Habakuku 3 - ÎVUKU RÎA ÛVORO MWARO

Îvoya rîa mûrathi Habakuku

¹ Îvoya rîa mûrathi Habakuku, ta ûrîa rîandîkîtwe nî Shigionothi.

² We Ngai-Mûnene nîmbîguîte ûrîa wîkîte, maûndû marîa wîkîte we Ngai-Mûnene nîmatûmîte nîîtigîre. Îka maûndû mau rîngî îvindarî rîîrî rîetû, tûma mamenyekane îvindarî rîetû, ûnarî na marakara ririkana ntha ciaku.

³ Ngai nîaûkîte kuuma Temani, Ngai ûrîa mûtheru aûkîte kuuma kîrîma gîa Parani. Riiri wake ûkunîkîte îgûrû kuonthe; nayo nthî îcûrîte ngumo yake.

⁴ Ûkengu wake wîkariî ta wa riûa, mveni cia ûtheri irauma njararî yake, kûrîa vinya wake ûthithîtwe.

⁵ Atûmaga mîrimû mbere yake, na gîkuû gîkarûmîrîra.

⁶ Aarûngamire nthî îkinaina, aaroririe mavûrûri makîthingitha. Irîma cia tene na tene nîcianyaganirue, tûrîma tûrîa tûtûûraga tene na tene nîtwavaraganirue. Kûu nîkuo njîra ciake irî kuuma tene na tene.

⁷ Nonire andû a Kushani makîthînîka, na andû a Midiani makinaina.

⁸ We Ngai-Mûnene nî nyûnjî ikûrakarîtie? Nî manjî ma îria makûrakarîtie? Nîwathiîre ûtwîte mbarathi yaku, na ikaari ciaku cia mbaara ûkîvootana.

⁹ Nîwevarîrie gûtûmîra ûta waku, na ûgîkîra mîguî yaku rûgarî, we nîwatûrangire nthî na nyûnjî.

¹⁰ Irîma ciakwonire igîtetema, gûkîgîa na mwîcûro wa manjî kuuma maturî. Manjî ma îria kûrîa kûriku makîruruma, na magikia makûmbî ma manjî na îgûrû.

¹¹ Riûa na mweri nîciarûngamire irî kûrîa ciîkaraga, rîrîa cionire ûtheri wa mîguî yaku îthiîte mûno, rîrîa cionire îtumû rîaku rîkîvenavenia.

¹² Wavîtûkîrîre nthî ûrî na marakara, wakinyangire mavûrûri ûrî na marûrû.

¹³ Nîwaumire ûkîthiî kûvonokia andû aku, ûkîthiî kûvonokia mûthamaki rûrîa wathuurîte. Nîwakinyangire mûtongoria wa andû arîa aganu, na ûkîthiria arûmîrîri ake onthe.

¹⁴ Nîwarathire mûtongoria wao wa mbaara na mîguî, rîrîa athigari ake a mbaara maûkire ta kîvuvûkanio gûtûnyagania, magîtîîaga ûrîa makûthiria athîni marî kûrîa methithîte.

¹⁵ Wathiîrîre îriarî na mbarathi ciaku, îria rîrî na makûmbî manene ma manjî.

¹⁶ Mbîgucaga ûguo ngamakania, mîromo yakwa îkainaina nî guoya, mavîndî makwa makagondoka, magûrû makwa makainaina. Nîmbetererete ngirîrîrîtie mûthenya ûcio wa mûthiro, ûrîa ûgaûka kûrî andû arîa matûtharîkagîra.

¹⁷ Wana ethîrwa mîkûyû tî îraa, kana mîthavibu îciara matunda, na mîtamaiyû îrege gûciara, na mîgûnda îture maketha, ndîthia cia ng'ondu na ng'ombe ciume kûrî irîa ciîngî, na ndîthia cia ng'ombe iture njagarî,

¹⁸ nie ngaakenagîrîra Ngai-Mûnene, ngenagîre Ngai ûrîa ûmvonokagia.

¹⁹ Mwathani Ngai-Mûnene nîke vinya wakwa, nîatûmaga magûrû makwa matuîke ta ma nthwariga, atûmaga nthiîrîre irîma îgûrû.