Josh 18 - ÎVUKU RÎA ÛVORO MWARO

Vûrûri ûcio wîngî nîwagairwe

¹ Andû onthe a Isiraeli nîmaagomanire Shilo. Nîmaambire îgema rîa kûgoocagîra Ngai-Mûnene kûu Shilo, nîûndû vûrûri ûcio nîmaaûvotete.

² Mîvîrîga mûgwanja ya andû a Isiraeli ndîarî mîgaîre vandû.

³ Kwoguo Joshua nîwaûririe andû a Isiraeli atîrî, “Nîmweterera nginyagia rî mûtathiîte kwîgwatîra vûrûri ûrîa Ngai-Mûnene, Ngai wa methe menyu amûveete?

⁴ Mûvîrîga wa mûvîrîga nîûthuure andû athatû. Nanie nîngûmatûma mathiî mathiûrûrûke vûrûri ûyû na macore kûrîa mangîenda kûgaîrwa. Nao macoke mandetere ûrîa mona.

⁵ Vûrûri ûyû nîûgaanua icunjî mûgwanja. Mûvîrîga wa Juda ûrî na vûrûri wao na mwena wa îveti. Nacio njiarwa cia Josefu irî na wao na mwena wa rûgûrû.

⁶ Mwandîke waro ûrîa mûkoona icunjî icio mûgwanja mûke mûmbîre nanie ngaûria Ngai-Mûnene Ngai wetû ûtaaro.

⁷ Mûvîrîga wa Lawi ndûkaagaîrwa îgai mîvîrîga îo îngî îkîgaîrwa nîûndû îgai rîao nî gûtungata marî athînjîri-Ngai. Nayo mîvîrîga ya Gadi, Reubeni na nuthu ya mûvîrîga wa Manase nîagwatu îgai rîao rîrîa meerîrwe. Nîmaagaîrwe vûrûri ûrîa ûrî mwena wa îrathîro wa rûnjî rwa Jorodani nî Musa ndungata ya Ngai-Mûnene.”

⁸ Joshua nîwataarire andû arîa maathuurirwe na akîmera atîrî, “Thiîni vûrûrirî wonthe na mwandîke maûndû waro mûcoke mûndetere ûrîa wîkariî nîguo ngaavota kûria Ngai-Mûnene ûrîa ngûûgaania nîrî gûkû Shilo.” Nao andû acio marîkia gûtaarwa nî Joshua nîmaathiîre.

⁹ Kwoguo andû acio nîmaathiîre na nîmaathiûrûrûkire vûrûri wonthe. Nao nîmaandîkire ûrîa makûgaania vûrûri ûcio icunjî mûgwanja na makîandîka marîîtwa ma matûûra monthe. Nîmaacokire makîthiî Shilo kûrî Joshua kûrîa andû a Isiraeli maambîte magema.

¹⁰ Joshua nîwaûririe ûtaari kûrî Ngai-Mûnene nîûndû wao. Nîwacokire akîgaîra mîvîrîga îrîa yatigarîte îtarî mîgaîre vûrûri wao, wa mûvîrîga gîcunjî Kîamguo.

Vûrûri ûrîa wagaîrwe Benjamini

¹¹ Mûvîrîga wa Benjamini nîguo warî wa mbere kûgaîrwa. Naguo vûrûri ûrîa maagaîrwe warî gatagatî ka vûrûri ûrîa wagaîrîtwe mûvîrîga wa Juda na ûrîa wagaîrîtwe mûvîrîga wa Josefu.

¹² Mwena wa rûgûrû mûvaka wa vûrûri wa mûvîrîga wa Benjamini wambîrîrîtie rûnjîrî rwa Jorodani. Nîwacokete ûkanyûrûrûkîra ciîkûrûkorî irîa irî na mwena wa rûgûrû wa Jeriko na agacoka ûkathiîrîra irîmarî na mwena wa îthûîro nginya werûrî wa Bethiaveni.

¹³ Kuuma vau mûvaka ûcio nîwacokete ûkathiî ciîkûrûkorî irîa irî na mwena wa îveti wa Luzi (kûrîa gwîtagwa rîngî Betheli). Wauma vau nîwanyûrûrûkîte nginya Atarothu-adari, irîmarî irîa irî îveti rîa Bethi Horoni ya ngurumo.

¹⁴ Mûvaka nîwegatîte ûkathiî na mwena wa îveti umîte mwena wa îthûîro wa kîrîma ûthiîte Kiriathu Baali (kana Kiriathu Jearimu). Kiriathi-jearimu yarî ya mûvîrîga wa Juda. Ûyû nîguo warî mûvaka wa mwena wa Îthûîro.

¹⁵ Naguo mûvaka wa mwena wa îveti wambîrîrîtie rûtere rwa Kiriathu Jearimu. Nîwacokete ûkathiî ithimarî cia Nefutoa.

¹⁶ Kuuma ithimarî cia Nefutoa nîwanyûrûrûkîte ûkathiî nthî ya kîrîma kîrîa kîgiritanîtie na Kîamnda Kîam Hinomu mûthiiarî wa Kîamnda Kîam Refaimu mwena wa rûgûrû. Nîwacokete ûkathiî mwena wa îveti ûvîtûkîrîrîte Kîamndarî Kîam Hinomu mwena wa îveti îtûûra rîa Ajebusi warekerete Enirogeli.

¹⁷ Kuuma Enirogeli, mûvaka nîwacokete ûkegata mwena wa rûgûrû ûkathiî ûvîtûkîrîte Enishemeshi nginya Gelilothu mwena ûrîa werekerete mwanyarî wa Adumimu. Mûvaka nîwacokete ûkauma vau na ûkanyûrûrûka nginya îthigarî rîa Bohani (Bohani aarî mûvîcî wa Reubeni).

¹⁸ Nîwacokete ûkavîtûkîra mwena wa rûgûrû wîgiritanîtie na Kîamnda Kîam Jorodani ûgacoka ûgatonya Kîamndarî.

¹⁹ Kuuma vau nîwathiîrîrîte mwena wa rûgûrû wa Bethi Hogila na ûkîthîrîra mwena wa rûgûrû wa îria rîa Cumbî varîa rûnjî rwa Jorodani rwîtîkîte. Ûyû nîguo warî mûvaka wa mwena wa îveti.

²⁰ Naruo rûnjî rwa Jorodani nîruo rwarî mûvaka wa mwena wa îrathîro. Îo nîyo yarî mîvaka ya vûrûri ûrîa mbarî cia mûvîrîga wa Benjamini ciagaîrwe ûgîtuîka wao.

²¹ Matûûra manene marîa maarî ma mûvîrîga wa Benjamini kûringana na mbarî ciao maarî: Jeriko, Bethi Hogila, Emeki-kezizi,

²² Bethi Araba, Zemaraimu, Betheli,

²³ Avimu, Para, Ofira,

²⁴ Kefaramoni, Ofini, na Geba. Mau monthe maarî matûûra marîa manene îkûmi na maîrî, vamwe na icagi irîa ciarî vakuvî namo.

²⁵ Kwarî na matûûra mengî ta Gibeoni, Rama, Beerothi,

²⁶ Mizipa, Kefira, Moza,

²⁷ Rekemu, Irupeeli, Tarala,

²⁸ Zela, Haelefu, Jebusi (kana Jerusalemu), Gibea na Kiriathu Jearimu wa vamwe na icagi irîa ciarî vakuvî namo. Mau monthe maarî matûûra manene îkûmi na mana. Ûcio nîguo vûrûri ûrîa mbarî cia mûvîrîga wa Benjamini ciagaîrwe ûtuîke wao.