Andû a ndûrîrî marotuîka ndungata ciaku na makwînamagîrîre. Ûrotuîka wa kwathaga aa mûrwanyûkwe, nao onthe marokwînamagîrîra. Arîa onthe magaakûrumaga maronyitwa nî kîrumi na arîa magaakûrathimaga marorathimagwa!”

Esaû nîwathaithire Isaka amûrathime

³⁰ Warîo Isaka arîkia kûrathima Jakovu, mwarwang'ina Esaû nîwaumire kûguîma na agîtonya.

³¹ Esaû wanake nîwarugire irio mbaro mûno akîvirîra îthe, na akîmwîra atîrî, “Vava nakûthaitha ûkîre ûrîe irio ino nakûrugîra nîguo ûndathime.”

³² Isaka nîwaûririe atîrî, “Nî we û?” Nake nîwamûcokerie atîrî, “Nî nie Esaû mûvîcîguo ûrîa mûkûrû.”

³³ Isaka nîwambîrîrie gûtetema mwîrî wonthe na akîûria atîrî, “Nîûrîkû ûragire nyamû na andetere? Nînarîa nyamû îo wa rîu ûtarî ûrakinya na nînamûrathima, na nîatûûra arî mûrathime tene na tene.”

³⁴ Rîrîra Esaû eegwire ûguo nîwarîrire augîrîrîtie na marakara akiugaga “Ûûi Vava, wa nanie ndathima!”

³⁵ Nwatî Isaka nîwamwîrire atîrî, “Mûrwanyûkwe aûkire amveenia na oca kîrathimo gîaku.”

³⁶ Esaû nîwaugire atîrî, “Rîrî nî rita rîa kaîrî rîake rîa kûmveenia. Nîkîo etagwa Jakovu. Nîwocire ûrikithathi wakwa, na rîu nîwoca kîrathimo gîakwa. Vava, ndûnandigarîria kîrathimo?”

³⁷ Isaka nîwacokerie Esaû atîrî, “Nînamûtua mwathi waku, nawe vamwe na andû onthe enyu mûkamûtungatagîra. Nînamûva irio na ndivei. Rîu gûtirî ûndû nîngîgwîka, mûvîcîwa!”

³⁸ Esaû nîwathiîre na mbere kûthaitha îthe akîmwîraga atîrî, “Nîkwa ûrî na kîrathimo kîmwe tu, Vava? Wa nanie ndathima!” Esaû nîwatumûkire na kîrîro kînene.

³⁹ Nake îthe Isaka nîwamwîrire atîrî, “Ûgaatûûraga kûraca na ûnoru wa gûkû nthî, kûndû kûraca na kûrîa kuuraga mbura.

⁴⁰ Nîûtûûra ûrûaga na ûrî ndungata ya mûrwanyûkwe, nwatî rîrîa ûkaaregana nake nîûkaagîa na wîyathi, na ndagaakwatha rîngî.”

⁴¹ Esaû nîwamenire Jakovu nîûndû wa kûrathimwa nî îthe. Esaû nîweîrire atîrî, “Îvinda rîa gûcakaya nîûndû wa vava rîrî vakuvî. Vîndî îo nîrîo ngaaûraga mûrwaiya Jakovu.”

⁴² Nwatî rîrîa Rebeka aamenyire mûvango wa Esaû, nîwatûmanîre Jakovu na akîmwîra atîrî, “Mûrwanyûkwe Esaû nîaravanga gûkûûraga nîguo ethirie marakara.

⁴³ Kwoguo mûvîcîwa, thikîrîria ûrîa ngûkwîra. Ûkîra wa rîu ûthiî Harani kwa mûrwaiya Labani,

⁴⁴ mwîkarange nake kuo nginya rîrîa marakara ma mûrwanyûkwe makaathira,

⁴⁵ na ariganîrwe nî ûrîa we wamwîkire. Nîngaacoka ngûtûmanîre ume kûu. Ndingîvota kûrwa nî mue muoîrî mûthenya ûmwe.”

Isaka nîwatûmire Jakovu kûrî Labani

⁴⁶ Rebeka nîwerire Isaka atîrî, “Nîrîmûnogu nî gûtûûrania na aka aya a Esaû. O nî a mûvîrîga wa Ahiti, na Jakovu wanake angîvikia mûndûmûka Mûhiti ta aya, nwa ngue.”