Johana 9 - ÎVUKU RÎA ÛVORO MWARO

Jesû nîwavonirie mûndû waciarîtwe arî mûtumumu

¹ Rîrîa Jesû aavîtûkîte, nîwonire mûndû waciarîtwe arî mûtumumu.

² Nao arutwa ake nîmaamûririe atîrî, “Mwarimû, nî mevia ma û maatûmire mûndû ûyû aciarwe arî mûtumumu? Nî make kana nî ma aciari ake?”

³ Nake Jesû nîwamacokerie atîrî, “Mûndû ûyû ndaciarwa arî mûtumumu nîûndû wa mevia make kana ma aciari ake. Aaciarirwe arî mûtumumu nîguo andû mone vinya wa Ngai ûkîruta wîra ndaarî yake.

⁴ Rîrîa kûrî mûthenya nwa nginya twîkare tûkîrutaga wîra wa ûrîa wandûmire. Ûtukû nîûgûkinya rîrîa gûtarî mûndû ûngîvota kûruta wîra.

⁵ Îvinda rîrîa ngwîthîrwa nîrî gûkû nthî, nîmbîthîrwa nîrî ûtheri wa nthî.”

⁶ Nake Jesû aarîkia kuga ûguo, nîwatuire mata nthî kuuma kanyuarî gake, akîthondeka ndaka namo akîmûvaka metho

⁷ na akîmwîra atîrî, “Thiî ûkethambie metho îriarî rîa Siloamu.” (Siloamu nî kuga “Ûrîa mûtûme.”) Kwoguo mûndû ûcio nîwathiîre akîîthambia na agîcoka akîonaga.

⁸ Nao andû arîa maariganîtie nake na arîa maamenyerete kûmwona akîvoya ûtethio nîmaaûririe atîrî, “Na kinthî mûndû ûyû tîke ûramenyerete kûvoya ûtethio ekarîte nthî?”

⁹ Andû amwe nîmaacokirie atîrî, “Nîke.” Nwatî engî magîcokia atîrî, “Naarî tîke. Nîkwa aronekana ta ke.” Kwoguo ke mwene nîwamerire atîrî, “Nie nînie ke.”

¹⁰ Nao nîmaamûririe atîrî, “Gwîkîkire atîa nîguo ûvote kwona?”

¹¹ Nake nîwamacokerie atîrî, “Mûndû ûrîa wîtagwa Jesû, athondekire ndaka, amvaka metho na ambîra nthiî ngethambie metho îriarî rîa Siloamu. Kwoguo nînthiîre na nethambia nîmvotire kwona.”

¹² Nao nîmaamûririe atîrî, “Ke arî kû?” Nake nîwamacokerie atîrî, “Nie ndiîcî.”

Afarisai nîmaatuîririe ûvoro wîgiî kûvonua kwa mûtumumu

¹³ Nao andû acio nîmaavirîre Afarisai mûndû ûcio wethîrîtwe arî mûtumumu.

¹⁴ Naguo mûthenya ûrîa Jesû aathondekire ndaka na akîmûvonia warî wa thavatû.

¹⁵ Na wa rîngî Afarisai nîmaacokire makîûria mûndû ûcio ûrîa gwekîkire nîguo avote kwona. Nake nîwamacokerie atîrî, “Ke amvakire ndaka metho, nanie nînîîthambirie na rîu nînîrona.”

¹⁶ Nao Afarisai amwe nîmaaugire atîrî, “Mûndû ûrîa ûrekire ûguo ndaumîte kûrî Ngai, nîûndû ke ndathîkagîra watho wa thavatû.” Nwatî andû amwe nîmaaûririe atîrî, “Mûndû wîthîrîtwe arî mwîvia aravota atîa kûringa ciama ta ino?” Nao nîmaamûkanire.

¹⁷ Wa rîngî Afarisai acio nîmaaûririe mûndû ûcio atîrî, “We ûngiuga atîa îgûrû rîa mûndû ûcio ûrauga nîke ûrakûvotithirie kwona?” Nake mûndû ûcio nîwamacokerie atîrî, “Ke nî mûrathi.”

¹⁸ Nao Ayahudi matietîkia atî mûndû ûcio wavonirue eethîrîtwe arî mûtumumu. Kwoguo nîmaatûmanîre aciari a mûndû ûcio metwe

¹⁹ na makîmaûria atîrî, “Ûyû nî mwana wenyu ûrîa mûrauga atî aaciarirwe arî mûtumumu? Kûngîvoteka atîa atî rîu nîaravota kwona?”

²⁰ Nao aciari ake nîmaacokirie atîrî, “Tue nîtwîcî atî ke nî mwana wetû na aaciarirwe arî mûtumumu.

²¹ Nwatî tûtiîcî ûrîa ke aravota kwona. Wana tûtiîcî mûndû ûrîa ûramûvotithirie kwona. Mûrieni ke nî mûgima wa kûvota kwîarîrîria!”

²² Aciari ake maaugire ûguo nîûndû nîmeetigagîra Ayahudi. Ayahudi nîmaarîkîtie gwîtîkanîria atî mûndû ûrîa ûgeetîkia atî Jesû nîke Mesaya nîakeengatwa kuuma îvoerorî.

²³ Kîu nîkîo gîatûmire aciari ake mauge atîrî, “Ke nî mûgima mûrieni!”

²⁴ Na riita rîa kaîrî Ayahudi nîmeetire mûndû ûrîa waciarîtwe arî mûtumumu na makîmwîra atîrî, “Aria ûma mbere ya Ngai! Tue nîtwîcî atî mûndû ûrîa ûraakûvonirie nî mwîvia.”

²⁵ Nake nîwamacokerie atîrî, “Nie ndiîcî ke nî mwîvia kana tî mwîvia. Nwatî ûrîa mbîcî nî atî: nîrethagîrwa nîrî mûtumumu na rîu nînîrona.”

²⁶ Nao nîmaamûririe atîrî, “Arekire atîa nîguo ûvote kwona?”

²⁷ Nake nîwamacokerie atîrî, “Nie namwîra wa rîu na mûtinenda kûnthikîrîria. Mûrenda nîmwîre rîngî nîkî? Nîkwa wa namue mûrenda gûtuîka arutwa ake?”

²⁸ Nao nîmaamûrumire na makîmwîra atîrî, “We nîwe mûrutwa wake, nwatî tue tûrî arutwa a Musa.

²⁹ Tue nîtwîcî atî Ngai nîwarîrie Musa, nwatî tue wana tûtiîcî îtûûra rîrîa mûndû ûcio aumîte!”

³⁰ Nake mûndû ûcio nîwamacokerie atîrî, “Na kaî nîmûramakia-î! Mue mûtiîcî kûrîa aumîte nwatî ke nîke ûramvonirie metho!

³¹ Tue nîtwîcî atî Ngai ndathikagîrîria evia, nwatî nîathikagîrîria mavoya ma andû arîa mamwîtigîrîte na mavingagia wendi wake.

³² Kuuma rîrîa nthî yaûmbirwe gûtirî kwaneguua mûndû wana ûmwe wanavotithia mûndû waciarîtwe arî mûtumumu kwona.

³³ Mûndû ûcio atangîaumire kûrî Ngai, ndangîravota gwîka wanarî ûndû.”

³⁴ Nao nîmaamûcokerie atîrî, “Ûngîvota atîa gûtûthomithia na we ûrî mwîvia kuuma rîrîa waciarirwe?” Nao nîmaamwîngatire kuuma kûu îvoerorî.

Ûtumumu wa kîîroho

³⁵ Rîrîa Jesû eegwire ûrîa kwarîkîtie gwîkîka nîwacaririe mûndû ûcio na amwona akîmûria atîrî, “We nîwîtîkîtie Mûrû wa Mûndû?”

³⁶ Nake mûndû ûcio nîwamûcokerie atîrî, “Mûthuuri ûyû, mbîra ke nû nîguo mvote kûmwîtîkia!”

³⁷ Nake Jesû nîwamwîrire atîrî, “We nîûrîkîtie kûmwona na nîke mûraria nake rîu.”

³⁸ Nake mûndû ûcio nîwaugire atîrî, “Mwathani, nie nîmbîtîkîtie.” Nake arîkia kuga ûguo nîwaturirie maru mbere ya Jesû.

³⁹ Nake Jesû nîwaugire atîrî, “Nie naûkire gûkû nthî gûtucanîra ciira, nîguo atumumu mavote kwona na arîa monaga matuîke atumumu.”

⁴⁰ Nao Afarisai amwe arîa maarî vakuvî nake nîmegwire akiuga ûguo na makîmûria atîrî, “Nîkwa ûrenda kuga atî wa natue tûrî atumumu?”

⁴¹ Nake Jesû nîwamacokerie atîrî, “Mûngîrî atumumu mûtingîrî na ûcuke, nwatî nîûndû mugaga nîmûvotaga kwona, ûguo nî kuga atî mûrî na ûcuke.”