Juda 1 - ÎVUKU RÎA ÛVORO MWARO

¹ Kuuma kûrî nie Juda, ndungata ya Jesû Kristû, na nwa nie mûrwang'ina na Jakuvu. Kûrî andû arîa metîtwe nî Ngai na arîa matwîre mendetwe nî Ngai Vava na mûkamenyererwa nî Jesû Kristû.

² Mûrotuîka a kwîngîvîrwa nî ntha, thayû na wendani.

Arimû a maveeni

³ Arata akwa ende, nie nînendete mûno kûmwandîkîra ûvoro wîgiî ûvonokio ûrîa tûnyitanagîra tuonthe. Nwatî nînonire kûrî kwagîrîru nîmwandîkîre, nîguo nîmwîkîre vinya mûthiî na mbere kûrûîrîra wîtîkio ûrîa Ngai aaveere andû ake rita rîmwe na rîa kwîgana.

⁴ Nîûndû andû amwe arîa matarî na ûngai nîmatonyete na nthitho gatagatîrî getû. Andû acio nîo magarûraga ndûmîrîri îgiî wega wa Ngai wetû nîguo magîe na kîîgwatio Kîam maûndû marîa mekaga macûku. Andû aya nwa o maregaga Jesû Kristû ûrîa arî ke Mwathi na Mwathani wetû. Tene mandîko matheru nîmaarathire ûvoro wîgiî îtuîro rîrîa andû acio makûnyita.

⁵ Nîrenda kûmûririkania maûndû mama wana ethîrwa nîmûmecî: Ririkanani atî vîndî îmwe Mwathani nîwavonokirie andû a Isiraeli akîmaruta Misiri, nwatî vuvarî nîwathiririe arîa onthe matetîkia.

⁶ Taririkanani araika arîa maaregire wathani ûrîa maavetwe, nwatî magîtiganîria ciîkaro ciao. O maigîtwe ndumarî, movetwe na mînyororo tene na tene, nîguo Ngai akaamatuîra Mûthenya ûcio mûnene.

⁷ Taririkanani andû a matûûra ma Sodomu na Gomora na a matûûra marîa maariganîtie namo. Andû a kuo meekire wa ta araika acio. O meekire maûndû ma ûmaraa na makîrirîria kûmenyana kîîmwîrî na njîra irîa ireganîte na watho. Nao nîmaverithagua na mwaki wa tene na tene nîguo matuîke kîonereria kûrî andû onthe.

⁸ Na njîra wata îo, andû arîa matonyete gatagatîrî kenyu nîmacûkangagia mîîrî yao vîndî îrîa magîa na cioneki. Nao nîmanyararaga wathani wa Ngai na makaruma ciûmbe cia îgûrû irîa irî riiri.

⁹ Wana nginya Mikaeli mûraika ûrîa mûnene ndeeka ûguo. Rîrîa Mikaeli aakararanagia na Ngoma ûvoro wîgiî ûrîa wagîrîrwe nî kûnengerwa mwîrî wa Musa, Mikaeli ndaaûmîrîria gûcokeria Ngoma na ciugo cia kûmûruma, nwatî aamwîrire atîrî, “Mwathani arogûkaania!”

¹⁰ Nwatî andû acio nîmarumaga maûndû marîa o matataûkagîrwa nîmo. Namo maûndû marîa mamenyaga na ûmenyo wa mûciarîre ta nyamû cia kîthaka, nîmo mamacûkangagia.

¹¹ Na kaî o marî na thîna-î! Marûmagîrîra mîtugo ta îrîa yarî ya Kaini. Nîûndû wa kwenda mbeca, nîmetonyetie mavîtiarî wata marîa Balaamu eekire. Nao nî aremi wata Kora na makaathirua wa take.

¹² Andû acio maticonokaga vîndî îrîa makûrîcanîra namue mekariî ta maroro ma gîko vîndî îrîa mûrî marugarî ma ngwatanîro. O merîthagia o ene tu. Mekariî ta matû matarî mbura, marîa mavurutagwa nî rûkûngi. Mekariî ta mîtî vîndî ya thano îrîa îtagîcaga na maciaro. Mekariî ta mîtî mîkûûre na îkaûma viû.

¹³ Mekariî ta makûmbî ma manjî îriarî, na ciîko ciao cia ûûra nthoni ciîyumagîria ta mûvûû. Mekariî ta njata irîa ciûrûraga kûndû na kûndû. Nake Ngai nîamaigîrîte kûndû kûrî na nduma nene mûno tene na tene.

¹⁴ Enoku ûrîa warî wa rûciaro rwa mûgwanja kuuma kûrî Adamu nîwarathire ûvoro ûmegiî akiuga atîrî: “Mwathani nîagaaûka arî na ngiri nyîngî cia araika ake atheru,

¹⁵ gûtuîra andû onthe. Ke nîakaaverithia arîa onthe matarî na ûngai, nîûndû wa ciîko cionthe njûku maneka, na averithie evia arîa onthe manaria ciugo njûku cia gûcambithia Mwathani!”

¹⁶ Vîndî cionthe andû acio nîmanugunaga na makegwatia andû arîa engî. Nîmarûmagîrîra merirîria mao macûku. Nîmeganaga na makaveenereria andû arîa eengî nîguo megune o ene.

Gûkaanua na gûtaarwa

¹⁷ Nwatî mue arata akwa, nîmwagîrîrwe nî kûririkana ûvoro ûrîa mwerîtwe mbere nî atûmwa a Mwathani wetû Jesû Kristû.

¹⁸ O maamwîrire atîrî, “Vîndî îrîa mavinda ma mûthiia magaakinya, nîgûkaumîra andû makaamûnyûrûria, na marûmagîrîra merirîria mao matarî ma ûngai.”

¹⁹ Andû acio nîo matûmaga andû magaûkane. Matongoragua nî merirîria mao ma kîîmwîrî, na matiîthagîrwa na Roho.

²⁰ Nwatî mue arata akwa, îkaragani mûgîkûraga wîtîkiorî wenyu ûrîa mûtheru viû. Voyagani mûrî na vinya wa Roho Mûtheru.

²¹ Îkaragani mwendete Ngai wa mûgîetagîrîra Mwathani wetû Jesû Kristû. Na nîûndû wa ntha ciake nîakaamûva mwoyo wa tene na tene.

²² Andû amwe arîa methagîrwa marî na nganja, megucagîreni ntha.

²³ Vonokagiani arîa engî na njîra ya kûmathara kuuma mwakirî. Nao arîa engî megucagîreni ntha mûrî na guoya, na mûmenage nguo ciao irîa ithanîtue nî merirîria mao macûku.

Îvoya rîa gûkumia Ngai

²⁴ Na rîu, kûrî na ûrîa ûrî na ûvoti wa kûmûmenyerera mûtikagwe na kûmûrete mbere ya riiri wake mûtarî na ûcuke na mûrî na gîkeno,

²⁵ Ke nîke Ngai mûvonokia wetû. Na njîra ya Mwathani wetû Jesû Kristû, Ke arogîa na riiri, ûnene, ûthamaki na wathani, kuuma Kîammbîrîria, rîu na nginya tene na tene! Ameni.